ଢେଙ୍କାନାଳ ଅଫିସ, ୯।୪ ଢେଙ୍କାନାଳ ଜିଲା ନରେନ୍ଦ୍ରପୁରସ୍ଥିତ ଟାଟାଷ୍ଟିଲ୍ ପକ୍ଷରୁ ଗୁରୁବାର ବିଶ୍ୱ ସ୍ବାସ୍ଥ୍ୟ ଦିବସ ଉପଲକ୍ଷେ ଓ୍ବାକାଥନ୍ ଅନୁଷ୍ଠିତ ହୋଇଯାଇଛି। ସ୍ବାସ୍ଥ୍ୟ ସମସ୍ୟା ସମ୍ପର୍କରେ ସଚେତନତା ସୃଷ୍ଟି ଉଦ୍ଦେଶ୍ୟରେ ‘ଆମ ପୃଥିବୀ ଆମ ସ୍ବାସ୍ଥ୍ୟ’ ଶୀର୍ଷକ ବିଷୟକୁ ନେଇ ଏହାର ଆୟୋଜନ କରାଯାଇଥିଲା। ଦୀର୍ଘ ୨ କିମି ବ୍ୟାପୀ ଆୟୋଜିତ ଏହି ସଚେତନତା ପଦଯାତ୍ରାରେ କାରଖାନାର ଆବାସିକ କଲୋନୀରେ କର୍ମଚାରୀ, ଛାତ୍ରୀଛାତ୍ର ସାମିଲ ହୋଇଥିଲେ। ଏହି ଅବସରରେ ପିଲାମାନଙ୍କ ମଧ୍ୟରେ ଖାଦ୍ୟ ପ୍ରସ୍ତୁତି, ପୋଷ୍ଟର ଏବଂ ଅନୁଚ୍ଛେଦ ଲିଖନ ଆଦି ବିଭାଗରେ ପ୍ରତିଯୋଗିତା କରାଯାଇଥିଲା। ଚର୍ମରୋଗ, ଦନ୍ତରୋଗ, ରକ୍ତହୀନତା ଉପରେ ସ୍ବତନ୍ତ୍ର ସ୍କ୍ରିନିଂ ଶିବିର ଅନୁଷ୍ଠିତ ହୋଇଥିଲା।
ମାନବ ସମ୍ବଳ ( ବିଜ୍ନେସ୍ ପାର୍ଟନର) ମୁଖ୍ୟ ସନ୍ଦୀପ ଧୀର, ନିରାପତ୍ତା ବିଭାଗ ମୁଖ୍ୟ ଅଗମ କୁମାର, ଆଇରନ୍ ମେକିଂ ବିଭାଗ ମୁଖ୍ୟ ଅମିତ କୁମାର, କୋକ୍ ଓଭେନ ମୁଖ୍ୟ ଅମର ବାଉ ପ୍ରମୁଖ ଅତିଥି ଭାବେ ଯୋଗଦେଇ ପତାକା ଦେଖାଇ ପଦଯାତ୍ରାକୁ ଉଦ୍ଘାଟନ କରିଥିଲେ। ଶେଷରେ କୃତୀ ପ୍ରତିଯୋଗୀଙ୍କୁ ପୁରସ୍କୃତ କରାଯାଇଥିଲା। ଟାଟାଷ୍ଟିଲ୍ ମେରାମଣ୍ଡଳୀ ମେଡିକାଲ୍ ସର୍ଭିସେସ୍ ଆନୁକୂଲ୍ୟରେ ସମସ୍ତ କାର୍ଯ୍ୟକ୍ରମ ପରିଚାଳିତ ହୋଇଥିଲା।