ବଲାଙ୍ଗୀର ଅଫିସ, ୨୦।୫: କୋଭିଡ୍ ମହାମାରୀ ସମୟରେ ଲୋକଙ୍କୁ ଅଯଥାରେ ଘରୁ ନ ବାହାରିବାକୁ କେନ୍ଦ୍ର ଓ ରାଜ୍ୟ ସରକାର ନିର୍ଦ୍ଦେଶାବଳୀ ଜାରି କରିଛନ୍ତି। ଏହାଦ୍ୱାରା କୋଭିଡ୍ ସଂକ୍ରମଣ ଚେନ୍ ବ୍ୟାହତ ହେବ ବୋଲି କୁହାଯାଉଛି। ତେବେ ବଲାଙ୍ଗୀର ଜିଲା ପ୍ରଶାସନ କୋଭିଡ୍ ଗାଇଡ୍ଲାଇନ ଉଲ୍ଲଂଘନ କରି ଜିଲାର ଲୋୟର ସୁକ୍ତେଲ ଜଳସେଚନ ପ୍ରକଳ୍ପ ପ୍ରଭାବିତ ପରଧିଆପାଲି ଗ୍ରାମବାସୀଙ୍କୁ ୭ଦିନ ମଧ୍ୟରେ ଗାଁ ଓ ଘର ଛାଡ଼ିବାକୁ ନିର୍ଦ୍ଦେଶ ଦେଇଛି। ଜିଲା ପ୍ରଶାସନର ଏଭଳି ବିଚିତ୍ର ଓ ଅମାନବୀୟ ନିର୍ଦ୍ଦେଶକୁ ପରଧିଆପାଲି ଗ୍ରାମବାସୀ ନିନ୍ଦା କରିଛନ୍ତି। ଏଦିଗରେ ବିହିତ ପଦକ୍ଷେପ ନେବାକୁ ମୁଖ୍ୟମନ୍ତ୍ରୀ, ମାନବିକ ଅଧିକାର କମିଶନ ଓ ଜନପ୍ରତିନିଧିଙ୍କ ଦୃଷ୍ଟିଆକର୍ଷଣ କରିଛନ୍ତି।
ମିଳିଥିବା ସୂଚନା ଅନୁସାରେ ଲୋୟର ସୁକ୍ତେଲ ଜଳସେଚନ ପ୍ରକଳ୍ପ ପୁନର୍ବସତି ଓ ଥଇଥାନ କାର୍ଯ୍ୟାଳୟ ପ୍ରକଳ୍ପ ନିର୍ଦ୍ଦେଶକଙ୍କ ପକ୍ଷରୁ ନୋଟିସ ସଂଖ୍ୟା ୨୦/ତା୧୩ା୪ା୨୦୨୧ରିଖ ଅନୁଯାୟୀ ପରଧିଆପାଲି ଗ୍ରାମବାସୀଙ୍କୁ ସର୍ବସାଧାରଣ ନୋଟିସ ଜାରି କରିଥିଲେ। ଏହି ନୋଟିସ ଦିଆଯିବାର ୨୮ ଦିନ ପରେ ଅର୍ଥାତ୍ ମେ ୧୧ ତାରିଖରେ ଉକ୍ତ କାର୍ଯ୍ୟାଳୟ ପକ୍ଷରୁ ପରଧିଆପାଲି ଗ୍ରାମବାସୀଙ୍କୁ ଆଉ ଏକ ନୋଟିସ ଜାରି କରାଯାଇଥିଲା। ଉକ୍ତ ନୋଟିସରେ ଗତ ୨୬ ଏପ୍ରିଲରୁ ୩୦ଏପ୍ରିଲ ମଧ୍ୟରେ ଗାଁରେ କ୍ୟାମ୍ପ କରାଯାଇଥିଲା। ଉକ୍ତ କ୍ୟାମ୍ପରେ ପ୍ରାପ୍ୟ ଗ୍ରହଣ ନିମନ୍ତେ ବିସ୍ଥାପିତମାନେ ଆବଶ୍ୟକ କାଗଜପତ୍ର ଦାଖଲ କଲେନାହଁ। ଏଣୁ ମଞ୍ଜୁର ରାଶି ପରବର୍ତ୍ତୀ ଦିନମାନଙ୍କରେ ଅଫିସରୁ ଆସି ଗ୍ରହଣ କରିପାରିବେ ବୋଲି କୁହାଯାଇଥିଲା। ଦ୍ୱିତୀୟ ନୋଟିସ ଜାରି କରାଯିବାର ୭ଦିନ ମଧ୍ୟରେ ନିଜ ଗ୍ରାମସ୍ଥିତ ବାସଗୃହ ତ୍ୟାଗ କରି ଅନ୍ୟତ୍ର ବିସ୍ଥାପନ ନ ହେଲେ ଆଇନ ଅନୁଯାୟୀ ବିହିତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କୁହାଯାଇଛି।
ବର୍ତ୍ତମାନ ବଲାଙ୍ଗୀର ଜିଲା ସମେତ ରାଜ୍ୟରେ ସପ୍ତାହାନ୍ତ ଦୁଇଦିନିଆ ଶଟ୍ଡାଉନ୍ ଓ ଲକ୍ଡାଉନ୍ ଘୋଷଣା କରାଯାଇଛି। ଏତିକିବେଳେ ଜିଲା ପ୍ରଶାସନ ଗାଁ ଓ ଘର ଛାଡିବାକୁ ନିର୍ଦ୍ଦେଶ ଦେବାକୁ ସହଜରେ ଗ୍ରହଣ କରିପାରି ନାହାନ୍ତି ପରଧିଆପାଲି ଗ୍ରାମବାସୀ। ପ୍ରକଳ୍ପ ସପକ୍ଷବାଦୀ ହେବା ସତ୍ତ୍ୱେ ପ୍ରଶାସନ ସେମାନଙ୍କୁ ଏଭଳି ନୋଟିସ ଜାରି କରିବା ଦୁର୍ଭାଗ୍ୟଜନକ ବୋଲି କହିଛନ୍ତି। ଦୁଇବର୍ଷରୁ ଊର୍ଦ୍ଧ୍ୱ ହେଲା ବିସ୍ଥାପିତଙ୍କ ୧୧ ଦଫା ଦାବି ପୂରଣ ହୋଇନାହିଁ। ଏହାସତ୍ତ୍ୱେ ପ୍ରଶାସନ ସେମାନଙ୍କୁ ନୋଟିସ ଜାରି କରୁଛି ବୋଲି କହିଛନ୍ତି। ଏ ଦିଗରେ ଲୋଇସିଂହା, ବଲାଙ୍ଗୀର ଓ କଣ୍ଟାବାଞ୍ଜି ବିଧାୟକ, ମୁଖ୍ୟମନ୍ତ୍ରୀ, ଜାତୀୟ ଓ ରାଜ୍ୟ ମାନବିକ ଅଧିକାର କମିଶନଙ୍କ ଦୃଷ୍ଟିଆକର୍ଷଣ କରାଯାଇଥିବା ଗ୍ରାମବାସୀ ଜଣାଇଛନ୍ତି। ୨୦୨୧ ଜାନୁୟାରୀ ୧ ସୁଦ୍ଧା ୧୮ବର୍ଷ ବୟସ୍କଙ୍କୁ ଥଇଥାନ ତାଲିକାରେ ଅନ୍ତର୍ଭୁକ୍ତ କରିବା, ସମସ୍ତଙ୍କୁ ସମାନ ଥଇଥାନ ରାଶି ଦିଆଯିବା ସମେତ ୧୧ ଦଫା ଦାବି ପୂରଣ ପରେ ଯାଇ ସେମାନଙ୍କୁ ବିସ୍ଥାପିତ କରିବାକୁ ଗ୍ରାମବାସୀ ଦାବି କରିଛନ୍ତି। ଉପରୋକ୍ତ ଦୁଇ ନୋଟିସ ସମ୍ପର୍କରେ ପଚାରିବାକୁ ଲୋୟର ସୁକ୍ତେଲ ଜଳସେଚନ ପ୍ରକଳ୍ପ ପୁନର୍ବାସ ଓ ଥଇଥାନ ପ୍ରକଳ୍ପ ନିର୍ଦ୍ଦେଶକ ମହେନ୍ଦ୍ର ମହାପାତ୍ରଙ୍କୁ ତାଙ୍କ ମୋବାଇଲ ନଂ ୯୪୩୭୩୩୧୫୬୧ରେ ଯୋଗାଯୋଗ କରାଯାଇଥିଲା। ରିଙ୍ଗ ହେଉଥିଲେ ବି ରିସିଭ୍ ନ କରିବାରୁ ତାଙ୍କ ପ୍ରତିକ୍ରିୟା ମିଳିପାରିନାହିଁ।