ଜୟପୁର,୮ା୫ (ନି.ପ୍ର.): ଜୟପୁର ଶ୍ରମ ବିଭାଗ ପକ୍ଷରୁ ସମସ୍ତ ଦୋକାନ ଓ ବାଣିଜ୍ୟ ପ୍ରତିଷ୍ଠାନ ମାଲିକମାନଙ୍କୁ ପୂର୍ବରୁ ଓଡିଆ ଭାଷାରେ ପ୍ରତିଷ୍ଠାନର ନାମ ଲେଖିବାକୁ କୁହାଯାଇଥିଲା। ଏବେ ପ୍ରଶାସନ ପକ୍ଷରୁ ତଦାରଖ ଆରମ୍ଭ ହୋଇଛି। ଯେଉଁମାନେ ନିଜ ପ୍ରତିଷ୍ଠାନର ନାମ ଓଡ଼ିଆରେ ଲେଖିନାହାନ୍ତି ସେମାନଙ୍କ ଉପରେ ଚଢାଉ କରାଯାଇଛି। ସହରର ମେନରୋଡ, ବେଲ୍ରୋଡ, ବାଇପାସ ରୋଡ, ଏନକେଟି ରୋଡରେ ଥିବା ୩୦ଟି ପ୍ରତିଷ୍ଠାନ ଉପରେ ଚଢାଉ କରାଯାଇ ପ୍ରତିଷ୍ଠାନ ମାଲିକମାନଙ୍କୁ କାରଣ ଦର୍ଶାଅ ନୋଟିସ ଜାରି କରାଯାଇଛି। ଯେଉଁ ଦୋକାନ ଓ ବାଣିଜ୍ୟ ପ୍ରତିଷ୍ଠାନର ମାଲିକମାନେ ୭ ଦିନ ଭିତରେ ଓଡିଆ ଭାଷାରେ ନାମଫଳକ ନ ଲେଖିବେ ସେମାନଙ୍କ ବିରୋଧରେ ଆଦାଲତରେ ମକଦ୍ଦମା ରୁଜୁ କରାଯିବ ବୋଲି ଶ୍ରମ କମିଶନର ପ୍ରସନ୍ନ ପାଣିଗ୍ରାହୀ କହିଛନ୍ତି। ଏହା ପୂର୍ବରୁ ଗତ ୧୭ା୪ା୨୩ରେ କୋରାପୁଟ ଅତିରିକ୍ତ ଜିଲାପାଳ କୋରପୁଟ ଜିଲାର ସମସ୍ତ ବ୍ୟବସାୟୀ ସଂଘ, ପୌରପାଳିକା ଓ ଏନଏସି ନିବାହୀ ଅଧିକାରୀଙ୍କୁ ନେଇ ଏକ ବୈଠକ କରିଥିଲେ। ବୈଠକରେ ବାଣିଜ୍ୟ ପ୍ରତିଷ୍ଠାନଗୁଡିକ ଓଡ଼ିଆରେ ନାମଫଳକ ଲେଖିବାକୁ ନିଷ୍ପତ୍ତି ହୋଇଥିଲା। ୧୫ ଦିନ ମଧ୍ୟରେ ଏହି ନାମଫଳକ ଲେଖିବାକୁ ପୌର ପରିଷଦ ଗାଡି ଡାକବାଜି ଯନ୍ତ୍ରରେ ପ୍ରଚାର କରି ସମସ୍ତଙ୍କୁ ଅବଗତ କରିଥିଲା। ଚଢାଉରେ ସହକାରୀ ଶ୍ରମ ଅଧୀକାରୀ ଚୈତନ୍ୟ ପ୍ରସାଦ ମାଝୀ, ପଦ୍ମ ଚରଣ ପଣ୍ଡା, ପୂର୍ଣ୍ଣିମା ଦୁରକାଙ୍କ ସହ ଅନ୍ୟମାନେ ସାମିଲ ହୋଇଥିଲେ। ପ୍ରଶାସନର ଏପରି ପଦକ୍ଷେପକୁ ସାଧାରଣରେ ପ୍ରଶଂସା କରାଯାଇଛି।