ନୂଆଦିଲ୍ଲୀ/ମୁମ୍ବାଇ/ଶ୍ରୀନଗର, ୧୧।୬: ଭାଜପାର ୨ ନିଲମ୍ବିତ ମୁଖପାତ୍ର ନୂପୁର ଶର୍ମା ଓ ନବୀନ କୁମାର ଜିନ୍ଦଲଙ୍କୁ ଗିରଫ କରିବା ପାଇଁ ସାରା ଦେଶର ମୁସଲମାନମାନେ ଦାବି କରିଆସୁଥିବାବେଳେ ଦିଲ୍ଲୀ ପୋଲିସ ସେମାନଙ୍କୁ ଘଣ୍ଟ ଘୋଡ଼ାଇ ନାମକୁ ମାତ୍ର ମାମଲା ରୁଜୁ କରିବା ଧର୍ମକୁ ଆଖିଠାର ସଦୃଶ। କେବଳ ଏତିକି ନୁହେଁ, ଆଇନ ଶୃଙ୍ଖଳା ଦାୟିତ୍ୱରେ ଥିବା ପୋଲିସ ରାଜନୈତିକ ସନ୍ତୁଳନ ପାଇଁ ଏଆଇଏମ୍ଆଇଏମ୍ ଅଧ୍ୟକ୍ଷ ତଥା ହାଇଦ୍ରାବାଦ ଏମ୍ପି ଅସାଦୁଦ୍ଦିନ ଓଓ୍ବାଇସିଙ୍କ ସମେତ ସଂଖ୍ୟାଲଘୁ ସମ୍ପ୍ରଦାୟର ଅନ୍ୟ କେତେଜଣଙ୍କ ବିରୋଧରେ ମାମଲା ରୁଜୁ କରିଛି। ଏହାର ପ୍ରତିବାଦ ଦେଖିବାକୁ ମିଳିଛି ଭାରତ ଓ ବିଦେଶରେ। ଦିଲ୍ଲୀର ଜାମା ମସ୍ଜିଦ୍ରେ ମୁସଲମାନମାନେ ନମାଜ ପାଠ ପରେ ପ୍ଲାକାର୍ଡ ଧରି ନୂପୁର ଓ ନବୀନଙ୍କ ବିରୋଧରେ ସ୍ଲୋଗାନ ଦେବା ସହ ବିକ୍ଷୋଭ ପ୍ରଦର୍ଶନ କରିଛନ୍ତି। ପୋଲିସ ସେମାନଙ୍କୁ ଘଉଡ଼ାଇବାକୁ ଯାଇ ବଳ ପ୍ରୟୋଗ କରିଛି। ଜାମିଆ ମିଲିଆ ଇସ୍ଲାମିଆ ୟୁନିଭର୍ସିଟି ଛାତ୍ରୀଛାତ୍ର ଦୁହିଁଙ୍କ ଗିରଫ ଦାବିରେ କ୍ୟାମ୍ପସରେ ଧାରଣା ଦେଇଛନ୍ତି। ଝାଡ଼ଖଣ୍ଡର ରାଞ୍ଚତ୍ସ୍ଥିତ ହନୁମାନ ମନ୍ଦିର ନିକଟରେ ଭିଡ଼କୁ ନିୟନ୍ତ୍ରଣ କରିବାକୁ ଯାଇ ପୋଲିସ ଲାଠିମାଡ଼ କରି ଟେକାମାଡ଼ର ଶିକାର ହୋଇଛି। କଶ୍ମୀରର କେତେକ ସ୍ଥାନରେ ବନ୍ଦ ପାଳନ କରାଯାଇଛି। ଜମ୍ମୁରେ କର୍ଫ୍ୟୁ ଜାରି କରାଯାଇଛି। ଶ୍ରୀନଗର, ଭଦେରଓ୍ବାହ ଓ କିଶତଓ୍ବାରରେ ପୋଲିସ ଫ୍ଲାଗ୍ମାର୍ଚ୍ଚ କରିଥିବାବେଳେ ଉପତ୍ୟକାର ଅନେକ ସ୍ଥାନରେ ମୋବାଇଲ, ଇଣ୍ଟରନେଟ୍ ସେବା ବାତିଲ କରାଯାଇଛି। ସବୁଠୁ ସଙ୍ଗିନ ସ୍ଥିତି ସୃଷ୍ଟି ହୋଇଛି ଭାଜପା ଶାସିତ ଉତ୍ତର ପ୍ରଦେଶରେ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସଂସଦୀୟ ଆସନ ବାରାଣସୀ ସମେତ ବିଭିନ୍ନ ସହରରେ ବ୍ୟାପକ ହିଂସାକାଣ୍ଡ ଘଟିଛି। ଏପରି କି ମୋଦି ନିଜ ରାଜ୍ୟ ଗୁଜରାଟ ଗସ୍ତରେ ଥିବାବେଳେ ଅହମଦାବାଦ ଓ ବଡ଼ୋଦରା ସମେତ କେତେକ ସହରରେ ସଂଖ୍ୟାଲଘୁ ସମୁଦାୟ ଦୋକାନ ବଜାର ବନ୍ଦ କରି ନୂପୁରଙ୍କୁ ତୁରନ୍ତ ଗିରଫ କରିବାକୁ ଦାବି କରିଛନ୍ତି। ପଶ୍ଚିମବଙ୍ଗର ହାଓଡା ଜିଲା ପାଞ୍ଚଲାରେ ବିକ୍ଷୋଭକାରୀମାନେ ଭାଜପା ଅଫିସ୍ରେ ନିଆଁ ଲଗାଇବା ସହ କେତେକ ଗାଡ଼ି ଜାଳି ଦେଇଛନ୍ତି। ଜିଲାରେ ଉତ୍ତେଜନାକୁ ଦୃଷ୍ଟିରେ ରଖି ସକାଳ ୬ଟା ପର୍ଯ୍ୟନ୍ତ ଇଣ୍ଟରନେଟ୍ ସେବା ବନ୍ଦ କରାଯାଇଛି। ଦେଶରେ ସାମ୍ପ୍ରଦାୟିକ ସଦ୍ଭାବ ନଷ୍ଟ ହୋଇ ଦଙ୍ଗା ସ୍ଥିତି ଲାଗିରହିଥିବାବେଳେ ସ୍ବରାଷ୍ଟ୍ରମନ୍ତ୍ରୀ ଅମିତ୍ ଶାହା ନୂଆଦିଲ୍ଲୀରେ ଏକ ପୁସ୍ତକ ଉନ୍ମୋଚନ କରି କହିଛନ୍ତି, ଭାରତର ଅଧିକାଂଶ ଐତିହାସିକ ଇତିହାସକୁ ଲିପିବଦ୍ଧ କରିବାବେଳେ ପାଣ୍ଡ୍ୟ ଓ ଚୋଳ ସାମ୍ରାଜ୍ୟର ଗୌରବମୟ ଶାସନକୁ ଅଣଦେଖା କରି ମୋଗଲମାନଙ୍କୁ ପ୍ରାଧାନ୍ୟ ଦେଇଛନ୍ତି।