ନୂଆଦିଲ୍ଲୀ,୨୭।୬: ଦଳର ଶ୍ରେଷ୍ଠ ସୁଇଙ୍ଗ ବୋଲର ଭୁବନେଶ୍ୱର କୁମାରଙ୍କୁ ଇଂଲଣ୍ଡ ଗସ୍ତରେ ନ ନେବା ଭାରତୀୟ ଦଳର ସବୁଠୁ ବଡ଼ ଭୁଲ। ଏହାବାଦ୍ ଶାର୍ଦ୍ଦୁଳ ଠାକୁରଙ୍କୁ ୧୫ ଜଣିଆ ଦଳରେ ସାମିଲ ନ କରିବା ଭାରତୀୟ ଦଳକୁ ବିଶ୍ୱ ଟେଷ୍ଟ ଚମ୍ପିୟନଶିପ୍ (ଡବ୍ଲ୍ୟୁଟିସି) ଫାଇନାଲରେ ମହାଙ୍ଗା ପଡ଼ିଲା ବୋଲି କହିଛନ୍ତି ପୂର୍ବତନ ଚୟନକର୍ତ୍ତା ସରନଦୀପ ସିଂ। ଡବ୍ଲ୍ୟୁଟିସି ଫାଇନାଲର ପ୍ରଥମ ଦିନ ବର୍ଷା ଯୋଗୁ ଖେଳ ସମ୍ଭବ ହୋଇପାରି ନ ଥିଲା। କିନ୍ତୁ ଏହା ପେସରଙ୍କୁ ବେଶ୍ ସୁହାଇଥିଲା। ୧୫ ଜଣିଆ ଦଳରେ ଶାର୍ଦ୍ଦୁଳ ନ ଥିବାରୁ ତାଙ୍କୁ ବୋଲିଂ ଅଲରାଉଣ୍ଡର ଭାବେ ଚୂଡ଼ାନ୍ତ ଏକାଦଶରେ ସାମିଲ କରାଯାଇ ପାରି ନ ଥିଲା ବୋଲି ସେ ମତ ରଖିଛନ୍ତି।
ମ୍ୟାଚ୍ର ଦୁଇ ଦିନ ପୂର୍ବରୁ ଚୂଡ଼ାନ୍ତ ଏକାଦଶ ଘୋଷଣା କରିବା ଉଚିତ ଥିଲା। କିନ୍ତୁ ବର୍ଷା ଯୋଗୁ ପିଚ୍ ପେସରଙ୍କୁ ସୁହାଇବ ଜାଣିବା ପରେ ମଧ୍ୟ ଦଳରେ ଆବଶ୍ୟକୀୟ ପରିବର୍ତ୍ତନ ନ କରାଯିବା ବଡ଼ ଭୁଲ। ଦଳରେ ସ୍ଥାନ ପାଇଥିଲା ରବୀନ୍ଦ୍ର ଜାଡେଜା ଓ ରବିଚନ୍ଦ୍ରନ ଅଶ୍ୱିନ। କାରଣ ଦୁହେଁ ବ୍ୟାଟିଂ କରିପାରିବେ। ମାତ୍ର ପେସ ବୋଲିଂ ସାଙ୍ଗକୁ ଭଲ ବ୍ୟାଟିଂ କରିପାରୁ ଥିବା ଶାର୍ଦ୍ଦୁଳଙ୍କୁ ୧୫ ଜଣିଆ ଦଳରେ ମଧ୍ୟ ସ୍ଥାନ ମିଳି ନ ଥିଲା। ଚୂଡ଼ାନ୍ତ ଏକାଦଶରେ ନହେଲେ ନାହିଁ, କିନ୍ତୁ ୧୫ ଜଣିଆ ଦଳରେ ସ୍ଥାନ ପାଇବା ପାଇଁ ସେ ହକ୍ଦାର ଥିଲେ ବୋଲି କହିଛନ୍ତି ସରନଦୀପ। ଅଷ୍ଟ୍ରେଲିଆ ଗସ୍ତରେ ଭାରତୀୟ ଦଳ ଐତିହାସିକ ବିଜୟ ସହ ଚୟନକର୍ତ୍ତା ଭାବେ ଶେଷ ହୋଇଥିଲା ସରନଦୀପଙ୍କ କାର୍ଯ୍ୟକାଳ।