ବାରିପଦା ଅଫିସ,୨୦।୩:ମୟୂରଭଞ୍ଜ ଜିଲା ଶିମିଳିପାଳ ଅଭୟାରଣ୍ୟ ଜଳୁଥିଲା। ନିଅଁାରେ ଜୀବଜନ୍ତୁ ଅତିଷ୍ଠ ହୋଇପଡ଼ିଥିବା ବେଳେ ଲିଭେଇବାକୁ ବନ ବିଭାଗ ନାକେଦମ୍ ହୋଇଥିଲା। ପଶ୍ଚିମା ଝଡ଼ ପ୍ରଭାବରେ ଗତ ଦୁଇଦିନ ଧରି ବର୍ଷା ଫଳରେ ଏହି ଅଭୟାରଣ୍ୟ ନିଅଁାରୁ ମୁକ୍ତି ପାଇଛି। ବନ୍ୟଜନ୍ତୁଙ୍କ ସମେତ ଜୀବଜଗତକୁ ଆଶ୍ୱସ୍ତି ମିଳିଛି। ଦୀର୍ଘ ତିନିମାସ ଧରି ଜଳୁଥିବା ଜଙ୍ଗଲକୁ ସୁରକ୍ଷା ଦେଉଥିବା ବନ କର୍ମଚାରୀ ଖୁସିରେ ଆତ୍ମହରା ହୋଇଛନ୍ତି। ଏହାକୁ ନେଇ ଜଣେ ବନ କର୍ମଚାରୀଙ୍କ ଏକ ଭିଡିଓ ସୋସିଆଲ ମିଡିଆରେ ଭାଇରଲ ହେଉଛି। ଏବେ ବର୍ଷା ହେବାରୁ ଛୁଟି ମିଳିବ କହି ଖୁସି ମନାଇବା ସହ ଭଗବାନଙ୍କୁ ଧନ୍ୟବାଦ ଜଣାଇଛନ୍ତି।
ପ୍ରକାଶ ଯେ, ଶିମିଳିପାଳ ବ୍ୟାଘ୍ର ସଂରକ୍ଷଣ ପ୍ରକଳ୍ପ ଅଧୀନ ୫ ବନଖଣ୍ଡରେ ନିଅଁା ଲାଗିଥିଲା। ତିନିମାସ ମଧ୍ୟରେ ମୋଟ ୧୩୦୪ ସ୍ଥାନରେ ନିଅଁା ଲାଗି ଥିବାବେଳେ କର୍ମଚାରୀମାନେ ଏହାକୁ ରୋକିଥିଲେ। ଅଭୟାରଣ୍ୟରେ ବନାଗ୍ନି ଯୋଗୁ ସମସ୍ତ କର୍ମଚାରୀଙ୍କ ଛୁଟି ବାତିଲ କରାଯିବାରୁ ସେମାନେ ନିରବଚ୍ଛିନ୍ନ ଭାବେ ଦାୟିତ୍ୱ ନିର୍ବାହ କରିଥିଲେ। ନିଅଁାକୁ ପ୍ରଶମିତ କରିବା ପାଇଁ ଶତାଧିକ ବନ କର୍ମଚାରୀ ଓ ସ୍ଥାନୀୟ ଲୋକେ ନିୟୋଜିତ ଥିଲେ। ଶନିବାରଠାରୁ ଜିଲାରେ ବର୍ଷା ଆରମ୍ଭ ହୋଇଛି। ଏଥିସହ ଶିମିଳିପାଳରେ ମଧ୍ୟ ପ୍ରବଳ ବର୍ଷା ହୋଇଛି। ଏହି ବର୍ଷା ଯୋଗୁ ବନାଗ୍ନି ସ୍ଥିତି ଟଳିଥିବା ବେଳେ ନିଅଁା ସମ୍ପୂର୍ଣ୍ଣ ନିୟନ୍ତ୍ରଣ ହୋଇଯାଇଛି। ଏହି ଖୁସିରେ ଆତ୍ମହରା ହୋଇ ବନ କର୍ମଚାରୀ ଜଣକ ନିଜ ମୋବାଇଲରେ ଭିଡିଓ କରିଛନ୍ତି, ଯାହା ଏବେ ଭାଇରାଲ ହୋଇଛି। ଉକ୍ତ ବନ କର୍ମଚାରୀ ହେଲେ ବାଙ୍ଗିରିପୋଷି ରେଞ୍ଜ୍ର ରଙ୍ଗାମାଟିଆ ବିଟ୍ର ବନରକ୍ଷୀ ସାମାୟ ସୋରେନ। ଜଙ୍ଗଲରେ ନିଅଁା ଲାଗିବା ଫଳରେ ଦୀର୍ଘଦିନ ହେଲା ନିଅଁା ଲିଭାଇବା କାର୍ଯ୍ୟରେ ନିୟୋଜିତ ଥିଲେ। ଛୁଟି ନ ମିଳିବାରୁ ସେ ଘରକୁ ଯାଇ ନ ଥିଲେ। ଠାକୁରଙ୍କ ଦୟାରୁ ବର୍ଷା ହେବା ଦ୍ୱାରା ସ୍ଥିତି ଟଳି ଥିବାରୁ ଏବେ ଛୁଟି ମିଳିବ ଆଶା କରୁଛି। ଦୁଇଦିନ ଛୁଟି ମିଳିଲେ ପରିବାର ସହ ଦେଖା କରିଆସନ୍ତେ ବୋଲି ସେ କହିଛନ୍ତି। ସେ ଛୁଟି ନେଇ ଘରକୁ ଯାଇପାରିବେ ବୋଲି ଖୁସିରେ ଆତ୍ମହରା ହୋଇ ବର୍ଷାରେ ଭିଜି ଭିଜି ମୋବାଇଲରେ ନିଜେ ଭିଡିଓ ଉତ୍ତୋଳନ କରିଛନ୍ତି।
