ନୂଆଦିଲ୍ଲୀ,୧୧ା୭: ଭାରତରେ କରୋନା ସଂକ୍ରମଣ ଶୁକ୍ରବାର ୮ ଲକ୍ଷ ଟପିଥିବାବେଳେ ମୃତ୍ୟୁସଂଖ୍ୟା ୨୧,୭୨୪ ହୋଇଛି। ୨୪ ଘଣ୍ଟା ମଧ୍ୟରେ ଦେଶରେ ୨୬,୫୦୬ ନୂଆ ମାମଲା ଚିହ୍ନଟ ହୋଇଥିବାବେଳେ ୪୭୫ ଜଣଙ୍କ ମୃତ୍ୟୁ ଘଟିଛି। ଏମାନଙ୍କୁ ମିଶାଇ ମୋଟ ଆକ୍ରାନ୍ତଙ୍କ ସଂଖ୍ୟା ୮,୦୧,୨୮୬ ହୋଇଛି।ଗତ ୩ ଦିନରେ ପାଖାପାଖି ଲକ୍ଷେ ସଂକ୍ରମିତ ହୋଇଛନ୍ତି। ସକ୍ରିୟ ମାମଲା ୨,୭୬,୬୮୫ ରହିଥିବାବେଳେ ୪,୯୫,୫୧୨ ଜଣ ସୁସ୍ଥ ହେଲେଣି ବୋଲି ସ୍ବାସ୍ଥ୍ୟ ମନ୍ତ୍ରଣାଳୟ ପକ୍ଷରୁ କୁହାଯାଇଛି। ଆରୋଗ୍ୟ ହାର ୬୨.୪୨ ପ୍ରତିଶତ ରହିଛି। ୧୮ଟି ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳରେ ଆରୋଗ୍ୟ ହାର ଜାତୀୟ ହାର ଠାରୁ କମ୍ ରହିଛି। ବର୍ତ୍ତମାନ ସୁଦ୍ଧା୧.୧ କୋଟି ଲୋକଙ୍କର କୋଭିଡ୍ ପରୀକ୍ଷା କରାଗଲାଣି।
ମହାରାଷ୍ଟ୍ରରେ ସର୍ବାଧିକ ୨,୩୦,୫୯୯ ସଂକ୍ରମିତ ହୋଇଥିବା ବେଳେ ତାମିଲନାଡୁରେ ୧,୨୬,୫୮୧, ଦିଲ୍ଲୀରେ ୧,୦୭,୦୫୧ ଆକ୍ରାନ୍ତ ହୋଇଛନ୍ତି।
ମାସେ ପୂର୍ବରୁ ଦେଶରେ କରୋନା ଜନିତ ମୃତ୍ୟୁହାର ୨.୮୨ ପ୍ରତିଶତ ଥିବାବେଳେ ଏବେ ତାହା ୨.୭୨ ପ୍ରତିଶତକୁ ହ୍ରାସ ପାଇଛି। ଏହା ଅନ୍ୟ ଦେଶଗୁଡ଼ିକ ତୁଳନାରେ ଯଥେଷ୍ଟ କମ୍ ବୋଲି ସ୍ବାସ୍ଥ୍ୟ ମନ୍ତ୍ରଣାଳୟ କହିଛି। କରୋନା ରୋଗୀଙ୍କ ଚିକିତ୍ସାରେ ଉନ୍ନତି ଉପରେ ଅଧିକ ଧ୍ୟାନ ଦିଆଯାଉଛି। ସଂକ୍ରମିତଙ୍କୁ ଚିହ୍ନଟ କରିବାରେ ଆଶା, ଏଏନ୍ଏମ୍ମାନଙ୍କୁ ନିୟୋଜିତ କରାଯିବା ସହ ଆୟୁଷ୍ମାନ ଭାରତ ହେଲ୍ଥ ଆଣ୍ଡ ଓ୍ବେଲ୍ନେସ୍ ସେଣ୍ଟରଗୁଡ଼ିକ ମଧ୍ୟ ଯାଞ୍ଚ କାର୍ଯ୍ୟରେ ସହାୟତା କରୁଛନ୍ତି। କେରଳରେ କରୋନା ଜନିତ ମୃତ୍ୟୁହାର ସର୍ବନିମ୍ନ ୦.୪୧ ପ୍ରତିଶତ ଥିବାବେଳେ ଝାଡ଼ଖଣ୍ଡରେ ୦.୭୧, ବିହାରରେ ୦.୮୨% ରହିଛି।
