ଭୁବନେଶ୍ୱର,୨୭।୧୨: ଦେଶର ବିକାଶ ପାଇଁ ସରକାର ଅନେକ ଯୋଜନା କରୁଛନ୍ତି ହେଲେ ଉକ୍ତ ଯୋଜନାର ଠିକ୍ ପରିଚାଳନାର ଅଭାବ ଯୋଗୁ ବାସ୍ତବ ଆଭିମୁଖ୍ୟ ଓ ପ୍ରକୃତ ଲାଭ ହିତାଧିକାରୀ ପାଇପାରୁ ନାହାନ୍ତି। ବିଶେଷକରି କେନ୍ଦ୍ର ସରକାରଙ୍କ ସୂକ୍ଷ୍ମ, ଲଘୁ ଓ ମଧ୍ୟମ ଉଦ୍ୟୋଗ (ଏମ୍ଏସ୍ଏମ୍ଇ) ମନ୍ତ୍ରଣାଳୟର ଅଂଶୀଦାର ସଂସ୍ଥା ଜାତୀୟ କ୍ଷୁଦ୍ର ଶିଳ୍ପ ନିଗମ ଲିମିଟେଡ ଏନଏସ୍ଆଇସି ଅଧୀନରେ କାର୍ଯ୍ୟ କରୁଥିବା ଜାତୀୟ ଏସସି-ଏସଟି ହବ୍ (ଏନ୍ଏସ୍ଏସ୍ଏଚ) ପକ୍ଷରୁ ମଙ୍ଗଳବାର ଏକ ରାଜ୍ୟ ସ୍ତରୀୟ କର୍ମଶାଳା ଓ ପ୍ରଦର୍ଶନୀ ମୟୂରଭଞ୍ଜର ଶହୀଦ ସ୍ମୃତି ଭବନ,ମେହେର କଲୋନୀ, ବାରିପଦାଠାରେ ଆୟୋଜନ କରାଯାଇଛି। ଉକ୍ତ କର୍ମଶାଳା ଓ ପ୍ରଦର୍ଶନୀରେ କେନ୍ଦ୍ର ସରକାରଙ୍କ ଅଧୀନରେ ଥିବା ବିଭିନ୍ନ ରାଷ୍ଟ୍ରାୟତ୍ତ କମ୍ପାନୀ ଓ ବ୍ୟାଙ୍କଗୁଡିକ ମଧ୍ୟ ଉକ୍ତ କର୍ମଶାଳା ଓ ପ୍ରଦର୍ଶନୀରେ ଅଂଶଗ୍ରହଣ କରୁଛନ୍ତି। ଫଳରେ ରାଜ୍ୟରେ ବସବାସ କରୁଥିବା ଏସ୍ସି-ଏସ୍ଟି ବର୍ଗର ଲୋକଙ୍କ ସମେତ ସାଧାରଣ ଲୋକ ମଧ୍ୟ ଉକ୍ତ କର୍ମଶାଳାରେ ସାମିଲ ହୋଇ ସରକାର ଓ ଏନ୍ଏସ୍ଏସ୍ଏଚ୍ ଦ୍ୱାରା ପ୍ରଦାନ ବିଭିନ୍ନ ସେବା ଓ ସୁବିଧା ସମ୍ପର୍କରେ ଅବଗତ ହେବା ସହ ଉକ୍ତ ଯୋଜନାର ଲାଭ ଉଠାଇବାକୁ କୁହାଯାଇଛି। ଏପରିକି ସୋମବାର ଭୁବନେଶ୍ୱର ମାଷ୍ଟର କ୍ୟାଣ୍ଟିନସ୍ଥିତ ପ୍ରେସ କ୍ଲବ ପରିସରରେ ଏନ୍ଏସ୍ଏସ୍ଏଚ୍ ପକ୍ଷରୁ ଆୟୋଜିତ ଏକ ଖବରଦାତା ସମ୍ମିଳନୀରେ କାର୍ଯ୍ୟକ୍ରମର ଆଭିମୁଖ୍ୟ ଓ ଏନ୍ଏସ୍ଏସ୍ଏଚ୍ର ବିଭିନ୍ନ ଲାଭକାରୀ ଯୋଜନାର ଲାଭ ଉଠାଇବାକୁ ଏନଏସଆଇସିର ମହାପ୍ରବନ୍ଧକ-ଏସଜି (ଏନ୍ଏସ୍ଏସ୍ଏଚ୍) କେ.କେ. ଶର୍ମା ବିସ୍ତୃତ ସୂଚନା ପ୍ରଦାନ କରିଥିଲେ। ଅନ୍ୟମାନଙ୍କ ମଧ୍ୟରେ ଏନ୍ଏସ୍ଏସ୍ଏଚ୍ର ବହୁ ବରିଷ୍ଠ ଅଧିକାରୀ ଓ ଅନ୍ୟମାନେ ଉପସ୍ଥିତ ଥିଲେ।
