କରାଚୀ,୧୮।୯: ସିରିଜ୍ ଆରମ୍ଭ ହେବା ପୂର୍ବରୁ ନ୍ୟୁଜିଲାଣ୍ଡ ଦଳ ପୂରା ଗସ୍ତ ବାତିଲ କରିବା ପରେ ଅସନ୍ତୋଷ ପ୍ରକାଶ କରିଛନ୍ତି ପାକିସ୍ତାନ କ୍ରିକେଟ ବୋର୍ଡ (ପିସିବି) ମୁଖ୍ୟ ରମିଜ ରାଜା। ଅନ୍ତର୍ଜାତୀୟ କ୍ରିକେଟ କାଉନସିଲ (ଆଇସିସି) ନିକଟରେ ଏ ପ୍ରସଙ୍ଗ ଉଠାଯିବ ବୋଲି ସେ କହିଛନ୍ତି।
”ଆମ ଖେଳାଳି ଓ ପ୍ରଶଂସକଙ୍କ ଲାଗି ମୁଁ ଦୁଃଖିଦ। ସୁରକ୍ଷାଗତ କାରଣ ଦର୍ଶାଇ ଗସ୍ତରୁ ଓହରିଯିବା ନ୍ୟୁଜିଲାଣ୍ଡର ଏକତରଫା ନିଷ୍ପତ୍ତି। ଏହା ଆମକୁ ନିରାଶ କରିଛି। କାରଣ ଏ ସମ୍ପର୍କରେ ଆମ ସହିତ କୌଣସି ଆଲୋଚନା କରାଯାଇ ନ ଥିଲା। ଆଇସିସି ବୈଠକରେ ନ୍ୟୁଜିଲାଣ୍ଡ ସହ କଥା ହେବୁ“ ବୋଲି ପିସିବି ମୁଖ୍ୟ ଟୁଇଟ୍ କରି ନିଜ ଆଭିମୁଖ୍ୟ ସ୍ପଷ୍ଟ କରିଛନ୍ତି। ତେବେ ଆଇସିସିର ଅଧ୍ୟକ୍ଷ ପଦରେ ଅଛନ୍ତି ନ୍ୟୁଜିଲାଣ୍ଡର ଗ୍ରେଗ ବାର୍କଲେ। ତେଣୁ ଆଇସିସି ପାକିସ୍ତାନର ଏହି ଅସନ୍ତୋଷକୁ କେତେ ଗୁରୁତ୍ୱ ଦେଉଛି ତାହା ଦେଖିବା ବାକି ରହିଲା। ଏହି ସିରିଜ ବାତିଲ ହେବା ଫଳରେ ପିସିବି ପାଖାପାଖି ୨୦୦ କୋଟି ଟଙ୍କା କ୍ଷତି ସହିବ ବୋଲି ଅନୁମାନ କରାଯାଉଛି।
