ସାକ୍ଷୀଗୋପାଳ,୨୩ା୧(ସ୍ବ.ପ୍ର./ଡି.ଏନ୍.ଏ.): ଉତ୍କଳମଣି ପଣ୍ଡିତ ଗୋପବନ୍ଧୁ ଦାସ ଏବଂ ସତୀର୍ଥମାନଙ୍କ ଦ୍ୱାରା ନିର୍ମିତ ମଣିଷ ତିଆରି କାରଖାନା, ସେବା, ସଂସ୍କାର ଓ ସାହିତ୍ୟ ସାଧନାରେ ପରିପୁଷ୍ଟ ଓଡ଼ିଶାର ଅନ୍ୟତମ ଐତିହାସିକ ପୀଠ ସତ୍ୟବାଦୀସ୍ଥିତ ବକୁଳବନର ହଜିଲା ସ୍ମୃତିକୁ ଫେରାଇ ଆଣିବାକୁ ଓଲିଉଡ ଅଭିନେତା ସବ୍ୟସାଚୀ ମିଶ୍ର ଆଗେଇ ଆସିଛନ୍ତି। ପ୍ରାକୃତିକ ବିପତ୍ାତ ଓ ଉପଯୁକ୍ତ ରକ୍ଷଣାବେକ୍ଷଣ ବିନା ଜରାଜୀର୍ଣ୍ଣ ଅବସ୍ଥାରେ ଥିବା ଏହି ଐତିହ୍ୟ ପୀଠକୁ ସଫା ରଖିବା ସହ ବକୁଳବନର ପରିଚୟ ବଉଳ, ଛୁରିଅନା ଓ ଅନ୍ୟ ଔଷଧୀୟ ଚାରାରୋପଣ କରିବାକୁ ଶୁକ୍ରବାର ବକୁଳବନ ମୁକ୍ତକାଶ ପ୍ରେକ୍ଷାଳୟରେ ଅନୁଷ୍ଠିତ ସଭାରେ ସବ୍ୟସାଚୀଙ୍କ ସହିତ ଉପସ୍ଥିତ ଅତିଥି, ଯୁବ ଛାତ୍ର ଓ ବୁଦ୍ଧୀଜୀବୀମାନେ ଶପଥ ନେଇଛନ୍ତି। ସମ୍ମାନିତ ଅତିଥି ଭାବେ ରାଧାବଲ୍ଲଭ ମଠାଧିୀଶ ମହନ୍ତ ରାମକୃଷ୍ଣ ଦାସ ମହାରାଜ, ଗଙ୍ଗାମାତା ମଠାଧୀଶ ମହନ୍ତ ବଳରାମ ଦାସ ମହାରାଜ, ଇଂଲଣ୍ଡ ଜଗନ୍ନାଥ ମନ୍ଦିର ସଭାପତି ସୁକାନ୍ତ କୁମାର ସାହୁ, ଡା. ସିଦ୍ଧାର୍ଥ ସାହୁ, ଡ. ସଞ୍ଜୟ ଶତପଥୀ, ମୁକ୍ତିମଣ୍ଡପ ପଣ୍ଡିତ ସଭାର ସଭାପତି ପଣ୍ଡିତ ବିଶ୍ୱନାଥ ମିଶ୍ର, ଡା. ଦେବ ଦାଶ, ଗୋବର୍ଦ୍ଧନ ପୀଠର ଜାତୀୟ ସାଧାରଣ ସମ୍ପାଦକ ମାତୃପ୍ରସାଦ ମିଶ୍ର ପ୍ରମୁଖ ଯୋଗଦେଇଥିଲେ। ସାକ୍ଷୀଗୋପାଳ ଠାକୁରଙ୍କ ଦର୍ଶନ ପରେ ସବ୍ୟସାଚୀ ଅତିଥିଙ୍କ ସହ ଚାରାରୋପଣ କରିଥିଲେ। ପରେ ବକୁଳବନରେ ପଞ୍ଚସଖାଙ୍କ ପ୍ରତିମୂର୍ତ୍ତିରେ ମାଲ୍ୟାର୍ପଣ, ଚାରାରୋପଣ କରିଥିଲେ। ଏହି ଅବସରରେ ଅତିଥିମାନେ ଯୁବ ସ୍ବେଚ୍ଛାସେବୀ, ମନ୍ଦିର ସେବାୟତ, ଡାକ୍ତର ଓ ବିଭିନ୍ନ ଅନୁଷ୍ଠାନକୁ ମାନପତ୍ର ଦେଇ ସମ୍ବର୍ଦ୍ଧିତ କରିଥିଲେ। ସ୍ମାଇଲ ପ୍ଲିଜ, ଇଂଲଣ୍ଡର ଶ୍ରୀଜଗନ୍ନାଥ ସଂସ୍ଥା, କ୍ଲବ ସତ୍ୟବାଦୀ, ଗରିବର ସାଥୀ, ସାହିଭାଇ ଆଦି ବିଭିନ୍ନ ସଂଗଠନର କର୍ମକତ୍ତା ସାମିଲ ଥିଲେ।
