ଭୁବନେଶ୍ୱର, ୭ା୧୦(ବ୍ୟୁରୋ):କରୋନାରୁ ମୁକ୍ତ ହେବା ପରେ ମଧ୍ୟ ଆକ୍ରାନ୍ତ ବ୍ୟକ୍ତି ସତର୍କ ରହିବା ଦରକାର। ନିୟମିତ ହାତ ଧୋଇବା, ମାସ୍କ ପିନ୍ଧିବା ସହିତ ସାମାଜିକ ଦୂରତା ବଜାୟ ରଖିବା ଏବଂ ପରିବେଶକୁ ସଫାସୁତୁରା ରଖିବା ଆବଶ୍ୟକ। କାରଣ କୋଭିଡ୍ର ଭୟ ଏବେ ବି ଯାଇନି। ଯେଉଁମାନେ କୋଭିଡ୍ରେ ଆକ୍ରାନ୍ତ ହୁଅନ୍ତି ସେମାନେ ଅତ୍ୟନ୍ତ ଅବଶ ହୋଇପଡ଼ନ୍ତି। ତେଣୁ ଆରୋଗ୍ୟ ହେବା ପରେ ଦିନକୁ ୪ରୁ ୫ଥର କମ୍ କମ୍ କରି ଖାଦ୍ୟ ଖାଇବେ। ଖାଦ୍ୟରେ ଭିଟାମିନ୍, ପ୍ରୋଟିନ୍ ଅଂଶ ସହିତ ବିଭିନ୍ନ ଖାଦ୍ୟସାର ଯଥେଷ୍ଟ ରହିବା ଦରକାର। ଫଳରେ ସେମାନଙ୍କର ଅବଶ ଦୂର ହୋଇଯିବ ଓ ସେମାନେ ନିଶ୍ଚିତ ଭାବେ ସୁସ୍ଥ ଅନୁଭବ କରିବେ। ଆରୋଗ୍ୟ ହେବା ପରେ ୨ରୁ ୪ ସପ୍ତାହ ମଧ୍ୟରେ ସେମାନେ ତାଙ୍କର ପୂର୍ବ ସାଧାରଣ ଜୀବନଶୈଳୀକୁ ଫେରିପାଇବେ ବୋଲି କଟକ ଏସ୍ସିବିର ମେଡିସିନ୍ ବିଭାଗ ମୁଖ୍ୟ ଡା. ଜୟନ୍ତ ପଣ୍ଡା କହିଛନ୍ତି। ମଙ୍ଗଳବାର ରାଜ୍ୟ ସରକାରଙ୍କ ପକ୍ଷରୁ ଆୟୋଜିତ ପରାମର୍ଶ ସମ୍ବନ୍ଧୀୟ ଖବରଦାତା ସମ୍ମିଳନୀରେ ଡା. ପଣ୍ଡା ବିଭିନ୍ନ ପ୍ରଶ୍ନର ଉତ୍ତର ଦେଇ କହିଛନ୍ତି ଯେ, ଆରୋଗ୍ୟ ହେବା ପରେ ଅନେକ ରୋଗୀଙ୍କର ନାକ ବନ୍ଦ ହେବା, କାଶ, ମୁଣ୍ଡ ବିନ୍ଧା, ଛାତି ଯନ୍ତ୍ରଣା, ଧଇଁସଇଁ ହେବା ଭଳି ଲକ୍ଷଣ ଲାଗିରହେ। କାରଣ ଏହି ଭୂତାଣୁ ଆମର ଶ୍ୱାସନଳୀକୁ ଆକ୍ରାନ୍ତ କରିଥାଏ। ନାକ, ଗଳା ଓ ଫୁସ୍ଫୁସ୍କୁ ଆକ୍ରାନ୍ତ କରେ। ତେଣୁ ସେମାନେ ଡାକ୍ତରଙ୍କୁ ପରାମର୍ଶ କରିବା ସହିତ ବ୍ୟାୟାମ ଓ ଯୋଗ କରିବା ଉଚିତ। କରୋନା ସଙ୍କଟ ସମୟରେ ଯୋଗ ଚିକିତ୍ସା ଭଳି କାମ କରୁଛି। ଆଜିର ଦିନରେ ସମଗ୍ର ବିଶ୍ୱରେ ଯୋଗକୁ ଗ୍ରହଣ କରାଯାଉଛି। ଯୋଗ ମାଧ୍ୟମରେ ଆଭ୍ୟନ୍ତରୀଣ ଅଙ୍ଗ ବ୍ୟାୟାମ ହୋଇପାରୁଛି। ତେଣୁ ସୁସ୍ଥ ରହିବା ପାଇଁ ଯୋଗର ଆବଶ୍ୟକତା ରହିଛି ବୋଲି ଡା. ପଣ୍ଡା ସୂଚନା ଦେଇଛନ୍ତି।