ସୋନପୁର,୨୦ା୮(ନି.ପ୍ର.): ଗଡଜାତ ପରମ୍ପରା ଅନୁସାରେ ସୋନପୁର ଗଡଜାତ ଓ ପଞ୍ଚରା ଅଞ୍ଚଳର ଜନସାଧାରଣଙ୍କ ପାଇଁ ନୂଆଁଖାଇ ଲଗ୍ନ ଶୁକ୍ରବାର ସନ୍ଧ୍ୟାରେ ସୋନପୁର ଗଡଭିତର ଜଗନ୍ନାଥ ମନ୍ଦିର ପରିସରରେ ଧାର୍ଯ୍ୟ ହୋଇଛି। ଆସନ୍ତା ସେପ୍ଟେମ୍ବର ୧ ତାରିଖ ଭାଦ୍ରବ ଶୁକ୍ଳ ଋଷି ପଞ୍ଚମୀ ଗୁରୁବାର ଦିନ ସମଲେଇ ମନ୍ଦିରରୁ ସ୍ବତନ୍ତ୍ର ଭାବେ ପାହୁର ଶୋଭାଯାତ୍ରା ସକାଳ ୮ଟା ୨୦ମିନଟରୁ ୯ଟା ୨୦ମିନିଟ ମଧ୍ୟରେ ବାହାରିବ। ଏହା ଅଷ୍ଟଚଣ୍ଡୀ ଓ ବଡ ହନୁମାନଙ୍କ ପୀଠକୁ ଯିବ। ସକାଳ ୧୦ଟା ୭ମିନିଟରୁ ୧୦ଟା ୨୧ମିନିଟ ମଧ୍ୟେ ତୁଳା ଲଗ୍ନ ମୀନ ନବାଂଶେ ମହେନ୍ଦ୍ର ବେଳାରେ ଜିଲାର ଅଧିଷ୍ଠାତ୍ରୀ ଦେବୀ ମା’ ସୁରେଶ୍ୱରୀଙ୍କ ଠାରେ ନବାନ୍ନ ଭୋଗ ଲାଗିବ। ଏହାପରେ ଜିଲାବାସୀ ତଥା ପୁରାତନ ଗଡଜାତ ସୋନପୁରବାସୀ ନବାହ୍ନ ଭକ୍ଷଣ କରିବେ। ପଣ୍ଡିତମାନେ ସମବେତ ହୋଇ ଏହି ଲଗ୍ନ ଧାର୍ଯ୍ୟ କରିଛନ୍ତି। ସମସ୍ତଙ୍କ ସମ୍ମତି ହେବା ପରେ ପଣ୍ଡିତଙ୍କ ଦ୍ୱାରା ବିଶେଷ ପୂଜାର୍ଚ୍ଚନା ହୋଇଥିଲା। ଲଗ୍ନ ପତ୍ର ଜଗନ୍ନାଥଙ୍କ ଠାରେ ଅର୍ପଣ କରିବା ସହିତ ପୌର ପରିଷଦ କର୍ତ୍ତୃପକ୍ଷଙ୍କୁ ଜଣାଇ ଦିଆଯାଇଛି। ପୌର ପରିଷଦ ପକ୍ଷରୁ ଏହି ଲଗ୍ନରେ ନବାନ୍ନ ଅର୍ପଣ କରିବାକୁ ଜନସାଧାରଣଙ୍କୁ ଅନୁରୋଧ କରାଯାଇଛି। ପଣ୍ଡିତ ମହାସଭାରେ ଜ୍ୟୋତିର୍ବିଦ୍ ରାଜେନ୍ଦ୍ର କୁମାର ମହାପାତ୍ର, ମହେଶ କୁମାର ପୂଜାରୀ, ରାମଜୀଲାଲ ନେଗୀ, ବୈକୁଣ୍ଠନାଥ ଶତପଥୀ ଓ ଅଚ୍ୟୁତ ପୂଜାହାରୀଙ୍କ ସମେତ ବହୁ ପଣ୍ଡିତ ଲଗ୍ନଧାର୍ଯ୍ୟରେ ସାମିଲ ଥିଲେ। ଏଥିରେ ସୁବର୍ଣ୍ଣପୁର ପୌରାଧ୍ୟକ୍ଷା ତାମସି ତାମସ୍ମିତା ନାୟକ, ପ୍ରାକ୍ତନ ପୌରାଧ୍ୟକ୍ଷ କଇରୁ ସ୍ବାଇଁ, ପ୍ରକାଶ ସାହୁ, ସାମାଜିକ କର୍ମୀ ଶ୍ରୀବତ୍ସ ମଲ୍ଳିକ, ଶଶାଙ୍କ ଶେଖର ସିଂହଦେଓ, ଅଭିମନ୍ୟୁ କୁଶଳ, ସନ୍ତୋଷ ପାଢୀ, ଷଷ୍ଠି କୁମାର ବଡମାଳି, ଶିବରାମ ସାହୁ, ସୁବାଷ ଚନ୍ଦ୍ର ନେଗୀ, ଲଡୁ କିଶୋର ମଲ୍ଳିକ, କାଉନସିଲର ପିୟୁଷ କୁମାର ପଣ୍ଡା, ରାଜ କିଶୋର ରାଓ, ଶେଷଦେବ ମେହେର ଓ ଇଶ୍ୱର ବିଶି ପ୍ରମୁଖ ଉପସ୍ଥିତ ଥିଲେ। ପରମ୍ପରା ଅନୁଯାୟୀ ନନ୍ଦୋତ୍ସୋବ ତିଥିରେ ସୁବର୍ଣ୍ଣପୁରରେ ନୂଆଁଖାଇ ଲଗ୍ନ ଧାର୍ଯ୍ୟ ହୋଇଥାଏ। ଦେବୋତ୍ତର ବିଭାଗ ମ୍ୟୁନିସିପାଲିଟିକୁ ଏହି କାର୍ଯ୍ୟକ୍ରମ ଆୟୋଜନ ପାଇଁ ପୂର୍ବରୁ ଦାୟିତ୍ୱ ନ୍ୟସ୍ତ କରିଛି। ନୂଆଁଖାଇ ଓ ପାହୁର ଯାତ୍ରା ସହିତ ପ୍ରସିଦ୍ଧ ସୋନପୁର ବଳିଯାତ୍ରାର ସମ୍ପର୍କ ରହିଛି।