ଭବାନୀପାଟଣା, ୨୧।୪ (ସ୍ବ.ପ୍ର.): କଳାହାଣ୍ଡି ଜିଲା ଭବାନୀପାଟଣା ପୋଲିସ ରିଜର୍ଭ କାର୍ଯ୍ୟାଳୟରେ ସୋମବାର ରାତିରେ ତୁମୁଳକାଣ୍ଡ ଘଟିଛି। ରିଜର୍ଭ ଅଫିସରେ ମୁତୟନ ଓଏପିଏଫ୍ ଯବାନ ଓ ସର୍ଜେଣ୍ଟଙ୍କ ମଧ୍ୟରେ କାମ କରିବାକୁ ନେଇ ବଚସା ହୋଇଥିଲା। ଏଥିରେ ଉତ୍କ୍ଷିପ୍ତ ହୋଇ ସର୍ଜେଣ୍ଟ ଖଗେଶ୍ୱର ବିଶ୍ୱାଳ ଓ ଦୁଇ ସହଯୋଗୀ ମିଶି ଓଏପିଏଫ୍ ଯବାନ ଜଗବନ୍ଧୁ ଜାନିଙ୍କୁ ବାଡ଼ିରେ ମାଡ଼ ମାରିଥିବା ଅଭିଯୋଗ କରିଛନ୍ତି ସମ୍ପୃକ୍ତ ଯବାନ। ମାଡ଼ରେ ହାତ, ପିଠି, କାନରୁ ରକ୍ତସ୍ରାବ ହୋଇଥିବା ବେଳେ ଭବାନୀପାଟଣା ମେଡିକାଲରେ ଭର୍ତ୍ତି କରାଯାଇଛି। ଏଭଳିକାଣ୍ଡ ଖୋଦ୍ ପୋଲିସ ଅଫିସରେ ଘଟିଥିବାରୁ ଓଏପିଏଫ୍ ଯବାନଙ୍କ ମଧ୍ୟରେ ତୀବ୍ର ଅସନ୍ତୋଷ ଦେଖାଦେଇଛି। ପୋଲିସ ରିଜର୍ଭ ଅଫିସରେ ପୋଲିସ ବି ସୁରକ୍ଷିତ ନ ଥିବା ଜଣାଯାଇଛି। ଏ ନେଇ ଏସ୍ପିଙ୍କୁ ପଚାରିବାରୁ ଘଟଣାର ତଦନ୍ତ ପାଇଁ ନିର୍ଦ୍ଦେଶ ଦିଆଯାଇଥିବା କହିଛନ୍ତି।