ନାଗପୁର,୧୬।୧୨(ପି.ଟି.): ମହାରାଷ୍ଟ୍ର ବିଧାନସଭା ନିର୍ବାଚନରେ ଆଶାତୀତ ସଫଳତା ହାସଲର ୨୩ ଦିନ ପରେ ମନ୍ତ୍ରିମଣ୍ଡଳର ଶପଥ ଗ୍ରହଣ ଉତ୍ସବ ଅନୁଷ୍ଠିତ ହୋଇଛି। ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡ୍ନବିସ୍ ଏବଂ ୨ ଉପମୁଖ୍ୟମନ୍ତ୍ରୀ ଏକନାଥ ଶିନ୍ଦେ ଓ ଅଜିତ ପାଓ୍ବାର ଶପଥ ନେବାର ୧୦ ଦିନ ପରେ ତାଙ୍କ କ୍ୟାବିନେଟ୍ର ଅନ୍ୟ ସଦସ୍ୟମାନେ ଶପଥ ଗ୍ରହଣ କରିଛନ୍ତି। ଏଥିରେ ମହାୟୁତିର ୩ ଦଳରୁ ୩୯ ବିଧାୟକଙ୍କୁ ସୁଯୋଗ ମିଳିଛି। ୧୦ ପୂର୍ବତନ ମନ୍ତ୍ରୀଙ୍କୁ ବାଦ୍ ଦିଆଯାଇଥିବାବେଳେ କ୍ୟାବିନେଟରେ ୧୬ ନୂଆ ମୁହଁ ସ୍ଥାନ ପାଇଛନ୍ତି। ୩୩ ଜଣ କ୍ୟାବିନେଟ ମନ୍ତ୍ରୀ ଭାବେ ଶପଥ ନେଇଥିବାବେଳେ ୬ ଜଣ ରାଷ୍ଟ୍ରମନ୍ତ୍ରୀ ହୋଇଛନ୍ତି। ମୁଖ୍ୟମନ୍ତ୍ରୀ ଓ ୨ ଉପମୁଖ୍ୟମନ୍ତ୍ରୀଙ୍କ ସମେତ କ୍ୟାବିନେଟ୍ର ମନ୍ତ୍ରୀ ସଂଖ୍ୟା ୪୨ ହୋଇଛି। ଭାଜପାରୁ ମନ୍ତ୍ରିମଣ୍ଡଳରେ ୧୯ ଜଣ ସ୍ଥାନ ପାଇଥିବାବେଳେ ଏକନାଥ ଶିନ୍ଦେଙ୍କ ଶିବସେନା ଏବଂ ଅଜିତ ପାଓ୍ବାରଙ୍କ ଏନ୍ସିପିରୁ ଯଥାକ୍ରମେ ୧୧ ଏବଂ ୯ ଜଣଙ୍କୁ ମନ୍ତ୍ରୀପଦ ମିଳିଛି। ରାଜ୍ୟ ବିଧାନସଭା ଶୀତ ଅଧିବେଶନର ପୂର୍ବ ସନ୍ଧ୍ୟାରେ ନାଗପୁରସ୍ଥିତ ରାଜଭବନରେ ଅନୁଷ୍ଠିତ ଶପଥ ଗ୍ରହଣ ଉତ୍ସବରେ ରାଜ୍ୟପାଳ ସି.ପି. ରାଧାକ୍ରିଷ୍ଣନ୍ ନୂଆ ମନ୍ତ୍ରୀମାନଙ୍କୁ ଶପଥ ପାଠ କରାଇଥିଲେ। ୨୮୮ ଆସନ ବିଶିଷ୍ଟ ମହାରାଷ୍ଟ୍ର ବିଧାନସଭାରେ ଭାଜପା ୧୩୨ ଆସନ ଜିତିଥିବାବେଳେ ଶିବସେନା ୫୭ ଏବଂ ଏନ୍ସିପି ୪୧ ଆସନ ଜିତିଥିଲା। ସେହି ଅନୁଯାୟୀ ଭାଜପାକୁ ୧୬ଟି କ୍ୟାବିନେଟ ଏବଂ ୩ ରାଷ୍ଟ୍ରମନ୍ତ୍ରୀ ପାହ୍ୟା ମିଳିଥିବାବେଳେ ଶିବସେନାକୁ ୯ କ୍ୟାବିନେଟ ଓ ୨ ରାଷ୍ଟ୍ରମନ୍ତ୍ରୀ ଏବଂ ଏନ୍ସିପିକୁ ୮ କ୍ୟାବିନେଟ ଓ ୧ ରାଷ୍ଟ୍ରମନ୍ତ୍ରୀ ପଦ ମିଳିଛି। ୪ ମହିଳା ମନ୍ତ୍ରୀଙ୍କ ମଧ୍ୟରୁ ପଙ୍କଜା ମୁଣ୍ଡେ, ମାଧୁରୀ ମିସାଲ ଏବଂ ମେଘନା ବୋରଡିକର ଭାଜପାରୁ ହୋଇଥିବାବେଳେ ଏନ୍ସିପିରୁ ଅଦିତି ଟଟକାରେ ଅଛନ୍ତି। ଛଗନ ଭୁଜବଳ, ଦିଲୀପ ଓ୍ବାଲ୍ସେ ପାଟିଲ, ସୁଧୀର ମୁଙ୍ଗନ୍ତିଓ୍ବାର ଏବଂ ବିଜୟକୁମାର ଗଭିତ୍ ଏଥର ମନ୍ତ୍ରିମଣ୍ଡଳରୁ ବାଦ୍ ପଡ଼ିଛନ୍ତି। ଶିବସେନାରୁ ପୂର୍ବତନ ମନ୍ତ୍ରୀ ତନଜି ସାଓ୍ବନ୍ତ, ଦୀପକ କେସରକର ଏବଂ ଅବଦୁଲ ସତ୍ତାର ବାଦ୍ ପଡ଼ିଥିବାବେଳେ ଏନ୍ସିପିରୁ ଅନିଲ ପାଟିଲ, ସଞ୍ଜୟ ବନ୍ଦସୋଡେ ଏବଂ ଧର୍ମାରାଓ ବାବା ଅତରାମ ବାଦ୍ ପଡ଼ିଛନ୍ତି।
ବାଦ୍ ପଡ଼ିଥିବା ବିଧାୟକଙ୍କୁ ମଧ୍ୟ ସୁଯୋଗ ମିଳିବ: ଅଜିତ
ମହାରାଷ୍ଟ୍ରର ଦ୍ୱିତୀୟ ରାଜଧାନୀ ନାଗପୁରରେ ସୋମବାରଠାରୁ ବିଧାନସଭାର ଶୀତ ଅଧିବେଶନ ଆରମ୍ଭ ହେବ। ଏହା ପୂର୍ବରୁ ରବିବାର ନୂଆ ସରକାରଙ୍କ ଶପଥ ଗ୍ରହଣ ଉତ୍ସବ ଅନୁଷ୍ଠିତ ହୋଇଛି। କ୍ୟାବିନେଟରେ ସାମିଲ ହୋଇ ନ ଥିବା ବିଧାୟକମାନଙ୍କ ମଧ୍ୟରେ ଅସନ୍ତୋଷ ଦେଖାଦେଇଥିବାବେଳେ ଉପମୁଖ୍ୟମନ୍ତ୍ରୀ ଅଜିତ ପାଓ୍ବାର ସେମାନଙ୍କୁ ଆଶାଛଡ଼ା ନ ହେବାକୁ ଆଶ୍ୱାସନା ଦେଇଛନ୍ତି। ଏନ୍ସିପି ମୁଖ୍ୟ ଅଜିତ କହିଛନ୍ତି, ମହାୟୁତି ସରକାର ଏହି ପାଳିରେ ଅନ୍ୟ ବିଧାୟକମାନଙ୍କୁ ମଧ୍ୟ ସୁଯୋଗ ଦେବ। ସମସ୍ତେ ମନ୍ତ୍ରୀ ହେବାକୁ ଚାହୁଁଛନ୍ତି। ସେମାନେ ସୁଯୋଗ ପାଇବାକୁ ଯୋଗ୍ୟ। କିନ୍ତୁ ମନ୍ତ୍ରିପଦ ସଂଖ୍ୟା ସୀମିତ। କେତେଜଣ ବିଧାୟକଙ୍କୁ ଦେଢ଼ବର୍ଷ ପାଇଁ ମନ୍ତ୍ରିପଦ ମିଳିଛି। ଆଉ କେତେଜଣଙ୍କୁ ଅଢ଼େଇ ବର୍ଷ ପରେ କ୍ୟାବିନେଟ କିମ୍ବା ରାଷ୍ଟ୍ରମନ୍ତ୍ରୀ ଭାବେ ସୁଯୋଗ ମିଳିବ। ଏଥିରେ ଅନେକ ଜିଲା ଓ ଅଞ୍ଚଳକୁ ଉପଯୁକ୍ତ ପ୍ରତିନିଧିତ୍ୱ ମିଳିବ ବୋଲି ଅଜିତ କହିଛନ୍ତି।