ଜମନକିରା,୨୯ା୬(ଡି.ଏନ୍.ଏ.): ସମ୍ବଲପୁର ଜିଲା ଜମନକିରା ବ୍ଲକ ସଦର ମହକୁମାସ୍ଥିତ କଦଳୀମୁଣ୍ଡା ସରକାରୀ ଉନ୍ନୀତ ପ୍ରାଥମିକ ବିଦ୍ୟାଳୟକୁ ନିଜ ଜାଗା ଦାବି କରି ସ୍କୁଲକୁ ନୋଟିସ୍ କରାଯାଇଛି।
ସୂଚନାଯୋଗ୍ୟ, ଜମନକିରା ସଦର ମହକୁମାରେ କଦଳୀମୁଣ୍ଡା ସରକାରୀ ଉନ୍ନୀତ ପ୍ରାଥମିକ ବିଦ୍ୟାଳୟଟି ୧୯୭୦ରେ ପ୍ରତିଷ୍ଠା ହୋଇଥିଲା। ଏହା ୫୦ବର୍ଷରୁ ଅଧିକ ପୁରାତନ ହୋଇଥିବା ବେଳେ ଏବେ ସ୍ଥାନୀୟ ଅଞ୍ଚଳର ରବି ମହାକୁଲ ସ୍କୁଲର ୪ ଡିସିମିଲି ଜାଗାକୁ ନିଜ ଜାଗା ବୋଲି ଆଡଭୋକେଟ୍ ହୃଦାନନ୍ଦ ଶର୍ମାଙ୍କ ମାଧ୍ୟମରେ ୨୭ରେ ନୋଟିସ୍ ଜାରି କରିଛନ୍ତି। ସ୍କୁଲର ପ୍ରଧାନଶିକ୍ଷକ, ଜମନକିରା ଗୋଷ୍ଠୀ ଶିକ୍ଷାଧିକାରୀ ଏବଂ ସମ୍ବଲପୁର ଜିଲା ଶିକ୍ଷାଧିକାରୀ ପ୍ରମୁଖଙ୍କୁ ନୋଟିସ୍ ପଠାଇଛନ୍ତି। ନୋଟିସ୍ରେ ଉଲ୍ଲେଖ ଅନୁଯାୟୀ, ଉକ୍ତ ସ୍କୁଲର ୪ ଡିସିମିଲି ଜାଗା ମହାକୁଲଙ୍କର। ତେଣୁ ସ୍କୁଲ ତାଙ୍କୁ ତାଙ୍କ ଜାଗା ହସ୍ତାନ୍ତର କରନ୍ତୁ ନଚେତ୍ ଏବେକାର ଦର ଅନୁସାରେ ୪ ଡିସିମିଲି ଜାଗାକୁ ୪୦ ଲକ୍ଷ ଟଙ୍କା ପ୍ରଦାନ କରନ୍ତୁ। ଏହାକୁ ନେଇ ସ୍କୁଲ କର୍ତ୍ତୃପକ୍ଷଙ୍କ ମଧ୍ୟରେ ଛାନିଆ ପଶିଛି। ଜିଲା ପ୍ରଶାସନର ନିର୍ଦ୍ଦେଶ କ୍ରମେ ବୁଧବାର ସ୍କୁଲ ପରିସରରେ ସ୍କୁଲ ଶିକ୍ଷକ ଶିକ୍ଷୟିତ୍ରୀ, ଜମନକିରା ଗୋଷ୍ଠୀ ଶିକ୍ଷାଧିକାରୀ, ସ୍କୁଲ ପରିଚାଳନା କମିଟି ମେମ୍ବର, ଅଭିଭାବକ ଏବଂ ଅଞ୍ଚଳର ମାନ୍ୟଗଣ୍ୟ ବ୍ୟକ୍ତିମାନଙ୍କୁ ନେଇ ଏକ ଜରୁରୀ ବୈଠକ କରାଯାଇଥିଲା। ଆଲୋଚନା କରାଯାଇ ଏକ ସ୍ବତନ୍ତ୍ର କମିଟି ଗଠନ କରାଯାଇଥିଲା। ନୂତନ କମିଟି ଗଠନ ହୋଇଥିବା ସଭ୍ୟାସଭ୍ୟମାନେ ପ୍ରଥମେ ଶ୍ରୀ ମହାକୁଲଙ୍କ ସହ ଆଲୋଚନା ମାଧ୍ୟମରେ ସମାଧାନ କରିବାକୁ ଚେଷ୍ଟା କରିବେ ନଚେତ୍ ଆଗାମୀ ଦିନରେ ଏହାକୁ ନେଇ ଉଚିତ୍ ପଦକ୍ଷେପ ଗ୍ରହଣ କରିବେ ବୋଲି ନିଷ୍ପତ୍ତି ହୋଇଥିଲା। ଏହିପରି ସ୍କୁଲ ଜାଗା ଅକ୍ତିଆର କରିବାକୁ ନେଇ ଛାତ୍ର୍ରୀଛାତ୍ରଙ୍କ ଶିକ୍ଷା ପ୍ରତି ଅସୁବିଧା ହେବ ବୋଲି ଅଭିଭାବକମାନେ ମତ ରଖିଛନ୍ତି।