ଭୁବନେଶ୍ୱର,୨୩।୧୨(ସ୍ପୋଟର୍ସ ବ୍ୟୁରୋ): ଭୁବନେଶ୍ୱର ଓ କଟକର ବିଭିନ୍ନ ଗ୍ରାଉଣ୍ଡରେ ଓଡ଼ିଶା କ୍ରିକେଟ ଆସୋସିଏଶନ(ଓସିଏ) ଆନୁକୂଲ୍ୟରେ ଚାଲିଥିବା ଆନ୍ତଃ ଜିଲା ସିନିୟର ପୁରୁଷ ଟି ୨୦ କ୍ରିକେଟ ଲିଗ୍ ଶେଷ ହୋଇଛି। ଏଥିରେ କଟକ ଏ’ ଚାମ୍ପିୟନ ହୋଇଛି। ମଙ୍ଗଳବାର ବାରବାଟୀ ଷ୍ଟାଡିୟମରେ ଖେଳାଯାଇଥିବା ଫାଇନାଲ ମ୍ୟାଚ୍ରେ କଟକ ଏ’ ଇକୋର୍ସାକୁ ୭ ରନରେ ପରାସ୍ତକରି ଟାଇଟଲ ହାସଲ କରିଛି। ଟସ୍ ହାରି ବ୍ୟାଟିଂ ପାଇଁ ଆମନ୍ତ୍ରଣ ପାଇଥିବା କଟକ ୧୯.୫ ଓଭରରେ ୧୩୦ ରନକରି ଅଲଆଉଟ ହୋଇଥିଲା। ଦଳ ତରଫରୁ ରାମଚନ୍ଦ୍ର ବେହେରା ୩୪, ବିପ୍ଳବ ସାମନ୍ତରାୟ ୩୨, ଦୀପକ ବେହେରା ୨୩ ରନ ସଂଗ୍ରହ କରିଥିଲେ। ବୋଲିଂରେ ଇକୋର୍ସ ତରଫରୁ ଜୟନ୍ତ ବେହେରା, ସୂର୍ଯ୍ୟକନ୍ତ ପ୍ରଧାନ ଓ ଆଲୋକ ମଙ୍ଗରାଜ ୨ଟି ଲେଖାଏ ଉଇକେଟ ଅକ୍ତିଆର କରିଥିଲେ।
ଜବାବରେ ଇକୋର୍ସା ୭ ଉଇକେଟ ହରାଇ ୧୨୩ ରନରେ ସୀମିତ ରହି ପରାସ୍ତ ହୋଇଥିଲା। ଦଳ ତରଫରୁ ରାଜେଶ ମହାନ୍ତି ଅପରାଜିତ ୩୫, ଅଙ୍କିତ ଯାଦବ ୨, କାମେଶ୍ୱର ବାରିକ ୨୨ ରନ ସଂଗ୍ରହ କରିଥିଲେ। ବୋଲିଂରେ କଟକ ତରଫରୁ ସୁନୀଲ ରାଉଳ ଓ ଆଶିଷ ରାୟ ୨ଟି ଲେଖାଏ ଉଇକେଟ ନେଇଥିଲେ। ମୁଖ୍ୟ ଅତିଥିଭାବେ ଓସିଏ ପୂର୍ବତନ ସମ୍ପାଦକ ଆଶୀର୍ବାଦ ବେହେରା, ସଭାପତି ପଙ୍କଜ ଲୋଚନ ମହାନ୍ତି, ଉପ ସଭାପତି ଅକ୍ଷୟ କୁମାର ସାମନ୍ତ, ସମ୍ପାଦକ ସଞ୍ଜୟ ବେହେରା, କୋଷାଧ୍ୟକ୍ଷ ବିକାଶ ପ୍ରଧାନ ଓ ଆପେକ୍ସ କାଉନସିଲ ସଦସ୍ୟ ସୁବାଶିସ୍ ସେନାପତି ଫାଇନାଲ ମ୍ୟାଚ୍ରେ ଯୋଗଦେଇ କଟକ ଏ’ ଦଳକୁ ଚାମ୍ପିୟନ ଟ୍ରଫି ପ୍ରଦାନ କରିଥିଲେ। ଅମ୍ପାୟର ସୁବ୍ରତ ଦାସ ଓ ଦୁର୍ଗାଦତ୍ତ ଦାସ ମ୍ୟାଚ୍ ପରିଚାଳନା କରିଥିଲେ। ସେହିପରି ପ୍ରସନ୍ନ ମହାପାତ୍ର ରେଫରି ଦାୟିତ୍ୱ ତୁଲାଇଥିଲେ।