ପାରଳାଖେମୁଣ୍ଡି,୧୧ା୪(ଗିରିଧାରୀ ପରିଛା): ଗଜପତି ଜିଲା ଗୋଷାଣି ବ୍ଲକ ଉପଲଡା ପଞ୍ଚାୟତ ଅଧୀନ ଚନ୍ଦନଖଳା ଗ୍ରାମକୁ ମାତ୍ର ପ୍ରାୟ ୭୦୦ ମିଟର ରାସ୍ତା ହୋଇପାରୁ ନ ଥିବାକୁ ନେଇ ଉଭୟ ଗୋଷାଣି ଏବଂ ଗୁମ୍ମା ବ୍ଲକର ବିଭିନ୍ନ ଗ୍ରାମାଞ୍ଚଳବାସୀଙ୍କ ମଧ୍ୟରେ ପ୍ରବଳ ଅସନ୍ତୋଷ ଦେଖାଦେଇଛି। ଚଳିତ ନିର୍ବାଚନରେ ଭୋଟ ଦେବୁନାହିଁ ଏବଂ କୌଣସି ରାଜନୈତିକ ଦଳ ପ୍ରଚାର ବା ଭୋଟ ଭିକ୍ଷା ନିମନ୍ତେ ଗ୍ରାମାଞ୍ଚଳକୁ ଅଯଥା ଟଙ୍କା ଓ ସମୟ ଅପଚୟ କରି ନ ଆସନ୍ତୁ ବୋଲି ଗଣମାଧ୍ୟମ ମାଧ୍ୟମରେ ନିବେଦନ କରିଛନ୍ତି।
ସୂଚନାଯୋଗ୍ୟ ଯେ, ଚନ୍ଦନ ଖଳା ଗ୍ରାମ ରାସ୍ତା ନିର୍ମାଣ ନିମନ୍ତେ ବହୁବାର ଅଭିଯୋଗ ହୋଇଆସୁଛି। ଏନେଇ ଜିଲାପାଳଙ୍କଠାରୁ ଆରମ୍ଭ କରି ବିଭାଗୀୟ କର୍ତ୍ତୃପକ୍ଷ ଏବଂ ସ୍ଥାନୀୟ ପ୍ରଶାସନକୁ ବାରମ୍ବାର ଗୁହାରି କରି ନୟାନ୍ତ ହେଲେଣି । ଗତ ମାସରେ ମଧ୍ୟ ଉଭୟ ବ୍ଲକବାସୀ ଜିଲାପାଳଙ୍କ ଦ୍ବାରସ୍ଥ ହୋଇଥିଲେ। ଜିଲାପାଳ ମଧ୍ୟ ରାସ୍ତା ଅଞ୍ଚଳ ବୁଲି ଦେଖିଥିଲେ। ହେଲେ ରାସ୍ତା ନିର୍ମାଣ ସକାଶେ କୌଣସି ଅଗ୍ରଗତି ହେଉ ନଥିବା ଯୋଗୁଁ ଅଞ୍ଚଳବାସୀଙ୍କ ମଧ୍ୟରେ ଅସନ୍ତୋଷର ଦାନା ବାନ୍ଧିଛି । ଉଭୟ ବ୍ଲକର ସୀମାନ୍ତ ଗ୍ରାମବାସୀ ଭୋଟ ବର୍ଜନ ନିମନ୍ତେ ନିଷ୍ପତ୍ତି ନେଇଥିବା କହିଛନ୍ତି।
ଅଞ୍ଚଳବାସୀଙ୍କ କହିବା ମୁତାବକ, ଏହି ଗତ ୩୦ବର୍ଷ ପୂର୍ବେ ମାଟି ରାସ୍ତା ନିର୍ମିତ ହୋଇଥିଲା। ଏହାପରେ ଆଉ ରାସ୍ତା ନିର୍ମାଣ ନିମନ୍ତେ କୌଣସି ପଦକ୍ଷେପ ନିଆଯାଇ ପାରି ନ ଥିବା କହିଛନ୍ତି। ଗତ ୨୦୧୮-୧୯ରେ ଗ୍ରାମ୍ୟ ଉନ୍ନୟନ ବିଭାଗ ପକ୍ଷରୁ ୪୨ଲକ୍ଷ ଟଙ୍କା ବ୍ୟୟବରାଦରେ ଟେଣ୍ଡର ହୋଇଥିଲା। ହେଲେ ଠିକାଦାର ଜଣକ ଟେଣ୍ଡର ପାଇଥିଲେ ମଧ୍ୟ କୌଣସି କାରଣରୁ କାମ ନ କରି ଛାଡିଦେଇଥିଲେ। ମାତ୍ର ୭୦୦ ମିଟର ରାସ୍ତା ନିର୍ମାଣ ହୋଇପାରୁ ନଥିବା ଯୋଗୁଁ ଉଭୟ ବ୍ଲକର ପ୍ରାୟ ଦଶରୁ ଊର୍ଦ୍ଧ୍ୱ ଗ୍ରାମବାସୀଙ୍କ ଯାତାୟତରେ ନାନାଦି ସମସ୍ୟା ଦେଖାଦେଉଛି। ଜରୁରୀକାଳୀନ ପରିସ୍ଥିତିରେ ଆମ୍ବୁଲାନ୍ସ କିମ୍ବା ଫାୟାର ଗାଡି, ବିଭିନ୍ନ ବିଦ୍ୟାଳୟ ତଥା କଲେଜକୁ ଯାଉଥିବା ଛାତ୍ରଛାତ୍ରୀ, ଚିକିତ୍ସା ନିମନ୍ତେ ପାରଳାଖେମୁଣ୍ଡି ସହର କିମ୍ବା ଉପଲଡା ଆଦି ହସ୍ପିଟାଲକୁ ଯିବାଆସିବାରେ ବହୁ ସମସ୍ୟା ସୃଷ୍ଟି ହେଉଥିବା ଜଣାଇଛନ୍ତି। ଏହି ଗ୍ରାମ୍ୟ ରାସ୍ତାରେ ଗୋଷାଣି ବ୍ଲକର ଚନ୍ଦନଖଳା ଆଦି ସହ ବିଭିନ୍ନ ଗ୍ରାମ ସମେତ ଗୁମ୍ମା ବ୍ଲକର କ୍ଷେତଡା, ଏଲୁଗୁଣ୍ଠା, ଆରିଲି, ଅଙ୍ଗରଡା, ବିତିସିଂ, ନାମନଗଡ, ଅଜୟଗଡ ପ୍ରଭୂତି ୧୦ଗ୍ରାମକୁ ସଂଯୋଗ କରୁଛି। ଗୁମ୍ମା ବ୍ଲକର ଉଲ୍ଲେଖିତ ଗ୍ରାମାଞ୍ଚଳର ଲୋକେ ଗୋଷାଣି ବ୍ଲକର ପାଟିକୋଟା, ଉପଲଡା, ବାଘଶଳା, ଗୋଷାଣି ଆଦି ଗ୍ରାମାଞ୍ଚଳକୁ ଯିବା ପାଇଁ ସ୍ବଳ୍ପଦୂରତା ହେଉଥିବାରୁ ଏହି ରାସ୍ତା ଉପରେ ମୁଖ୍ୟତଃ ନିର୍ଭର କରିଥାନ୍ତି। ଉଭୟ ବ୍ଲକର ପ୍ରାୟ ୧୦ହଜାରରୁ ଊର୍ଦ୍ଧ୍ୱ ଜନସାଧାରଣ ଏହି ରାସ୍ତା ଉପରେ ନିର୍ଭର କରିଥାନ୍ତି।
