ଢେଙ୍କାନାଳ ଅଫିସ, ୩୦।୮: ଦୀର୍ଘ ୨ବର୍ଷ ପରେ ମହିମା ଧର୍ମର ପ୍ରମୁଖ ପୀଠ ଯୋରନ୍ଦା ମହିମାଗାଦିରେ ଅନୁଷ୍ଠିତ ହୋଇଛି ସାମୂହିକ ନବାନ୍ନ କାର୍ଯ୍ୟକ୍ରମ। ମାଘମେଳା ପରେ ଏହି ଦ୍ୱିତୀୟ ପ୍ରସଦ୍ଧ ଗଣପର୍ବକୁ ନେଇ ମହିମା ଧର୍ମାବଲମ୍ବୀଙ୍କ ମଧ୍ୟରେ ବିପୁଳ ଉତ୍ସାହ ଦେଖାଦେଇଥିବାବେଳେ ଏଥିରେ ସାମିଲ ହୋଇଥିଲେ ଓଡ଼ିଶା ସମେତ ରାଜ୍ୟ ବାହାରର ସହସ୍ରାଧିକ ସାଧୁସନ୍ଥ।
ନବାନ୍ନ ଉପଲକ୍ଷେ ପ୍ରାତଃ ସମୟରୁ ପୀଠରେ ଆବଶ୍ୟକ ନୀତିକାନ୍ତି ଅନୁଷ୍ଠିତ ହୋଇଥିଲା। ନୂଆ ଧାନରୁ ପ୍ରସ୍ତୁତ ଚୁଡ଼ା, ଗୁଡ଼ ନଡ଼ିଆ, କଦଳୀ, କ୍ଷୀର, ଦହି, କାଜୁ, କିସ୍ମିସ୍, ମହୁ ସମେତ ବିଭିନ୍ନ ପ୍ରକାର ପାଚିଲା ଫଳ ମିଶ୍ରଣରେ ପ୍ରସ୍ତୁତ ହୋଇଥିଲା ନବାନ୍ନ। ୭ଟି ନୂତନ ମାଟିହାଣ୍ଡିରେ ଏହାକୁ ମହିମା ଗୋସାଇଁଙ୍କ ଉଦ୍ଦେଶ୍ୟରେ ଅର୍ପଣ କରାଯାଇଥିଲା। ସାଧୁସନ୍ଥମାନେ ବିଶ୍ୱମଙ୍ଗଳ କାମନା କରିବା ସହ ପୃଥିବୀ ଶସ୍ୟଶ୍ୟାମଳା ହେଉ ବୋଲି ପ୍ରାର୍ଥନା କରିଥିଲେ। ପୂର୍ବାହ୍ନ ୯ଟାରେ ଭିକ୍ଷା ମଣ୍ଡପରେ ସାମୂହିକ ନବାନ୍ନ ଭକ୍ଷଣ କାର୍ଯ୍ୟକ୍ରମର ଆୟୋଜନ କରାଯାଇଥିଲା। ସତ୍ୟ ମହିମା ଧର୍ମଧାମ ପରିଚାଳନା ପରିଷଦର ବାବା ନିତ୍ୟାନନ୍ଦ ଦାସ, ବାବା ଅନାମ ଦାସ, ବାବା ନଟବର ଦାସ ପ୍ରମୁଖ ଏଥିରେ ସାମିଲ ହୋଇଥିଲେ। ସେହିପରି କୌପିନଧାରୀ ମହିମା ସମାଜ ପକ୍ଷରୁ ରଘୁନାଥ ବାବାଙ୍କ ତତ୍ତ୍ୱାବଧାନରେ ନବାନ୍ନ ଉତ୍ସବ ଅନୁଷ୍ଠିତ ହୋଇଥିଲା। କରୁଣାକର ବାବା, ସୁକାନ୍ତ ବାବା, ବୀଣାକାର ବାବା ପ୍ରମୁଖ ସହଯୋଗ କରିଥିଲେ।
ସୂଚନାଯୋଗ୍ୟ, ୧୯୪୨ରୁ ପ୍ରତିବର୍ଷ ଭାଦ୍ରବ ଶୁକ୍ଳପକ୍ଷ ଦ୍ୱିତୀୟା ତିଥିରେ ମହିମା ଗାଦିରେ ନବାନ୍ନ ମହୋତ୍ସବ ପାଳିତ ହୋଇଆସୁଛି। ଆଠଗଡ ଅଞ୍ଚଳର ଭୋଇ ପରିବାର ପକ୍ଷରୁ ଏଥିପାଇଁ ନୂଆ ଚୂଡ଼ା ଯୋଗାଇ ଦିଆଯାଇଥାଏ। କରୋନା କଟକଣା ପାଇଁ ୨ବର୍ଷ ହେଲା ଏହି ଉତ୍ସବ କେବଳ ବିଧି ପାଳନରେ ସୀମିତ ଥିଲା। ଚଳିତ ବର୍ଷ ଭୂତାଣୁ ଆତଙ୍କ ସେତେଟା ନ ଥିବାରୁ ଆନ୍ଧ୍ରପ୍ରଦେଶ, ପଶ୍ଚିମବଙ୍ଗ, ଛତିଶଗଡ଼, ମଧ୍ୟପ୍ରଦେଶ, ଆସାମ ଆଦି ରାଜ୍ୟର ବହୁ ସାଧୁସନ୍ନ୍ୟାସୀଙ୍କ ସମାଗମ ହୋଇଥିଲା।