ନୂଆଦିଲ୍ଲୀ,୩୦।୬: ପୁଣିଥରେ ଜଣେ ଭାରତୀୟ ନିଜ ଦକ୍ଷତା ଯୋଗୁ ଦେଶର ନାଁ କରିପାରିଛନ୍ତି। ମାଇକ୍ରୋସଫ୍ଟରୁ ୨୨ଲକ୍ଷ ଟଙ୍କା ଆୟ କରି ଚର୍ଚ୍ଚାରେ ରହିଥିବା ୨୦ବର୍ଷୀୟ ଅଦିତି ସିଂହ ପୁଣି ଥରେ ଦେଶର ନାଁ କରିଛନ୍ତି। ଚଳିତ ଥର ଗୁଗଲ ଓ ଫେସ୍ବୁକ ଓ ମାଇକ୍ରୋସଫ୍ଟର କିଛି ତ୍ରୁଟି ବାହାର କରି ସେ ପ୍ରାୟ ୪୪ଲକ୍ଷ ଟଙ୍କା ଆୟ କରିଥିବା ଜଣାପଡ଼ିଛି। ଯାହାକୁ ନେଇ ଏବେ ଚର୍ଚ୍ଚା ଲାଗିରହିଛି। ଏକଦା ଅଦିତିଙ୍କ ଡାକ୍ତର ହେବାର ସ୍ବପ୍ନ ଥିଲା ହେଲେ ବର୍ତ୍ତମାନ ସେ ସାଇବର ଏନାଲିଷ୍ଟ ଭାବେ କାର୍ଯ୍ୟରତ ଅଛନ୍ତି। ଗତବର୍ଷରୁ ସେ ବାଉଣ୍ଟି ହଣ୍ଟର ଭାବେ କାର୍ଯ୍ୟ ଆରମ୍ଭ କରିଛନ୍ତି। ନିକଟରେ ଅଦିତି ମାଇକ୍ରୋସଫ୍ଟ ଆଜୁରେ କ୍ଲାଉଡ୍ ସିଷ୍ଟମରେ ତ୍ରୁଟି ବାହାର କରିଥିଲେ। ଏହାକୁ ନେଇ କମ୍ପାନୀ ପକ୍ଷରୁ ତାଙ୍କୁ ପୁରସ୍କାର ରାଶିରେ ୨୨ଲକ୍ଷ ଟଙ୍କା ଦିଆଯାଇଥିଲା।
କେବଳ ମାଇକ୍ରୋସଫ୍ଟ କମ୍ପାନୀ ନୁହେଁ ଅନେକ ବଡ଼ ବଡ଼ କମ୍ପାନୀ ଯଥା ଫେସ୍ବୁକ, ଟିକ୍ଟକ୍, ଇଥେରିୟମ୍ ଓ ଗୁଗଲ ସମେତ ୪୦ରୁ ଊର୍ଦ୍ଧ୍ୱ କମ୍ପାନୀର ତ୍ରୁଟି ବାହାର କରି ଅଦିତି ପୁରସ୍କୃତ ହୋଇସାରିଛନ୍ତି। ତ୍ରୁଟି ବାହାର କରି ସେ ଏପର୍ଯ୍ୟନ୍ତ ୬୦ହାଜର ଡଲାର(ପ୍ରାୟ ୪୪ଲକ୍ଷ ଟଙ୍କା)ଆୟ କରିସାରିଛନ୍ତି। କେବଳ ଫେସ୍ବୁକ ତାଙ୍କୁ ୭,୫୦୦ଡଲାର(ପ୍ରାୟ ୫.୫ଲକ୍ଷ) ପୁରସ୍କାର ରାଶି ଦେଇଥିବା ସେ କହିଛନ୍ତି। ଅନ୍ୟପଟେ ଅଦିତି ଫେସ୍ବୁକ, ମାଇକ୍ରୋସଫ୍ଟ ଓ ଗୁଗଲର ‘ହଲ୍ ଅଫ୍ ଫେମ୍’ରେ ସ୍ଥାନ ପାଇଛନ୍ତି। ଏତଦ୍ ବ୍ୟତୀତ ମିଳିତ ଜାତିସଂଘର ‘ହଲ୍ ଅଫ୍ ଫେମ୍’ରେ ମଧ୍ୟ ସେ ନିଜର ସ୍ଥାନ ଅକ୍ତିଆର କରିଥିବା ଜଣାପଡ଼ିଛି।