ନୂଆଦିଲ୍ଲୀ,୨୯।୪: ଦେଶରେ ପୁଣି ଥରେ କରୋନା ପ୍ରକୋପ ବୃଦ୍ଧି ପାଇବାରେ ଲାଗିଛି। ଗତ କିଛି ଦିନ ହେଲା ହଜାରେରୁ ଉର୍ଦ୍ଧ୍ୱ ଆକ୍ରାନ୍ତ ଚିହ୍ନଟ ହେଉଥିବା ବେଳେ ଶୁକ୍ରବାର ୩ହଜାରରୁ ଊର୍ଦ୍ଧ୍ୱ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି। କଟକଣା କୋହଳ ହେବା ପରେ ସମସ୍ତ ରାଜ୍ୟରେ ସ୍କୁଲ ଖୋଲିଥିବା ବେଳେ ଏବେ ପୁଣି କରୋନା ଚିନ୍ତା ବଢ଼ାଇଦେଇଛି। ତେବେ ପିଲାଙ୍କ ଟିକାକରଣକୁ ତ୍ୱରାନିତ୍ୱ କରିବା ଲାଗି ସରକାର ବିଭିନ୍ନ ପ୍ରକ୍ରିୟା ଆରମ୍ଭ କରିଦେଇଛନ୍ତି। ଇତିମଧ୍ୟରେ ପିଲାମାନଙ୍କର ଟିକାକରଣ ସହ ଜଡିତ ଏକ ବଡ ଖବର ସାମ୍ନାକୁ ଆସିଛି। ଜାତୀୟ ବୈଷୟିକ ପରାମର୍ଶଦାତା ଗୋଷ୍ଠୀ (ଏନ୍ଟିଏଜିଆଇ) ୧୨ରୁ ୧୭ ବର୍ଷ ବୟସ ପିଲାଙ୍କ ପାଇଁ ସେରମ୍ ଇନ୍ଷ୍ଟିଚ୍ୟୁଟ ଅଫ୍ ଇଣ୍ଡିଆର କରୋନା ଟିକା କୋଭୋଭାକ୍ସକୁ ଅନୁମୋଦନ ପ୍ରଦାନ କରିଛି। ଏହି ଟିକା ଅନୁମୋଦନ ହେବା ପରେ ପିଲାମାନଙ୍କର ଟିକାକରଣ ପାଇଁ ରାସ୍ତା ସହଜ ହେବ। ସୂଚନା ମୁତାବକ ଦେଶରେ ଟିକାକରଣ ଅଭିଯାନ ସହିତ ଜଡିତ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ଉପରେ ଜାତୀୟ ବୈଷୟିକ ପରାମର୍ଶଦାତା ଗୋଷ୍ଠୀ (ଏନ୍ଟିଏଜିଆଇ) ସରକାରଙ୍କୁ ପରାମର୍ଶ ଦେଇଥାଏ। ତେବେ ଏନ୍ଟିଏଜିଆଇର ସୁପାରିଶ ପରେ, ଏହି ପ୍ରସ୍ତାବ ସରକାରଙ୍କ ନିକଟକୁ ଯିବ। ଏହାପରେ ଏହି ଟିକାର ଜରୁରୀକାଳୀନ ବ୍ୟବହାର ପାଇଁ ଡିସିଜିଆଇ ମଞ୍ଜୁରୀ ପ୍ରଦାନ କରିବ। ସୂଚନାଯୋଗ୍ୟ, ଭାରତ ମାର୍ଚ୍ଚ ୧୬ରୁ ୧୨ରୁ ୧୪ ବର୍ଷ ବୟସର ପିଲାମାନଙ୍କର ଟିକାକରଣ ଆରମ୍ଭ କରିଛି। ବାୟୋଲୋଜିକାଲ-ଇ ର କୋର୍ଭେଭାକ୍ସ ଟିକାକୁ ବର୍ତ୍ତମାନ ପିଲାମାନଙ୍କ ଟିକାକରଣରେ ବ୍ୟବହୃତ କରାଯାଉଛି।