ନୂଆଦିଲ୍ଲୀ, ୮।୧୧: ନ୍ୟାସନାଲ ଟେଷ୍ଟିଂ ଏଜେନ୍ସି(ଏନଟିଏ) ଜେଇଇ ମେନ୍ ୨୦୨୪ ପରୀକ୍ଷା ପାଇଁ ଆବେଦନ ପ୍ରକ୍ରିୟା ଆରମ୍ଭ କରିଦେଇଛି। ଇଞ୍ଜିନିଅରିଂ ପାଠ ପଢିବାକୁ ଚାହୁଁଥିବା ଆଶାୟୀ ବିଦ୍ୟାର୍ଥିମାନେ ଅଫିସିଆଲ ୱେବସାଇଟ jeemain.nta.ac.in ରେ ଯାଇ ଆବେଦନ କରିପାରିବେ। ନଭେମ୍ବର ୩୦ ପର୍ଯ୍ୟନ୍ତ ଆବେଦନ ପ୍ରକ୍ରିୟା ଚାଲିବ। ଏହାରି ମଧ୍ୟରେ ଏନଟିଏ ପରୀକ୍ଷା ସମୟସୂଚୀ ସହିତ ଯୋଗ୍ୟତା ମାନଦଣ୍ଡ ମଧ୍ୟ ପ୍ରକାଶ କରିଛି।
ଏହି ନୂତନ ମାନଦଣ୍ଡ ଅନୁଯାୟୀ ଏନଆଇଟି, ଆଇଆଇଟି ଏବଂ ଅନ୍ୟାନ୍ୟ ସିଏଫଟିଆଇରେ ନାମ ଲେଖାଇବା ପାଇଁ ଯେଉଁ ବିଦ୍ୟାର୍ଥୀମାନେ ଯୋଗ୍ୟତା ହାସଲ କରୁଛନ୍ତି ସେମାନଙ୍କୁ ଜେଇଇ ର୍ୟାଙ୍କ ଅନୁଯାୟୀ ପ୍ରବେଶ ମିଳିଥାଏ। ଏହା ବ୍ୟତୀତ ଏହି ଯୋଗ୍ୟ ବିଦ୍ୟାର୍ଥୀ ମାନଙ୍କୁ ଯୁକ୍ତ ଦୁଇରେ ଅତି କମରେ ୭୫ ପ୍ରତିଶତ ମାର୍କ ରଖଵାକୁ ପଡିବ କିମ୍ବା ଶୀର୍ଷରେ ରହିବାକୁ ପଡିବ। ସେହିଭଳି ପରୀକ୍ଷାରେ ଏସସି/ଏସଟି ବିଦ୍ୟାର୍ଥୀ ମାନଙ୍କ ପାଇଁ ଯୁକ୍ତ ଦୁଇରେ ଅତି କମରେ ୬୫ ପ୍ରତିଶତ ମାର୍କ ରଖିବା ଜରୁରୀ।
୨୦୨୦ ମସିହାରେ କରୋନା ମହାମାରୀ ହେତୁ ଗତ ତିନି ବର୍ଷରେ ଯୋଗ୍ୟତା ମାନଦଣ୍ଡ ହଟାଯାଇଥିଲା, କିନ୍ତୁ ଏହା ୨୦୨୩ ବ୍ୟାଚ୍ ପାଇଁ ପୁନଃସ୍ଥାପିତ ହୋଇଥିଲା। ତେବେ ଗତ ବର୍ଷ ୭୫ ପ୍ରତିଶତ ଯୋଗ୍ୟତା ମାନଦଣ୍ଡକୁ ନେଇ ବିବାଦ ସୃଷ୍ଟି ହୋଇଥିଲା। ଏହାର କାରଣ ହେଉଛି ଯେ ଜେଇଇ ମେନ୍ ୨୦୨୩ ପରୀକ୍ଷାରେ ଉପସ୍ଥିତ ଥିବା ଛାତ୍ରମାନେ ଦାବି କରିଥିଲେ ଯେ ଯୋଗ୍ୟତା ମାନଦଣ୍ଡ ଏନଟିଏ ଦ୍ୱାରା କୌଣସି ପୂର୍ବ ସୂଚନା ବିନା ପୁଣି ଲାଗୁ ହୋଇଛି, ଯାହା ଛାତ୍ରମାନଙ୍କ ପାଇଁ ସମସ୍ୟା ସୃଷ୍ଟି କରିଥିଲା। ବିଶେଷକରି ସେହି ଛାତ୍ରମାନେ ଯେଉଁମାନେ ଦ୍ୱାଦଶ ଶ୍ରେଣୀ ପରୀକ୍ଷାରେ ୭୫ ପ୍ରତିଶତ ମାର୍କ ହାସଲ କରିବାରେ ବିଫଳ ହୋଇଥିଲେ ଏବଂ ଯେଉଁମାନଙ୍କ ପାଇଁ ଏହା ୨୦୨୩ ରେ ପ୍ରବେଶ ପରୀକ୍ଷାରେ ହାଜର ହେବାର ଶେଷ ସୁଯୋଗ ଥିଲା।