ଗୁରୁଗ୍ରାମ,୪।୮: ହରିୟାଣାର ନୁହରେ ଶୋଭାଯାତ୍ରା ସମୟରେ ହୋଇଥିବା ହିଂସା ଏବେ ପର୍ଯ୍ୟନ୍ତ ଶାନ୍ତ ହୋଇନାହିଁ। ଏବେ ପୁଣିଏକ ଧାର୍ମିକ ସ୍ଥଳରେ ନିଆଁ ଲଗାଯାଇଥିବା ଖବର ବି ଆସିଛି। ସୂଚନା ପାଇବା ମାତ୍ରେ ପାଞ୍ଚଟି ଅଗ୍ନିଶମ ଟେଣ୍ଡର ଘଟଣାସ୍ଥଳରେ ପହଞ୍ଚି ନିଆଁକୁ ନିୟନ୍ତ୍ରଣକୁ ଆଣିଥିଲେ। ଅନ୍ୟପକ୍ଷରେ ହିଂସା ପରେ ସରକାର କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି। ନୁହ ଏସପି ବରୁଣ ସିଙ୍ଗଲାଙ୍କୁ ଟ୍ରାନ୍ସଫର କରାଯାଇଛି। ତାଙ୍କୁ ଭିଓ୍ବାନିର ଏସପି କରାଯାଇଛି। ନୁହରେ ତାଙ୍କ ସ୍ଥାନରେ ଆଇପିଏସ ନରେନ୍ଦ୍ର ବିଜାରନିୟାଙ୍କୁ ଦାୟିତ୍ୱ ଦିଆଯାଇଛି। ଅନ୍ୟପକ୍ଷରେ, ଶୁକ୍ରବାର ନୁହରେ ଦୁଇ ଘଣ୍ଟା ପାଇଁ କର୍ଫ୍ୟୁ କୋହଳ କରାଯାଇଛି। ଏହା ବ୍ୟତୀତ ଗୁରୁଗ୍ରାମର ଘରେ ରହି ଶୁକ୍ରବାର ପ୍ରାର୍ଥନା ବା ନମାଜ ପାଠ କରିବାକୁ ଏକ ନିବେଦନ କରାଯାଇଛି।
ସାମ୍ପ୍ରଦାୟିକ ପରିବେଶର ଉନ୍ନତି ପାଇଁ ମୁସଲମାନ ସମ୍ପ୍ରଦାୟ ଶୁକ୍ରବାର ଗୁରୁଗ୍ରାମରେ ଘରୁ ନମାଜ କରିବାକୁ ଘୋଷଣା କରିଥିଲେ। ଜମିୟତ ଉଲାମର ସଭାପତି ମୁଫତି ସଲିମ କାସମି ଏକ ଭିଡିଓ ବାର୍ତ୍ତାରେ ଲୋକଙ୍କୁ ସର୍ବସାଧାରଣ ସ୍ଥାନରେ ପ୍ରାର୍ଥନା କରିବା ପାଇଁ ବାରଣ କରିବାକୁ କହିଛନ୍ତି। ଅନ୍ୟପକ୍ଷରେ, ନୁହରେ ଥିବା ଉଲାମା ନିଶ୍ଚିତ କରିଛନ୍ତି ଯେ ସର୍ବସାଧାରଣ ସ୍ଥାନରେ ନମାଜ ପଢିବାକୁ ଅନୁମତି ଦିଆଯିବ ନାହିଁ।