ଖଣ୍ଡପଡ଼ା,୨୧ା୧୨(ସ୍ବ.ପ୍ର.): ଖଣ୍ଡପଡ଼ା ଥାନା ଅଧୀନ କଣ୍ଟିଲୋ ଓ ନୂଆଗଡିଆସାହି ଫାଣ୍ଡି ନାନା ସମସ୍ୟା ମଧ୍ୟରେ ଚାଲିଛି ା ବିଭାଗୀୟ ଉଚ୍ଚ କର୍ତ୍ତୃପକ୍ଷଙ୍କ ଉଦାସୀନତା ଏଥିପାଇଁ ଦାୟୀ ବୋଲି ଅଭିଯୋଗ ହେଉଛି ା ଫାଣ୍ଡି ପରିସରରେ ଥିବା ଆଜବେଷ୍ଟସ ଗୃହଗୁଡିକ ଭଙ୍ଗା ଦଦରା ଅବସ୍ଥାରେ ରହିଛି ା ଛାତରେ ବ୍ୟବହୃତ କଢି,ସିଲିଂ ବିପଦସଙ୍କୁଳ ଅବସ୍ଥାରେ ଅଛି ା ବର୍ଷା ଦିନେ ଛାତରୁ ପାଣି ଝରୁଛି ା ଫାଣ୍ଡି ଅଧିକାରୀଙ୍କ ପାଇଁ ଉର୍ଦ୍ଦିଷ୍ଟ କ୍ୱାର୍ଟର୍ସଟି ପୂର୍ବତନ ଫାଣ୍ଡି ଅଧିକାରୀଙ୍କ କବ୍ଜାରେ ଥିବାରୁ ନୂଆ ଫାଣ୍ଡି ଅଧିକାରୀ ଏକ ଘରେ ରହୁଛନ୍ତି ା
ଦୀର୍ଘ ୩୫ ବର୍ଷ ଧରି ଅବ୍ୟବସ୍ଥା ମଧ୍ୟରେ ଚାଲିଛି ଖଣ୍ଡପଡ଼ା ଥାନା ଅଧୀନ ନୂଆଗଡିଆ ସାହି ଫାଣ୍ଡି ା ଏକ ଭଡାଘରେ ଫାଣ୍ଡିଟି ଚାଲିଛି ା କର୍ମଚାରୀମାନେ ମଧ୍ୟ ଆଖପାଖ ଅଞ୍ଚଳରେ ଘର ଭଡାନେଇ ରହୁଛନ୍ତି ା ନୂଆଗଡିଆସାହି ଫାଣ୍ଡିର ନିଜସ୍ବ କାର୍ଯ୍ୟାଳୟ ପ୍ରତିଷ୍ଠା ନିମନ୍ତେ ସ୍ଥାନୀୟ ଅଞ୍ଚଳରେ ସରକାରୀ ଜାଗା ଚିହ୍ନଟ କରାଯିବା ସହ ଏଥି ପାଇଁ ଆବଶ୍ୟକ ଅନୁଦାନ ଅର୍ଥ ମଧ୍ୟ ରାଜ୍ୟ ସରକାରଙ୍କ ପକ୍ଷରୁ ମଞ୍ଜୁର ହୋଇଛି ା ମାତ୍ର ରାଜସ୍ବ ବିଭାଗ ଓ ପୋଲିସ ପ୍ରଶାସନ ମଧ୍ୟରେ ସମନ୍ବୟର ଅଭାବ ଯୋଗୁ ନୂଆଗଡିଆସାହି ଫାଣ୍ଡିର ନୂତନ କାର୍ଯ୍ୟାଳୟ ପ୍ରତିଷ୍ଠା ହୋଇ ପାରୁ ନ ଥିବା ବିଶେଷ ସୁତ୍ରରୁ ଜଣାପଡିଛି ା ଫାଣ୍ଡି କାର୍ଯ୍ୟାଳୟ ପ୍ରତିଷ୍ଠା ନିମନ୍ତେ ପ୍ରସ୍ତାବିତ ସ୍ଥାନକୁ କେତେଜଣ ପ୍ରଭାବଶାଳୀ ବ୍ୟକ୍ତି ଜବରଦଖଲରେ ରଖିଥିବାରୁ ନୂତନ କାର୍ଯ୍ୟାଳୟ ଗୃହ ନିର୍ମାଣରେ ବାଧକ ସାଜିଥିବା ଅଭିଯୋଗ ହେଉଛି ା ଆଦିବାସୀ ଅଧ୍ୟୁଷିତ ତଥା ମାଓବାଦୀ ପ୍ରବଣ ଇଲାକାରେ କାର୍ଯ୍ୟ କରୁଥିବା ଏହି ନୂଆଗଡିଆସାହି ଫାଣ୍ଡିର ବିଭିନ୍ନ ସମସ୍ୟା ପ୍ରତି ବିଭାଗୀୟ ଉଚ୍ଚ କର୍ତ୍ତୃପକ୍ଷ, ନୟାଗଡ଼ ଆରକ୍ଷୀ ଅଧୀକ୍ଷକ ଓ ଜିଲାପାଳ ଦୃଷ୍ଟି ଦେବାକୁ ଅଞ୍ଚଳବାସୀ ଦାବି କରିଛନ୍ତି ା