ଜାକର୍ତ୍ତା,୧୫ ।୯: କରୋନା ସଂକ୍ରମଣ ସାରା ବିଶ୍ୱକୁ ଥରହର କରାଇ ଦେଇଥିବା ବେଳେ ଏହାକୁ ରୋକିବାକୁ ବିଭିନ୍ନ ଦେଶରେ ଭିନ୍ନ ଭିନ୍ନ ନିୟମମାନ ଲାଗୁ କରାଯାଇଛି । ତେବେ କରୋନା ସଂକ୍ରମଣ ରୋକିବାକୁ ବିଶ୍ୱ ସ୍ୱାସ୍ଥ୍ୟ ସଙ୍ଗଠନ(ଡବ୍ଲୁଏଚ୍ଓ) ଓ ସ୍ୱାସ୍ଥ୍ୟ ବିଶେଷଜ୍ଞମାନେ ମାସ୍କ ପିନ୍ଧିବା ଜରୁରୀ ବୋଲି କହିଛନ୍ତି । ଏହାସହ ସାମାଜିକ ଦୂରତା ମଧ୍ୟ କରୋନା ସଂକ୍ରମଣ ହ୍ରାସ କରିବାରେ ବଡ ଭୁମିକା ନେଇଥାଏ ବୋଲି କୁହାଯାଇଛି । ଇଣ୍ଡୋନେସିଆରେ ଏବେ ଏହି ମାସ୍କ ପିନ୍ଧିବାକୁ ନେଇ ନୂଆ ନିୟମ ଲାଗୁ କରାଯାଇଛି । ଇଣ୍ଡୋନେସିଆର ଇଷ୍ଟ ଜାଭା ଅଞ୍ଚଳରେ ପ୍ରଶାସନ ଘୋଷଣା କରିଛି ଯେ ଯେଉଁମାନେ ମାସ୍କ ନ ପିନ୍ଧିବେ ସେମାନଙ୍କୁ ଦଣ୍ଡ ଭାବେ କରୋନା ସଂକ୍ରମଣରେ ମୃତ୍ୟୁ ହୋଇଥିବା ଲୋକଙ୍କ ସଂସ୍କାର ପାଇଁ କବର ଖୋଳିବାକୁ ପଡିବ । ପ୍ରଶାସନ କହିବା କଥା ହେଲା କରୋନା ମୃତକଙ୍କ ସଂସ୍କାରରେ ଯୋଗ ଦେବାକୁ ସେଠାରେ କାହାକୁ ଅନୁମତି ନ ମିଳିଥିବାରୁ ଏବେ ସେଠାରେ ମୃତକଙ୍କୁ କବର ଦେବାକୁ ଲୋକଙ୍କ ଅଭାବ ପରିଲକ୍ଷିତ ହୋଇଛି । ତେଣୁ ଯେଉଁମାନେ ମାସ୍କ ପିନ୍ଧିବା ନିୟମ ଉଲ୍ଲଂଘନ କରିବେ ସେମାନଙ୍କୁ ଏହି ଦଣ୍ଡ ଦିଆଯାଉଛି । ନିକଟରେ ୨ ଜଣଙ୍କୁ ଏପରି ଦଣ୍ଡ ଦିଆଯାଇ ସରିଛି । ସୂଚନାଯୋଗ୍ୟ, ଏବେ ଇଣ୍ଡୋନେସିଆରେ କରୋନା ସଂକ୍ରମିତଙ୍କ ସଂଖ୍ୟା ୨,୧୮,୩୮୨ରେ ପହଞ୍ଚିଥିବା ବେଳେ ରାଜଧାନୀ ଜାକର୍ତ୍ତାରେ ଏହି ସଂଖ୍ୟା ରହିଛି ୫୪,୨୨୦ । ଏହାସହ ଇଷ୍ଟ ଜାଭାରେ ଏବେସୁଦ୍ଧା ୩୮,୦୮୮ ଜଣ କରୋନା ସଂକ୍ରମିତଙ୍କୁ ଚିହ୍ନଟ କରାଯାଇ ସାରିଲାଣି । ତେବେ କରୋନା ସଂକ୍ରମଣକୁ ରୋକିବାକୁ ସେପ୍ଟେମ୍ବର ୧୪ରୁ ସେଠାରେ ପୁଣିଥରେ ୨ ସପ୍ତାହ ଲାଗି ଲକ୍ଡାଉନ ଘୋଷଣା କରାଯାଇଛି ।