![](https://www.dharitri.com/wp-content/uploads/2020/09/n-4-24.jpg)
ନୂଆଦିଲ୍ଲୀ, ୨୮।୯: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ୨୦୧୯ ମେ ୩୦ରେ ଶପଥ ନେଇଥିଲେ। ଇତିମଧ୍ୟରେ ଦ୍ୱିତୀୟ କାର୍ଯ୍ୟକାଳର ୧୬ ମାସ ବିତିଛି। ତେବେ ବର୍ତ୍ତମାନ ସୁଦ୍ଧା କ୍ୟାବିନେଟ୍ ସମ୍ପ୍ରସାରଣ ହୋଇନି। ପ୍ରଥମ କାର୍ଯ୍ୟକାଳରେ ୬ ମାସ ମଧ୍ୟରେ କ୍ୟାବିନେଟ୍ରେ ଅଦଳବଦଳ ହୋଇଥିଲା। ଭାଜପା ସଦସ୍ୟଙ୍କ ଅନୁସାରେ ଶୀଘ୍ର ମନ୍ତ୍ରିମଣ୍ଡଳର ସମ୍ପ୍ରସାରଣ କରାଯିବ। ମାତ୍ର କେତେକଙ୍କ ମତରେ ବିହାର ବିଧାନସଭା ନିର୍ବାଚନ ପରେ ଏହା ହୋଇପାରେ। ନଭେମ୍ବର ୧୦ ପରେ ମୋଦିଙ୍କ କ୍ୟାବିନେଟ୍ରେ ସମ୍ପ୍ରସାରଣ କରାଯିବାର ସମ୍ଭାବନା ନେଇ ଚର୍ଚ୍ଚା ହେଉଛି। ଗୋଟିଏ ବର୍ଷ ମଧ୍ୟରେ ମନ୍ତ୍ରିମଣ୍ଡଳରେ ୩ ପଦବୀ ଖାଲି ହୋଇଯାଇଛି। ୨୦୧୯ ନଭେମ୍ବରରେ ଏନ୍ଡ଼ିଏ ସହିତ ସମ୍ପର୍କ ତୁଟିବା ପରେ ଶିବସେନା ସଦସ୍ୟ ଅରବିନ୍ଦ ସାଓ୍ବନ୍ତ ଭାରି ଶିଳ୍ପ ମନ୍ତ୍ରୀ ପଦରୁ ଇସ୍ତଫା ଦେଇଥିଲେ। ସେହିପରି କୃଷି ବିଧେୟକକୁ ବିରୋଧ କରି ଶିରୋମଣି ଅକାଳୀ ଦଳରୁ କେନ୍ଦ୍ରୀୟ ମନ୍ତ୍ରୀ ହୋଇଥିବା ହରସିମରତ୍ କୌର ୨୦୨୦ ସେପ୍ଟେମ୍ବର ୧୭ରେ ଇସ୍ତଫା ଦେଇଛନ୍ତି। ସେହିପରି ସେପ୍ଟେମ୍ବର ୨୩ରେ ରେଳ ରାଷ୍ଟ୍ରମନ୍ତ୍ରୀ ସୁରେଶ ଅଙ୍ଗାଡ଼ିଙ୍କର କରୋନା ସଂକ୍ରମଣରେ ପରଲୋକ ହୋଇଛି। ନିୟମ ଅନୁସାରେ ଲୋକସଭାର ମୋଟ ସଦସ୍ୟ ସଂଖ୍ୟାର ୧୫ ପ୍ରତିଶତ ମନ୍ତ୍ରୀ ଭାବେ କେନ୍ଦ୍ର ସରକାରରେ ସାମିଲ୍ ହୋଇ ପାରିବେ। ଅର୍ଥାତ୍ ସର୍ବାଧିକ ମନ୍ତ୍ରୀଙ୍କ ସଂଖ୍ୟା ୮୧ ହୋଇପାରିବ। ତେବେ ମୋଦି ‘ମିନିମମ୍ ଗଭର୍ନମେଣ୍ଟ୍, ମାକ୍ସିମମ୍ ଗଭର୍ନେସ୍’ ଉପରେ ଗୁରୁତ୍ୱ ଦେଉଛନ୍ତି। ନିଜର ପ୍ରଥମ କାର୍ଯ୍ୟକାଳରେ ମୋଦି ସର୍ବାଧିକ ୭୦ ମନ୍ତ୍ରୀଙ୍କ ସହିତ କାମ କରିଥିଲେ। ଦ୍ୱିତୀୟ କାର୍ଯ୍ୟକାଳରେ ମୋଦି ୫୭ ମନ୍ତ୍ରୀଙ୍କ ସହିତ କାମ ଆରମ୍ଭ କରିଥିଲେ। ସେଥିମଧ୍ୟରେ ୨୪ କ୍ୟାବିନେଟ୍, ୯ ସ୍ବତନ୍ତ୍ର ରାଷ୍ଟ୍ରମନ୍ତ୍ରୀ ଏବଂ ୨୪ ରାଷ୍ଟ୍ରମନ୍ତ୍ରୀ ଥିଲେ। ଏବେ ୩ ମନ୍ତ୍ରୀଙ୍କ ପଦ ଖାଲି ହେବାପରେ ମନ୍ତ୍ରୀ ସଂଖ୍ୟା ୫୪କୁ କମି ଆସିଛି। ଭାଜପା ସଂଗଠନ ଛାଡ଼ିଥିବା କେତେକ ନୂଆ ନେତାଙ୍କୁ ସମ୍ପ୍ରସାରଣରେ ସ୍ଥାନ ମିଳିବ ବୋଲି ଚର୍ଚ୍ଚା ହେଉଛି।