ଭାଗ୍ୟ କାହାକୁ ନେଇ କେତେବେଳେ କେଉଁଠି ଠିଆ କରିଦେବ କହିହୁଏ ନାହିଁ। ଆଜି ଯେ ଧନୀ କାଲି ସେ ଗରିବ। ଆଉ ଆଜି ଯେ ଗରିବ କାଲି ସେ କୋଟିପତି। ଏମିତି ଏକ ସତ୍ୟ ଘଟଣା ଦେଖିବାକୁ ମିଳିଛି କେରଳରେ।
କେରଳର ଏକ ନିପଟ ମଫସଲ ଗାଁରେ ଜନ୍ମ ହୋଇଥିବା ମୁସ୍ତାଫା ପିସିଙ୍କ କାହାଣୀ ଶୁଣିଲେ ପ୍ରଶଂସା କରିବେ। ମୁସ୍ତାଫାଙ୍କ ପିତା ଜଣେ ଦିନ ମଜୁରିଆ ଥିଲେ। ନିଜେ ବି ଅଶିକ୍ଷିତ ଥିଲେ। କିନ୍ତୁ ପିଲାଙ୍କୁ ଉଚ୍ଚ ଶିକ୍ଷିତ କରିବା ପାଇଁ ସ୍ବପ୍ନ ଦେଖୁଥିଲେ। ପାଖରେ ଅର୍ଥ ନ ଥିବାରୁ ତାଙ୍କ ପୁଅ ମୁସ୍ତାଫା ୬ଷ୍ଠ ଶ୍ରେଣୀରୁ ପାଠପଢ଼ା ଛାଡ଼ି ଦେଇଥିଲେ। ଜଣେ ଶିକ୍ଷକ କହିବାରୁ ସେ ସ୍କୁଲ ଗଲେ। ଏବେ ସେ ଏକ କମ୍ପାନୀର ୭୩୦ କୋଟି ଟଙ୍କାର ମାଲିକ।
ଏକ ସାକ୍ଷାତକାରରେ ମୁସ୍ତାଫା କହିଛନ୍ତି, ମୁଁ ୧୦ ଟଙ୍କାରେ ପ୍ରତିଦିନ ପାହାଡ଼ରୁ ପଥରଫଟା କାମ କରୁଥିଲି। ଦିନକୁ ୩ ଥର ଖାଇବା ଆମ ପକ୍ଷେ କଷ୍ଟକର ଥିଲା। ବର୍ତ୍ତମାନ ସମୟରେ ଖାଦ୍ୟ, ଶିକ୍ଷା ଅଧିକ ମହତ୍ତ୍ୱପୂର୍ଣ୍ଣ। ଏହାକୁ ଉପଲବ୍ଧ କରି ଏକ ଖାଦ୍ୟ ସାମଗ୍ରୀ ବ୍ୟବସାୟ ଆରମ୍ଭ କରିଛି। ଯେଉଁଟା ଏକ ବଡ଼ କମ୍ପାନୀ। ଯାହାର ନାମ ଆଇଡି ଫ୍ରେଶ ଫୁଡ୍ । ଏହା ଦେଶର ସଫଳ କମ୍ପାନୀ ମଧ୍ୟରୁ ଗୋଟିଏ। ଯାହାର ବ୍ୟବସାୟ ୭୩୦ କୋଟି।
ଆଇଡି ଫ୍ରେଶ୍ ଫୁଡ୍ର ସିଇଓ ମୁସ୍ତାଫା ପିସି କହିଛନ୍ତି, ଅର୍ଥ ନ ଥିବାରୁ ମୁଁ ଯେତେବେଳେ ସ୍କୁଲ ଛାଡ଼ିଲି ମୋର ଜଣେ ଶିକ୍ଷକ ମୋତେ ସ୍କୁଲ ଆସିବାକୁ କହିଥିଲେ। ସେତେବେଳେ ମୁଁ ମନା କରିଥିଲି। ମାତ୍ର ଶିକ୍ଷକ ମୋତେ ବାଧ୍ୟ କଲେ ଆଉ କହିଲେ ମାଗଣାରେ ପଢ଼ାଇବେ। ସେହିଦିନଠାରୁ ମୁଁ ପୁଣି ସ୍କୁଲ ଗଲି। ମୋର ଗଣିତ ବହୁତ ଭଲ ହେଉଥିଲା। ଏପରିକି ସ୍କୁଲ ଟପ୍ପର ବି ହୋଇଥିଲି। ଯେତେବେଳେ କଲେଜ ଯିବାର ସମୟ ଆସିଲା ମୋ ଶିକ୍ଷକ ମୋତେ ଦେୟ ପ୍ରଦାନ କରିଥିଲେ। ପାଠପଢ଼ା ସରିବା ପରେ ଏକ ଚାକିରି ଆରମ୍ଭ କରିଥିଲି। ମୋର ପ୍ରଥମ ଦରମା ଥିଲା ୧୪୦୦୦ ଟଙ୍କା। ମୁଁ ଏହା ମୋ ବାପାଙ୍କୁ ଦେଇଥିଲି। ଏହି ସମୟରେ ମୋ ବାପା ବହୁତ କାନ୍ଦିଥିଲେ। କହିଲେ ମୋ ଜୀବନକାଳନ ମଧ୍ୟରେ ମୁଁ ଏତିକି ଟଙ୍କା ରୋଜଗାର କରିନି। ଯାହା ତୁ ଆଜି ମୋତେ ଦେଲୁ। ମୁସ୍ତାଫା ବିଦେଶରେ ଚାକିରି ପାଇଲେ। ଏହା ପରେ ସେ ତାଙ୍କ ବାପା ଋଣ କରିଥିବା ୨ ଲକ୍ଷ ଟଙ୍କା ଶୁଝି ଦେଲେ। ଭଲ ଅର୍ଥ ରୋଜଗାର ପରେ ନିଜେ ଏକ ବ୍ୟବସାୟ କରିବାକୁ ଇଚ୍ଛା କଲେ। ଯାହା ଆଜି ତାଙ୍କୁ ଏହି ସଫଳତା ଆଣି ଦେଇଛି।