ଗଞ୍ଜାମ,୩୦ା୬(ଡି.ଏନ୍.ଏ.): ଗଞ୍ଜାମ ସହର ତ୍ରିବେଣୀ ମଠଛକଠାରେ ଦୀର୍ଘ ୭୦ବର୍ଷରୁ ଊର୍ଦ୍ଧ୍ୱ ହେବ ରହି ଆସୁଥିବା ପୂଜକ କନ୍ଧ ଶତପଥୀଙ୍କ ଘର ଆସନ୍ତା ୫ରେ ଭାଙ୍ଗିବାକୁ ପୁଣି ନୋଟିସ୍ ଜାରି କରିଛନ୍ତି ତହସିଲଦାର ଅରୁଣ କୁମାର ନାୟକ। ନୋଟିସ୍ ପାଇବା ପରେ ଭୟଭୀତ ହୋଇ ପଡ଼ିଛନ୍ତି ପୂଜକ କନ୍ଧ ଶତପଥୀଙ୍କ ପରିବାର। ତହସିଲଦାର ନାୟକଙ୍କ ଏହି କାର୍ଯ୍ୟକୁ ସମଗ୍ର ଗଞ୍ଜାମ ସହରବାସୀ ଦୃଢ଼ ନିନ୍ଦା କରିଛନ୍ତି । ପୂଜକଙ୍କ ଘରକୁ ଲାଗି ରହିଥିବା ସରକାରୀ ଜାଗାରେ ଜଣେ ଲୋକ ପାଚେରି ବୁଲାଇଥିବା ବେଳେ ତାକୁ ଉଚ୍ଛେଦ ନ କରି ଜଣେ ଲୋକ ୭୦ ବର୍ଷରୁ ଊର୍ଦ୍ଧ୍ୱ ରହି ଆସୁଥିବା ଘରକୁ ତହସିଲଦାର କାହା ଇଙ୍ଗିତରେ ଏପରି କାର୍ଯ୍ୟ କରୁଛନ୍ତି ସହରବାସୀ ପ୍ରଶ୍ନ କରିଛନ୍ତି। ଏପରିକି ଘର ବାଡ଼ିପଟ ୫ ହାତ ସରକାରୀ ଜାଗା ଦର୍ଶାଇ ତହସିଲଦାର ଭାଙ୍ଗିବାକୁ ଉଦ୍ୟମ ଚଳାଇଥିବାକୁ ନାପସନ୍ଦ କରିଛନ୍ତି ବୁଦ୍ଧିଜୀବୀ।
ପ୍ରକାଶ ଯୋଗ୍ୟ, ଗତ ମଙ୍ଗଳବାର ତହସିଲଦାର ଜେସିବି ମେଶିନ ସାହାଯ୍ୟରେ ଘର ଭାଙ୍ଗିବାକୁ ପ୍ରସ୍ତୁତି ଆରମ୍ଭ ହେବା ବେଳକୁ ଶତପଥୀଙ୍କ ସ୍ତ୍ରୀ ଓ ପୁଅ ବୋହୂ ଜେସିବି ଆଗରେ ବସି ରହିଥିଲେ। ଏହି ଘଟଣା ନେଇ ତହସିଲଦାର ନାୟକ ଏବଂ ବରିଷ୍ଠ ଆଇନଜୀବୀ ଦିଲ୍ଲୀପ କୁମାର ପଟ୍ଟନାୟକଙ୍କ ମଧ୍ୟରେ କଥା କଟାକଟି ହୋଇଥିଲା। ସ୍ଥାନୀୟ ଲୋକ ପ୍ରବଳ ବିରୋଧ କରିବା ପରେ ତହସିଲଦାର ନିରାଶ ହୋଇ ଫେରି ଯାଇଥିଲେ। ପୁଣି ଆସନ୍ତା ୫ରେ ଘର ଜବର ଦାଖଲ ଉଛେଦ ପାଇଁ ନୋଟିସ୍ ଜାରି କରିଛନ୍ତି। ଏହି ଘଟଣାରେ ଉଭୟଙ୍କ ଏତଲା ପରେ ପୋଲିସ ପୃଥକ୍ ପୃଥକ୍ ଭାବେ କେସ୍ ନଂ ୧୦୦/୨୨ ଓ ୧୦୧/୨୨ ଦୁଇଟି ମାମଲା ରୁଜୁ କରାଯାଇଥିବା ଥାନା ଅଧିକାରୀ ସୁଦୀପ୍ତ କୁମାର ସାହୁ ସୂଚନା ଦେଇଛନ୍ତି।