ବଲାଙ୍ଗୀର ଅଫିସ,୧ା୧୦ ଶୁକ୍ରବାର ବଲାଙ୍ଗୀର ଜିଲା କଣ୍ଟାବାଞ୍ଜି ଏଡିଜେ କୋର୍ଟରେ ବହୁଚର୍ଚ୍ଚିତ ମମିତା ମେହେର ହତ୍ୟା ମାମଲାର ଶୁଣାଣି ପ୍ରକ୍ରିୟାର ସାକ୍ଷ୍ୟ ଗ୍ରହଣ ଚାଲିଥିବା ବେଳେ ବଲାଙ୍ଗୀର ଏସ୍ପି ନିତିନ କୁଶଲକରଙ୍କ ଉପସ୍ଥିତିକୁ ନେଇ ଆପତ୍ତି ଉଠାଯାଇଛି । ଆପତ୍ତି ଉଠାଇଛନ୍ତି ମାମଲାର ଅଭିଯୁକ୍ତ ଗୋବିନ୍ଦ ସାହୁଙ୍କ ଓକିଲ ଦୁର୍ଗା ପାଢୀ । ଏସ୍ପିଙ୍କ ଉପସ୍ଥିତି ସାକ୍ଷ୍ୟ ଗ୍ରହଣ ପ୍ରକ୍ରିୟାକୁ ପ୍ରଭାବିତ କରିବ ବୋଲି ଏଡିଜେଙ୍କୁ ପ୍ରତିପକ୍ଷ ଓକିଲ ପାଢ଼ୀ ଲିଖିତ ଜଣାଇଥିଲେ। ପରେ ଏସଂକ୍ରାନ୍ତରେ ଆଗାମୀ ୧୦ ତାରିଖ ଦିନ ଶୁଣାଣି ହେବ ବୋଲି ନିର୍ଦ୍ଦେଶ ଦେଇ ସାକ୍ଷ୍ୟ ଗ୍ରହଣ ପ୍ରକ୍ରିୟାକୁ ଏଡିଜେ ମୁଲତବୀ ଘୋଷଣା କରିଥିବା ଜଣାପଡିଛି। ଫଳରେ ସାକ୍ଷ୍ୟ ଗ୍ରହଣର ଦୁଇଦିନ ଭିତରେ ଏହି ଶୁଣାଣି ପ୍ରକ୍ରିୟା ଅଟକି ଯାଇଛି। କଣ୍ଟାବାଞ୍ଜି ଏଡିଜେ କୋର୍ଟରେ ଗୁରୁବାର ମମିତା ମେହେର ହତ୍ୟା ମାମଲାର ସାକ୍ଷ୍ୟ ଗ୍ରହଣ ଆରମ୍ଭ ହୋଇଥିଲା। ପ୍ରଥମ ସାକ୍ଷୀ ଭାବେ ଗୁରୁବାର ମୃତ ମମିତାଙ୍କ ବଡବାପା ପୁଅ ଭାଇ ଉମେଶ ମେହେରଙ୍କ ବୟାନ ରେକର୍ଡ କରାଯାଇଥିଲା। ଦ୍ୱିତୀୟ ସାକ୍ଷୀ ଭାବେ ମମିତାଙ୍କ ନିଜ ଭାଇ ବଣ୍ଟି ମେହେର କୋର୍ଟରେ ହାଜର ହୋଇ ସାକ୍ଷ୍ୟ ଦେଇଥିଲେ। ତେବେ ଧାର୍ଯ୍ୟ ସମୟରେ ତାଙ୍କ ସାକ୍ଷ୍ୟ ଗ୍ରହଣ ସରି ନଥିବାରୁ ଏହା ମୁଲତବୀ ରଖାଯାଇଥିଲା। ଶୁକ୍ରବାର ବଣ୍ଟିଙ୍କ ସାକ୍ଷ୍ୟ ଗ୍ରହଣ ସମାପ୍ତ ହୋଇଥିଲା। ଅନ୍ୟ ସାକ୍ଷୀ ଏଫ୍ଆଇଆର ଲେଖିଥିବା ଭାସ୍କର ମେହେର ଓ ମୃତ ମମିତାଙ୍କ ବଡବାପା କୌଶିକ ମେହେର କୋର୍ଟରେ ହାଜର ହୋଇଥିଲେ। ଭାସ୍କର ମେହେରଙ୍କ ସାକ୍ଷ୍ୟ ଗ୍ରହଣ ସରିଥିବା ଜଣାପଡିଛି। କୌଶିକ ମେହେରଙ୍କ ସାକ୍ଷ୍ୟ ଗ୍ରହଣ ଚାଲିଥିବା ବେଳେ କୋର୍ଟରୁମ୍ ଭିତରେ ବଲାଙ୍ଗୀର ଏସପି କୁଶଲକରଙ୍କ ଉପସ୍ଥିତିକୁ ନେଇ ପ୍ରତିପକ୍ଷ ଓକିଲ ପାଢ଼ୀ ଆପତ୍ତି ଉଠାଇଥିଲେ। ଫଳରେ ଚତୁର୍ଥ ସାକ୍ଷୀ କୌଶିକଙ୍କ ସାକ୍ଷ୍ୟ ଗ୍ରହଣ ସମ୍ପୂର୍ଣ୍ଣ ହୋଇପାରିନଥିବା ଜଣାପଡିଛି। ମମିତା ମେହେର ଶୁଣାଣି ପ୍ରକ୍ରିୟା ଆରମ୍ଭ ହେବା ପରେ ପୁଣି ଥରେ ଏହି ହତ୍ୟାକାଣ୍ଡ ଚର୍ଚ୍ଚାର ବିଷୟ ହୋଇଛି।