ପୁଣି ତାଣ୍ଡବ, ବିଟ୍ରେନ୍ରେ ଦିନକୁ ୯୩ ହଜାର ଛୁଇଁଲା ଓମିକ୍ରନ୍ ଆକ୍ରାନ୍ତଙ୍କ ସଂଖ୍ୟା…
01 ଲଣ୍ଡନ,୧୮।୧୨: ପୃଥିବୀରେ କରୋନାର ନୂଆ ଭାରିଆଣ୍ଟ୍ ଓମିକ୍ରନ ଆକ୍ରାନ୍ତଙ୍କ ସଂଖ୍ୟା ବର୍ତ୍ତମାନ ଦ୍ରୁତ ଗତିରେ ବୃଦ୍ଧି ପାଉଛି। ବ୍ରିଟେନ୍ରେ ସ୍ଥିତି ଅଣାୟତ୍ତ ବେହାରେ ଲାଗିଛି। ଓମିକ୍ରନ୍ ଏଠାରେ ତାଣ୍ଡବ ରଚିବା ଆରମ୍ଭ କରିଛି। ଏଠାରେ ଦିନକୁ ଓମିକ୍ରନ୍ ଆକ୍ରାନ୍ତଙ୍କ ସଂଖ୍ୟା ୯୩ ହଜାର ଛୁଇଁଛି। ବ୍ରିଟେନରେ, କରୋନା କ୍ରମାଗତ ତୃତୀୟ ଦିନ ପାଇଁ ସମସ୍ତ ରେକର୍ଡ ଭାଙ୍ଗିଛି। ସରକାରଙ୍କ ଅନୁଯାୟୀ ଶୁକ୍ରବାର ୯୩ ,୦୪୫ ଜଣ ଆକ୍ରାନ୍ତଙ୍କୁ ଚିହ୍ନଟ କରାଯାଇଛି। ସେହିପରି ମୃତ୍ୟୁ ସଂଖ୍ୟା ୧୧୧ରେ ପହଞ୍ଚିଛି। ଗୋଟିଏ ଦିନ ପୂର୍ବରୁ ବ୍ରିଟେନରେ ୮୮ ହଜାର ଆକ୍ରାନ୍ତଙ୍କୁ ଚିହ୍ନଟ କରାଯାଇଥିଲା। ସର୍ବଶେଷ ଆକଳନ ଅନୁଯାୟୀ, ଦେଶରେ ବର୍ତ୍ତମାନ ପର୍ଯ୍ୟନ୍ତ କରୋନା ସଂକ୍ରମିତ ହୋଇଥିବା ଲୋକଙ୍କ ସଂଖ୍ୟା ୧୧ ନିୟୁତରୁ ଅଧିକରେ ପହଞ୍ଚିଛି। ମହାମାରୀ ରେ ଇତିମଧ୍ୟରେ ୧,୪୭,୦୦୦ ଲୋକଙ୍କ ମୃତ୍ୟୁ ଘଟିଥିବା ସରକାରଙ୍କ ପକ୍ଷରୁ କୁହାଯାଇଛି।
ସ୍କଟଲ୍ୟାଣ୍ଡର ମନ୍ତ୍ରୀ ନିକୋଲା ଷ୍ଟୁର୍ଜନ କହିଛନ୍ତି ଯେ ଓମିକ୍ରନ ବର୍ତ୍ତମାନ ଦେଶରେ ନୂତନ ସଂକ୍ରମଣର ପ୍ରମୁଖ କାରଣ ପାଲଟିଛି। ପ୍ରାୟ ଏକ ସପ୍ତାହ ପୂର୍ବରୁ ମୁଁ ଚେତାବନୀ ଦେଇଥିବା ସୁନାମି ବର୍ତ୍ତମାନ ଆମକୁ ମାରିବା ଆରମ୍ଭ କରିଛି। ୱେଲ୍ସର ନେତା ମାର୍କ ଡ୍ରେକଫୋର୍ଡ ଲୋକଙ୍କୁ ଓମିକ୍ରନର ସଙ୍କଟ ପାଇଁ ପ୍ରସ୍ତୁତ ହେବାକୁ ଆହ୍ବାନ ଦେଇଛନ୍ତି। ଏହା ସହିତ ଡିସେମ୍ବର ୨୬ ପରେ ଦେଶର ନାଇଟ କ୍ଲବ ବନ୍ଦ କରିବାକୁ ନିର୍ଦ୍ଦେଶ ଦିଆଯାଇଛି।