ନୂଆଦିଲ୍ଲୀ,୨୭।୭: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଗୁରୁବାର ରାଜସ୍ଥାନର ସିକରରେ ଏକ ରାଲିରେ କଂଗ୍ରେସ ଏବଂ ବିରୋଧୀଙ୍କୁ ଟାର୍ଗେଟ କରିଥିଲେ। କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖାର୍ଗେ ଏ ନେଇ ପ୍ରଧାନମନ୍ତ୍ରୀଙ୍କୁ ସମାଲୋଚନା କରିଛନ୍ତି। ପ୍ରଧାନମନ୍ତ୍ରୀ ମୋଦି ମଣିପୁର ଉପରେ କିଛି କହୁନାହାନ୍ତି, କିନ୍ତୁ ରାଜସ୍ଥାନରେ ରାଜନୈତିକ ଭାଷଣ ଦେଉଛନ୍ତି। ଏପରି କରି ସେ ସଂସଦକୁ ଅପମାନିତ କରିଥିବା ଖାର୍ଗେ ଅଭିଯୋଗ କରିଛନ୍ତି।
ଖାର୍ଗେ ଆହୁରି ମଧ୍ୟ କହିଛନ୍ତି, ଗୃହ ଚାଲିଥିବାରୁ ଆମେ ଦାବି କରୁଛୁ ପ୍ରଧାନମନ୍ତ୍ରୀ ସେଠାକୁ ଆସି ବିବୃତ୍ତି ଦିଅନ୍ତୁ, କିନ୍ତୁ ସେ ରାଜସ୍ଥାନରେ ରାଜନୈତିକ ଭାଷଣ ଦେଉଛନ୍ତି ଏବଂ ନିର୍ବାଚନ ବିଷୟରେ କହୁଛନ୍ତି। ସେ ସେଠାକୁ ଯାଇପାରୁଛନ୍ତି, ଅଧ ଘଣ୍ଟା ଧରି ଗୃହକୁ ଆସି ବିବୃତ୍ତି ଦେଇ ପାରିବେ ନାହିଁ କାହିଁକି? ଏହାର ଅର୍ଥ ସେମାନଙ୍କର କୌଣସି ଆଗ୍ରହ ନାହିଁ, ଗଣତନ୍ତ୍ର ଉପରେ ବିଶ୍ୱାସ ନାହିଁ। ଗଣତନ୍ତ୍ର ଏବଂ ସମ୍ବିଧାନର ସୁରକ୍ଷା କରିବାକୁ ପ୍ରଧାନମନ୍ତ୍ରୀ ଚାହୁଁ ନାହାଁନ୍ତି, ସେ ସଂସଦକୁ ଅପମାନ କରୁଛନ୍ତି। ଶାସକ ଦଳର ନେତାମାନେ ଗୃହରେ ହଙ୍ଗାମା ସୃଷ୍ଟି କରୁଛନ୍ତି, ମୋତେ କହିବାକୁ ଅନୁମତି ଦିଆଯାଇ ନାହିଁ।
ଏହାପୂର୍ବରୁ ରାଜସ୍ଥାନରେ ବିରୋଧୀ ଦଳକୁ ଟାର୍ଗେଟ୍ କରି ପ୍ରଧାନମନ୍ତ୍ରୀ ମୋଦି ଏହାକୁ କଂଗ୍ରେସର ଏକ ନୂଆ ଚାଲ୍ ବୋଲି କହିଛନ୍ତି। ମୋଦି କହିଛନ୍ତି, ପୂର୍ବରୁ ଯଦି କୌଣସି କମ୍ପାନୀ ବଦନାମ ହୋଇଯାଏ, ତେବେ ସେହି କମ୍ପାନୀ ଏକ ନୂଆ ବୋର୍ଡ ସ୍ଥାପନ କରି ଲୋକଙ୍କୁ ବୋକା ବନାଇ ସେମାନଙ୍କ ବ୍ୟବସାୟ ଚଳାଉଥିଲେ। କଂଗ୍ରେସ ଏବଂ ତାଙ୍କ ସାଥୀମାନେ ସେହି କମ୍ପାନୀଗୁଡିକୁ କପି କରୁଛନ୍ତି।
