ଭବାନୀପାଟଣା,୪ା୪(ଉତ୍ତମ କୁମାର ଦାଶ): ଭାରତୀୟ ଧର୍ମ ଓ ସଂସ୍କୃତିର ପ୍ରବହମାନ ଧାରାରେ ଶିବ ଉପାସନା ବହୁ ପ୍ରାଚୀନ। ଫଳସ୍ବରୂପ ଗାଁଠାରୁ ସହରଯାଏ ସୋମବାର ଦିନଟିକୁ ମହାପ୍ରଭୁ ଶିବଙ୍କ ବାର ବୋଲି ଲୋକେ ମାନି ଚଳିଆସୁଛନ୍ତି। ଏହି ଦିନ ଅଧିକାଂଶ ପରିବାରରେ ଆମିଷ ଭୋଜନକୁ ବାରଣ କରାଯାଇଥାଏ। ପରିବାରର ଶିଶୁଠାରୁ ବୟସ୍କ ପର୍ଯ୍ୟନ୍ତ ସୋମବାର ଆମିଷଠାରୁ ଦୂରେଇ ରୁହନ୍ତି। କିନ୍ତୁ ଭାଜପାର ଡବଲ ଇଞ୍ଜିନ ସରକାର ତାହାକୁ ଯେମିତି ଭୁଲିଗଲେଣି। ଏହି ପରିପ୍ରେକ୍ଷୀରେ ବିଦ୍ୟାଳୟର ଛାତ୍ରୀଛାତ୍ରଙ୍କୁ ପୁଷ୍ଟିକର ଲଡୁ ଓ ଅଣ୍ଡା ଯୋଗାଇବାକୁ ଯାଇ ସରକାର ସୋମବାର ଅଣ୍ଡା ଖାଇବା ବ୍ୟବସ୍ଥା ହାତକୁ ନେଇଛନ୍ତି। ଏହାକୁ ନେଇ ବିଭିନ୍ନ ମହଲରେ ଚର୍ଚ୍ଚା ଚାଲିଛି। ଶିଶୁ ଅବସ୍ଥାରୁ ଶୈବଧର୍ମର ସବୁ ସିଦ୍ଧାନ୍ତକୁ ଭୁଲିଯିବା ରାସ୍ତାରେ ଛାତ୍ରଗୋଷ୍ଠୀଙ୍କୁ ନେବାର ଏହା କି ପ୍ରକାର ନିଷ୍ପତ୍ତି ବୋଲି ଆଲୋଚନା ହେଉଛି। ବିଦ୍ୟାଳୟରେ ପ୍ରତି ସପ୍ତାହରେ ଦୁଇଥର ଅଣ୍ଡା ଦିଆଯାଉଥିଲା। ଏବେ ସୋମବାର ଦିନକୁ ଯୋଡ଼ାଯାଇଛି। ସୋମବାର, ବୁଧବାର ଓ ଶୁକ୍ରବାର ଅଣ୍ଡା ଏବଂ ମଙ୍ଗଳବାର, ଗୁରୁବାର ଓ ଶନିବାର ମାଣ୍ଡିଆରେ ପ୍ରସ୍ତୁତ ପୋଷଣଯୁକ୍ତ ଲଡୁକୁ ଶିଶୁ ବାଟିକାଠାରୁ ଦଶମ ଶ୍ରେଣୀ ପର୍ଯ୍ୟନ୍ତ ଛାତ୍ରୀଛାତ୍ରଙ୍କୁ ଦିଆଯିବ। ପ୍ରଧାନମନ୍ତ୍ରୀ ପୋଷଣ ଯୋଜନା ଅଧୀନରେ ୩ଟି ଲେଖାଏ ଲଡୁ ଓ ଅଣ୍ଡା ପ୍ରଦାନ କରାଯିବ। ଏ ନେଇ ପ୍ରଧାନମନ୍ତ୍ରୀ ପୋଷଣ ରାଜ୍ୟ ନୋଡାଲ ଅଧିକାରୀ ଗିରୀଶ ଚନ୍ଦ୍ର ସିଂହ ସମସ୍ତ ଜିଲାପାଳଙ୍କୁ ଚିଠି ମାଧ୍ୟମରେ ଅବଗତ କରାଇଛନ୍ତି। ତେବେ ପାଚିକା ସହାୟିକାମାନେ ଏହି ଲଡୁ ତିଆରି କରିବେ। ଗୋଟିଏ ଲଡୁ ପାଇଁ ଖର୍ଚ୍ଚ ୩ଟଙ୍କା ୫୦ପଇସା ଧାର୍ଯ୍ୟ କରାଯାଇଛି। କିନ୍ତୁ ପ୍ରତି ଲଡୁ ପ୍ରସ୍ତୁତିରେ ମାତ୍ର ୩ଟଙ୍କା ୨୪ ପଇସା ଓ ଲଡୁ ତିଆରି କରିବା ଲାଗି ୨୬ପଇସା ରଖାଯାଇଛି। ମାଣ୍ଡିଆ ଚୁନା, ଗୁଡ଼, ଚିନାବାଦାମ, ଘିଅ, ରାଶି, ଗୁଜରାତି ଓ ଅଳେଇଚ ସମିଶ୍ରଣରେ ପ୍ରସ୍ତୁତି ହେବ। ସକାଳ ପ୍ରାର୍ଥନା ପରେ ଲଡୁ ବଣ୍ଟାଯିବ। ସ୍ଥାନୀୟ ବଜାରରୁ ବିଦ୍ୟାଳୟ ପ୍ରଧାନ ଶିକ୍ଷକ ୧୫ଦିନିଆ ଭିତ୍ତିରେ ଲଡୁ ପାଇଁ ସମସ୍ତ ସାମଗ୍ରୀ କିଣି ମହଜୁଦ ରଖିବେ। ସରକାରୀ ଓ ଅନୁଦାନପ୍ରାପ୍ତ ବିଦ୍ୟାଳୟରେ ଏହା ନିୟମିତ ଚାଲିବ। ହେଲେ ଏଥିନିମନ୍ତେ ଆର୍ଥିକ ଅନୁଦାନ କେବେ ଆସିବ ଏବଂ ଶିଶୁ ବାଟିକାରେ ଯୋଡି ହୋଇଥିବା ଛାତ୍ରୀଛାତ୍ରଙ୍କ ପାଇଁ ସ୍ବତନ୍ତ୍ର ଅନୁଦାନ ନେଇ କୌଣସି ସୂଚନା ବିଦ୍ୟାଳୟରେ ପହଞ୍ଚତ୍ନାହିଁ। ସେପଟେ ସମସ୍ତ ବିଦ୍ୟାଳୟରେ ୨୯ତାରିଖରେ ପରୀକ୍ଷା ଫଳ ପ୍ରକାଶ ପାଇବ। ଶିଶୁ ବାଟିକାରେ ପ୍ରବେଶ ଉତ୍ସବ ଏପ୍ରିଲ ୨ରୁ ଆରମ୍ଭ ହୋଇଛି। ସେ ଭିତରେ ପିଏମ୍ ପୋଷଣ କାର୍ଯ୍ୟକ୍ରମକୁ ସୂଚାରୁରୂପେ ସମ୍ପାଦନ କରିବାକୁ ପଡିବ। ଲଡୁର ଗୁଣବତ୍ତା ପରୀକ୍ଷା ନିରୀକ୍ଷା ଦାୟିତ୍ୱ କାହାର ତାହା ଏବେ ପ୍ରଶ୍ନ। ୩ଟଙ୍କା ୨୪ପଇସାର ଲଡୁ ସ୍ବାସ୍ଥ୍ୟଲାଗି କେତେ ଫଳପ୍ରଦ ତାହା ସମୟ କହିବ। ଆସନ୍ତା ସୋମବାରରୁ ପ୍ରଥମଥର ପାଇଁ ଛାତ୍ରୀଛାତ୍ରଙ୍କୁ ଅଣ୍ଡା ଦିଆଯିବ।
