ସାଉଥାମ୍ପଟନ,୨୦।୬: ଚଳିତ ବିଶ୍ୱ ଟେଷ୍ଟ ଚାମ୍ପିୟନଶିପ୍ (ଡବ୍ଲ୍ୟୁଟିସି) ଫାଇନାଲରେ ଦ୍ୱିତୀୟ ଦିନ ସୁଦ୍ଧା ସୁବିଧାଜନକ ସ୍ଥିତିରେ ଥିବା ଟିମ୍ ଇଣ୍ଡିଆକୁ ବ୍ୟାକ୍ଫୁଟକୁ ଠେଲି ଦେଇଛି ନ୍ୟୁଜିଲାଣ୍ଡ। ତୃତୀୟ ଦିନର ପ୍ରଥମ ସେସନରେ ୪ ଉଇକେଟ ନେଇ ମ୍ୟାଚ୍କୁ ଫେରିଛି ନ୍ୟୁଜିଲାଣ୍ଡ। ତୃତୀୟ ଦିନର ଲଞ୍ଚ ସୁଦ୍ଧା ଟିମ୍ ଇଣ୍ଡିଆ ୭ ଉଇକେଟ ହରାଇ ୨୧୧ ରନ୍ କରିଛି।
ପୂର୍ବ ଦିନର ସ୍କୋର ୧୪୬/୩ରୁ ବ୍ୟାଟିଂ ଆରମ୍ଭ କରିଥିବା ଟିମ୍ ଇଣ୍ଡିଆକୁ ଅଧିନାୟକ ବିରାଟ କୋହଲି (୪୪)ଙ୍କ ରୂପେ ବଡ଼ ଝଟ୍କା ଲାଗିଥିଲା। ତାଙ୍କୁ ଆଉଟ୍ କରି ଭାରତୀୟ ଦଳ ଉପରେ ଚାପ ପକାଇଥିଲା ନ୍ୟୁଜିଲାଣ୍ଡ। ଯାହା ଫଳରେ ଫେଲ୍ ମାରିଥିଲେ ରିଷଭ ପନ୍ତ (୪)। କ୍ରିଜରେ ଜମି ସାରିଥିବା ଉପ ଅଧିନାୟକ ଅଜିଙ୍କ୍ୟ ରାହାନେ (୪୯)ଙ୍କୁ ଚତୁରତାର ସହ ଶର୍ଟ ପିଚ୍ ବଲରେ ଶିକାର କରିଥିଲେ ନେଲ ଓ୍ବାଗନର। ତା’ପରେ ଆଟାକିଂ ବ୍ୟାଟିଂ କରୁଥିବା ରବିଚନ୍ଦ୍ରନ ଅଶ୍ୱିନ (୨୨) ମଧ୍ୟ ପ୍ୟାଭିଲିଅନ ଫେରିଛନ୍ତି। ଏବେ ରବୀନ୍ଦ୍ର ଜାଡେଜା (୧୫) ଓ ଇଶାନ୍ତ ଶର୍ମା (୨) କ୍ରିଜରେ ଅଛନ୍ତି। ନ୍ୟୁଜିଲାଣ୍ଡ ପାଇଁ କାଇଲ ଜାମିଶନ ୩ ଉଇକେଟ ନେଇଥିବାବେଳେ ଓ୍ବାଗନର ୨ଟି ଉଇକେଟ ହାତେଇଛନ୍ତି।
