ବେଲଗ୍ରେଡ, ୨୭।୫: ଟୋକିଓ ଅଲିମ୍ପିକ୍ସରେ ଖେଳିବା ଲାଗି ସର୍ତ୍ତ ରଖିଛନ୍ତି ବିଶ୍ୱର ନମ୍ବର ଓ୍ବାନ୍ ପୁରୁଷ ସିଙ୍ଗଲ୍ସ ଟେନିସ ଖେଳାଳି ନୋଭାକ ଜୋକୋଭିଚ୍। ଫ୍ୟାନ୍ସଙ୍କୁ ଷ୍ଟାଡିୟମରେ ଏଣ୍ଟ୍ରି ମିଳିଲେ ହିଁ ଅଲିମ୍ପିକ୍ସରେ ଭାଗନେବେ ବୋଲି ଜଣାଇ ଦେଇଛନ୍ତି। ଟୋକିଓ ଅଲିମ୍ପିକ୍ସ ଖାଲି ଷ୍ଟାଡିୟମରେ ଆୟୋଜିତ ହେବାର ସମ୍ଭାବନା ସୃଷ୍ଟି ହେବା ପରେ ଏଭଳି ପତିକ୍ରିୟା ରଖିଛନ୍ତି ସର୍ବିଆନ ଖେଳାଳି।
”ଫ୍ୟାନ୍ସଙ୍କୁ ଅନୁମତି ମିଳିଲେ ହିଁ ମୁଁ ଅଲିକ୍ସିକ୍ସରେ ଖେଳିବି। ନହେଲେ ଭାଗନେବା ସମ୍ପର୍କରେ ଦୁଇ ଥର ଚିନ୍ତା କରିବି “ ବୋଲି ଜୋକୋଭିଚ୍ ଗୁରୁବାର ଖବରଦାତା ସମ୍ମିଳନୀରେ କହିଛନ୍ତି।
ତେବେ ଅଲିମ୍ପିକ୍ସରେ ଖେଳିବା ନେଇ ଅନିଶ୍ଚିତତାରେ ଥିବା ପ୍ରକାଶ କରିବାରେ ଜୋକୋଭିଚ୍ ପ୍ରଥମ ଟେନିସ ଷ୍ଟାର ନୁହନ୍ତି। ତାଙ୍କ ପୂର୍ବରୁ ରାଫାଲ ନାଡାଲ ଓ ସେରେନା ଓ୍ବିଲିୟମ୍ସ ମଧ୍ୟ କ୍ରୀଡ଼ା ମହାକୁମ୍ବରେ ଭାଗନେବା ନେଇ ଦ୍ୱନ୍ଦ୍ୱରେ ରହିଥିବା ପ୍ରକାଶ କରିଥିଲେ। ଏପରି କି ଜାପାନିଜ ଷ୍ଟାର ନାଓମି ଓସାକା ଓ କେଇ ନିଶିକୋରୀ ଅଲିମ୍ପିକ୍ସ ଆୟୋଜନ ସମ୍ପର୍କରେ ଚିନ୍ତା ପ୍ରକଟ କରିଛନ୍ତି।
