ନୂଆଦିଲ୍ଲୀ,୧୬।୧: ଟେଷ୍ଟ ଦଳର ଅଧିନାୟକ ପଦରୁ ବିରାଟ କୋହଲିଙ୍କ ଓହରିବା ନିଷ୍ପତ୍ତି ଭାରତୀୟ କ୍ରିକେଟରେ ହଇଚୟ ସୃଷ୍ଟି କରିଛି। ଦକ୍ଷିଣ ଆଫ୍ରିକାଠାରୁ ୨-୧ରେ ସିରିଜ୍ ହାରିବା ଦିନକ ପରେ ଅଧିନାୟକ ପଦ ଛାଡ଼ିବା ନେଇ ସେ ଘୋଷଣା କରିଥିଲେ। ହଠାତ୍ ଏଭଳି ନିଷ୍ପତ୍ତି ଉପରେ ଅନେକ ପୂର୍ବତନ ଓ ବର୍ତ୍ତମାନ କ୍ରିକେଟର ପ୍ରତିକ୍ରିୟା ରଖିଛନ୍ତି। ଏହି ତାଲିକାରେ ସାମିଲ ହୋଇଛନ୍ତି ଲିଟଲ ମାଷ୍ଟର ସୁନୀଲ ଗାଭାସ୍କର।
“ମୁଁ ବିଲକୁଲ ଆଶ୍ଚର୍ଯ୍ୟ ନୁହେଁ। ସିରିଜ୍ର ପୁରସ୍କାର ବିତରଣୀ ଉତ୍ସବରେ ଏଭଳି ଘଟିପାରେ ବୋଲି ମୁଁ ଭାବୁଥିଲି। କିନ୍ତୁ ସେଭଳି ହୋଇଥିଲେ ସିରିଜ୍ ପରାଜୟ ରାଗରେ ନେତୃତ୍ୱ ଛାଡୁଥିବା ଭଳି ଅନୁଭବ ହୋଇଥାନ୍ତା। ଏଣୁ ମୁଁ ଭାବୁଛି କିଛି ବ୍ୟବଧାନରେ ଏହି ନିଷ୍ପତ୍ତି ଆସିଛି ” ବୋଲି ଗାଭାସ୍କର ଏକ ଜାତୀୟ ଗଣମାଧ୍ୟମ ସହ ଆଲୋଚନା ବେଳେ କହିଛନ୍ତି।
“ ବିଦେଶରେ ସିରିଜ୍ ପରାଜୟକୁ ବୋର୍ଡ ଅଧିକାରୀ ଓ କ୍ରିକେଟ ପ୍ରେମୀ ଗ୍ରହଣ କରିପାରନ୍ତି ନାହିଁ। ଜଣେ ଅଧିନାୟକ ଭାବେ ମୋର ଅଭିଜ୍ଞତା ଅଛି। ଅଧିନାୟକଙ୍କୁ ବରଖାସ୍ତ କରାଯିବାର ଭୟ ରହିଛି। ଏହା ଅତୀତରେ ମଧ୍ୟ ଘଟିଛି ଏବଂ ଏଥର ମଧ୍ୟ ଘଟିଥାନ୍ତା। କାରଣ ଭାରତ ଏହି ସିରିଜ୍କୁ ସହଜରେ ଜିତିବ ବୋଲି ଆଶା କରାଯାଉଥିଲା। ” ବୋଲି ପୂର୍ବତନ ଅଧିନାୟକ କହିଛନ୍ତି।