ନ୍ୟୁୟର୍କ, ୭।୯(ଏପି)- ବିଶ୍ୱର ନମ୍ବରଓ୍ବାନ ଖେଳାଳି ସର୍ବୟାର ନୋଭାକ ଜୋକୋଭିଚ୍ ଏକ ଅପ୍ରିତିକର ପରିସ୍ଥିତିରେ ଚଳିତ ୟୁଏସ ଓପନ ଗ୍ରାଣ୍ଡସ୍ଲାମ ଟେନିସ ଟୁର୍ନାମେଣ୍ଟରୁ ବିଦାୟ ନେଇଛନ୍ତି। ଜଣେ ଲାଇନ୍ ଜଜ୍ଙ୍କୁ ବଲ୍ରେ ଆଘାତ କରିଥିବାରୁ ତାଙ୍କୁ ଏପରି ପରିସ୍ଥିତିର ସାମ୍ନା କରିବାକୁ ପଡ଼ିଛି। ସୋମବାର ପୁରୁଷ ସିଙ୍ଗଲ୍ସର ୪ର୍ଥ ରାଉଣ୍ଡ ମ୍ୟାଚ ଅବସରରେ ସେ ପାବ୍ଲୋ କାରେନୋ ବୁଷ୍ଟାଙ୍କ ବିପକ୍ଷ ମ୍ୟାଚରେ ୫-୬ ପଏଣ୍ଟରେ ପଛୁଆ ରହିଥିବାବେଳେ ନୈରାଶ୍ୟଜନକଭାବେ ଏକ ବଲ୍ ତାଙ୍କ ପଛପଟକୁ ମାରି ଦେଇଥିଲେ। ମାତ୍ର ଦୁର୍ଭାଗ୍ୟଜନକଭାବେ ତାହା ଲାଇନ୍ ଜଜ୍ଙ୍କ ତଣ୍ଟିରେ ବାଜିଥିଲା ଏବଂ ସେ ତଳେ ପଡ଼ି ଯାଇଥିଲେ। ଜୋକୋଭିଚ୍ ଲାଇନ୍ ଜଜ୍ଙ୍କ ନିକଟକୁ ଯାଇ ସ୍ବାସ୍ଥାବସ୍ଥା ପଚାରି ବୁଝିଥିଲେ। ଏହାପରେ ନେଟ୍ ନିକଟରେ ଟୁର୍ନାମେଣ୍ଟ ରେଫରି ସୋରେନ ଫ୍ରିମେଲ, ଗ୍ରାଣ୍ଡସ୍ଲାମ ସୁପରଭାଇଜର ଆନ୍ଦ୍ରିଆସ ଏଗ୍ଲି ଓ ଚେୟାର ଅମ୍ପାୟର ଉରେଲି ଟର୍ଟ ଓ ଜୋକୋଭିଚ୍ଙ୍କ ମଧ୍ୟରେ ପାଖାପାଖି ୧୦ ମିନିଟ ଆଲୋଚନା ହୋଇଥିଲା। ସେ ଜାଣିଶୁଣି ଲାଇନ୍ ଅମ୍ପାୟରଙ୍କୁ ଆଘାତ ଦେଇ ନ ଥିଲେ ବୋଲି ଜୋକୋଭିଜ୍ ପ୍ରକାଶ କରିଥିଲେ। ମ୍ୟାଚରେ ପଛୁଆ ରହିଥିବାରୁ ସେ ରାଗିଯାଇ ମାରିଥିବା ବଲ୍ ଜଜ୍ଙ୍କ ଦେହରେ ବାଜିଥିଲା ସତ, ମାତ୍ର ଏହା ତାଙ୍କର ଉଦ୍ଦେଶ୍ୟ ନ ଥିଲା ବୋଲି ଜୋକୋଭିଚ୍ ସଫେଇ ଦେଇଥିଲେ। ତେଣୁ ତାଙ୍କୁ ଟୁର୍ନାମେଣ୍ଟରୁ ବିଦା କରା ନ ଯାଉ ବୋଲି କହିଥିଲେ। ମାତ୍ର ଫ୍ରିମେଲଙ୍କ ମତରେ ଜୋକୋଭିଚ୍ ଜାଣିଶୁଣି ଏପରି କରି ନ ଥିବା ସତ, ମାତ୍ର ତାଙ୍କ ବଲ୍ ଅମ୍ପାୟରଙ୍କ ଦେହରେ ବାଜିଛି ଏବଂ ସେ ଆଘାତ ହୋଇଛନ୍ତି ଏହା ମଧ୍ୟ ସ୍ପଷ୍ଟ। ତେଣୁ ଜୋକୋଭିଚ୍ଙ୍କୁ ଦଣ୍ଡିତ କରାଯାଇଥିଲା ଏବଂ ସେ ବୁଷ୍ଟାଙ୍କ ସହ କରମର୍ଦ୍ଦନ କରି କୋର୍ଟ ଛାଡ଼ିଥିଲେ। କୋର୍ଟ ଛାଡ଼ିବାବେଳେ ଜୋକୋଭିଚ୍ ଗଣମାଧ୍ୟମ ପ୍ରତିନିଧିଙ୍କୁ କିଛି କହି ନ ଥିଲେ ହେଁ ଏହାର ଏକ ଘଣ୍ଟା ପରେ ସୋସିଆଲ ମିଡିଆ ମାଧ୍ୟମରେ କ୍ଷମାପ୍ରାର୍ଥନା କରିଥିଲେ।