ଯାଜପୁର ଅଫିସ,୨୦ା୪: ଯାଜପୁର ଜିଲା ବିଞ୍ଝାରପୁର ବ୍ଲକରେ ସରକାରୀ ଅର୍ଥ ହେରାଫେରି ଅଭିଯୋଗ ପିଛା ଛାଡୁନି ା ଏହି ବ୍ଲକ ସୟଦପୁର ପଞ୍ଚାୟତରେ ହୋଇଥିବା ବିଭିନ୍ନ ଦୁର୍ନୀତି ସମ୍ପର୍କରେ ପୂର୍ବତନ ସରପଞ୍ଚ ତଥା ସାମାଜିକ କର୍ମୀ ଅବଦୁଲ କାଦିର ଲୋକାୟୁକ୍ତଙ୍କ ଦ୍ୱାରସ୍ଥ ହୋଇଥିଲେ ା ଏନେଇ ଲୋକାୟୁକ୍ତରେ ଏକ ମାମଲା (ନଂ.ଏଲୱାଇ- ୧୨୮/୨୦୨୩) ରୁଜୁ ହୋଇଥିଲା। ଉକ୍ତ ଆବେଦନକୁ ବିଚାର କରି ଲୋକାୟୁକ୍ତ ବିଞ୍ଝାରପୁର ବିଡିଓ ମିନତି ଜଗଦ୍ଦେବ, ସହକାରୀ ଯନ୍ତ୍ରୀ ପ୍ରସନ୍ନ କୁମାର ଦାସ, କନିଷ୍ଠ ଯନ୍ତ୍ରୀ ଶିଶିର କୁମାର ନାୟକ ଓ ବିକାଶ ରଞ୍ଜନ ଦାସଙ୍କୁ ୬ ସପ୍ତାହ ମଧ୍ୟରେ ଉତ୍ତର ରଖିବାକୁ ନିର୍ଦ୍ଦେଶ ଜାରି କରିଛନ୍ତି।
ପୂର୍ବରୁ ମହାତ୍ମା ଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିତ କର୍ମନିଯୁକ୍ତି ଯୋଜନା (ଏମ୍ଜିଏନ୍ଆରଇଜିଏସ୍), ଆବାସ ଯୋଜନାରେ ଅନେକ କୋଟି ଟଙ୍କାର ଦୁର୍ନୀତି ଅଭିଯୋଗ ହୋଇଥିଲା ା ଏଥିପାଇଁ କେତେଜଣ ସରକାରୀ କର୍ମଚାରୀ ନିଲମ୍ବିତ ହୋଇଥିଲେ ା ଆହୁରି ମଧ୍ୟ କେତେଜଣ କର୍ମଚାରୀ ଓ ଜନପ୍ରତିନିଧିଙ୍କୁ ଟଙ୍କା ଫେରସ୍ତ ବା ରିକଭରି ପାଇଁ ନିର୍ଦ୍ଦେଶ ହୋଇଥିଲା ା ଏବେ ବିଭିନ୍ନ ଯୋଜନାରେ ଜାଲ୍ ବିଲ୍ ଉପସ୍ଥାପନ କରି ବିପୁଳ ଅର୍ଥ ଲୁଟ ହୋଇଥିବା ନେଇ କାଦିର ଅଭିଯୋଗ କରିଛନ୍ତି ା କେବଳ ସୟଦପୁର ପଞ୍ଚାୟତରେ ୬୫ ଲକ୍ଷ ଟଙ୍କାରୁ ଅଧିକ ଆତ୍ମସାତ୍ ହୋଇଥିବା ବେଳେ ସମସ୍ତ ପଞ୍ଚାୟତର ଉନ୍ନୟନମୂଳକ କାର୍ଯ୍ୟର ତଦନ୍ତ କରାଗଲେ ଏହି ଦୁର୍ନୀତି ୨୫ କୋଟି ଟଙ୍କାରୁ ଅଧିକ ହେବ ବୋଲି ଅଭିଯୋଗରେ ଦର୍ଶାଯାଇଛି ା ସୂଚନା ଅଧିକାର ଆଇନ ବଳରେ ମିଳିଥିବା ତଥ୍ୟକୁ ଆଧାର କରି ସେ ଏହି ଦୁର୍ନୀତିର ପର୍ଦ୍ଦାଫାଶ କରିଛନ୍ତି ବୋଲି ଜଣାପଡିଛି ା
ତେବେ ବିଞ୍ଝାରପୁର ବ୍ଲକରେ ହୋଇଥିବା ଦୁର୍ନୀତି ସମ୍ପର୍କରେ ରାଜ୍ୟ ସରକାର କିମ୍ବା ସ୍ଥାନୀୟ ପ୍ରଶାସନ କୌଣସି କାର୍ଯ୍ୟାନୁଷ୍ଠାନ ନ ନେବାରୁ କାଦିର ଏହି ଦୁର୍ନୀତିକୁ ନେଇ ଓଡ଼ିଶା ହାଇକୋର୍ଟରେ ଏକ ଜନସ୍ବାର୍ଥ ମାମଲା (ନଂ.ଡବ୍ଲ୍ୟୁପିସି-୨୧୨୮/୨୦୨୩) ଆଗତ କରିଥିଲେ ା ବିଚାରପତି ଜଷ୍ଟିସ୍ ବିଶ୍ୱଜିତ ରଥ ଏହି ଅଭିଯୋଗ ଉପରେ ବିଚାର କରିବାକୁ ରାଜ୍ୟ ସରକାର ତଥା ପଞ୍ଚାୟତିରାଜ ସଚିବଙ୍କୁ ନିର୍ଦ୍ଦେଶ ଦେଇଥିଲେ ା ଏବେ ପୁଣି ଲୋକାୟୁକ୍ତଙ୍କ ନିର୍ଦ୍ଦେଶକୁ ନେଇ ବିଞ୍ଝାରପୁର ବ୍ଲକ ପ୍ରଶାସନ ହରଡ଼ଘଣାରେ ପଡିଛି। ଅଭିଯୋଗ ଅନୁଯାୟୀ, ବିଭିନ୍ନ ପ୍ରକଳ୍ପ ଶେଷ ହେବା ପରେ ଭେଣ୍ଡରଙ୍କଠାରୁ ସାମଗ୍ରୀ କିଣାଯିବା, ଯନ୍ତ୍ରୀଙ୍କ ଦ୍ୱାରା ବିଲ୍ ପ୍ରସ୍ତୁତ ହେବା ପରେ ସାମଗ୍ରୀ କିଣା ବାବଦ ବିଲ୍ ଦାଖଲ ହେବା, ବିଲ୍ରେ ଜିଏସ୍ଟି ସମ୍ପର୍କରେ ବିବରଣୀ ନ ଦେବା, ଗୋଟିଏ କାର୍ଯ୍ୟାଦେଶ ନମ୍ବରରେ ୧୧ଟି ପ୍ରକଳ୍ପ ହୋଇଥିବା ଭଳି ଅନିୟମିତତା ସାମ୍ନାକୁ ଆସିଛି। ବିଞ୍ଝାରପୁର ବ୍ଲକର ସୟଦପୁର ପଞ୍ଚାୟତରେ ୨୧ଟି ପ୍ରକଳ୍ପରେ ଏପରି ଭାବେ ଜାଲ୍ ବିଲ୍ ପ୍ରସ୍ତୁତ କରାଯାଇ ସରକାରୀ ଅର୍ଥ ଲୁଟ୍ ହୋଇଛି ବୋଲି ଅଭିଯୋଗ ହୋଇଛି ା କେବଳ ସୟଦପୁର ପଞ୍ଚାୟତ ନୁହେଁ, ଏହି ବ୍ଲକର ୨୯ଟି ପଞ୍ଚାୟତରେ ଏଭଳି ଦୁର୍ନୀତି ହୋଇଛି ବୋଲି ଜଣାପଡିଛି ା