ନୂଆଦିଲ୍ଲୀ,୧୩।୧୨: ପାକିସ୍ତାନର ପୂର୍ବତନ ଦ୍ରୁତ ବୋଲର ଶୋଏବ ଅଖତର ବିଶ୍ୱର ବଡ଼ ବଡ଼ ବ୍ୟାଟ୍ସମ୍ୟାନ୍ଙ୍କୁ ନିଜ ଦ୍ରୁତ ବୋଲିଂରେ ଆଉଟ୍ କରିଛନ୍ତି। ଅନେକ ବ୍ୟାଟ୍ସମ୍ୟାନ୍ ତାଙ୍କ ବିପକ୍ଷରେ ଖେଳିବା ସହଜ ନ ଥିଲା। ନିକଟରେ ଶୋଏବ ଅଖତର ପ୍ରକାଶ କରିଛନ୍ତି ଯେ, ସଚିନ ତେନ୍ଦୁଲକରଙ୍କ ପରି ଜଣେ ମହାନ ବ୍ୟାଟ୍ସମ୍ୟାନଙ୍କୁ ଆଉଟ୍ କରିବା ଟିକେ ସହଜ ହୋଇଥିଲେ ମଧ୍ୟ ଭାରତର ଓ୍ବାଲ୍ଙ୍କୁ ଆଉଟ୍ କରିବା ବହୁତ କଷ୍ଟସାଧ୍ୟ ଥିଲା। ରାହୁଲ ଦ୍ରାବିଡଙ୍କୁ ବୋଲିଂ କରିବା ତାଙ୍କ ପାଇଁ ଅତ୍ୟନ୍ତ କଷ୍ଟସାଧ୍ୟ ଥିଲା। ଦ୍ରାବିଡଙ୍କ ଉତ୍ସର୍ଗୀକୃତତା ଏବଂ ଦକ୍ଷତା ହେତୁ ସେ ସବୁ ବୋଲର୍ଙ୍କୁ ସହଜରେ ଖେଳୁଥିଲେ। ସଚିନ ତେନ୍ଦୁଲକରଙ୍କ ଅପେକ୍ଷା ରାହୁଲ ଦ୍ରାଭିଡ ଅଧିକ ବିପଜ୍ଜନକ ବୋଲି ସେ କହିଛନ୍ତି।
ଶୋଏବ ଅଖତର ଭାରତ ବିପକ୍ଷରେ ୧୦ଟି ଟେଷ୍ଟ ଖେଳି ୧୮ ଉଇକେଟ ନେଇଥିଲେ। ସେହିପରି ଭାରତ ବିପକ୍ଷରେ ୨୮ଟି ଦିନିକିଆରେ ୪୧ ଉଇକେଟ ନେଇଥିଲେ। ରାହୁଲ ଦ୍ରାବିଡ ଏବଂ ଶୋଏବ ଅଖତର ଥରେ ପଡ଼ିଆରେ ଝଗଡା କରିଥିଲେ। ୨୦୦୪ରେ ଚାମ୍ପିଅନ୍ସ ଟ୍ରଫିର ଇଣ୍ଡୋ-ପାକ ମ୍ୟାଚ ସମୟରେ ଏହି ଘଟଣା ଘଟିଥିଲା। ବର୍ମିଂହାମ୍ରେ ଖେଳାଯାଇଥିବା ଏହି ମ୍ୟାଚ୍ରେ ସର୍ବଦା ଶାନ୍ତ ଥିବା ରାହୁଲ ଦ୍ରାବିଡ଼ ଅଖତରଙ୍କ ସହ ଝଗଡା କରିଥିଲେ।