ଭୁବନେଶ୍ୱର,୨୧।୧୨(ସ୍ପୋର୍ଟ୍ସ ବ୍ୟୁରୋ): ଭୁବନେଶ୍ୱର ଓ କଟକର ବିଭିନ୍ନ ଗ୍ରାଉଣ୍ଡରେ ଓଡ଼ିଶା କ୍ରିକେଟ ଆସୋସିଏଶନ(ଓସିଏ) ଆନୁକୂଲ୍ୟରେ ଚାଲିଥିବା ଆନ୍ତଃ ଜିଲା ସିନିୟର ପୁରୁଷ ଟି ୨୦ କ୍ରିକେଟ ଲିଗ୍ରେ ରବିବାର ସୁପରଲିଗ୍ର ଦୁଇଟି ମ୍ୟାଚ ଖେଳାଯାଇଛି। ଏଥିରେ କଟକ-ଏ ଓ ଇକୋର୍ସା ବିଜୟ ହାସଲ କରିଛନ୍ତି।
ରେଭନ୍ସା ଗ୍ରାଉଣ୍ଡରେ ଖେଳାଯାଇଥିବା ପ୍ରଥମ ମ୍ୟାଚରେ ବାଲେଶ୍ୱର ଓ କଟକ-ଏ ପରସ୍ପରକୁ ଭେଟିଥିଲେ। ଏହି ଲୋ ସ୍କୋରିଂ ମ୍ୟାଚରେ କଟକ ୭ ଉଇକେଟରେ ବିଜୟ ହାସଲ କରିଛି। ଟସ୍ ଜିତି ବାଲେଶ୍ୱର ପ୍ରଥମେ ବ୍ୟାଟିଂ କରି ୧୮.୩ ଓଭରରେ ମାତ୍ର ୭୩ ରନକରି ଅଲଆଉଟ ହୋଇଥିଲା। ଦଳ ତରଫରୁ ଖଗେଶ ମିଶ୍ର ୧୨ ଓ ନାଉଥାମ୍ ଭଞ୍ଜ ୧୧ ରନକରି ଆଉଟ ହୋଇଥିବା ବେଳେ ଅନ୍ୟମାନେ ଦୁଇଅଙ୍କ ଛୁଇଁ ପାରି ନ ଥିଲେ। ବୋଲିଂରେ କଟକ ତରଫରୁ ସୁନୀଲ ରାଉଲ ୪, ଦୀପକ ବେହେରା ଓ ସୌରଭ କାନୋଜିଆ ୨ଟି ଲେଖାଏ ଉଇକେଟ ଅକ୍ତିଆର କରିଥିଲେ। ଜବାବରେ କଟକ ୧୪.୩ ଓଭରରେ ୩ ଉଇକେଟ ହରାଇ ୭୪ ରନକରି ବିଜୟୀ ହୋଇଥିଲା। ଦଳ ତରଫରୁ ଅରବିନ୍ଦ ସିଂ ଅପରାଜିତ ୨୩, ଜ୍ୟୋତି ରଞ୍ଜଦ ଦଳାଇ ୨୨ ରନ ସଂଗ୍ରହ କରିଥିଲେ। ବାଲେଶ୍ୱରର ଶେଖର ମାଝି ଗୋଟିଏ ଉଇକେଟ ଅକ୍ତିଆର କରିଥିଲେ। ଓସିଏ ସଦସ୍ୟ ରବିନାରାୟଣ ପଣ୍ଡା ଅତିଥି ଭାବେ ଏହି ମ୍ୟାଚରେ ଯୋଗ ଦେଇଥିଲେ।
କିଟ୍ ଗ୍ରାଉଣ୍ଡରେ ରବିବାର ଅନୁଷ୍ଠିତ ଦ୍ୱିତୀୟ ମ୍ୟାଚରେ ଇକୋର୍ସା ୯ ଉଇକେଟରେ ଭୁବନେଶ୍ୱର-ଏ’କୁ ପରାସ୍ତ କରିଛି। ଟସ୍ ହାରି ବ୍ୟାଟିଂ ପାଇଁ ଆମନ୍ତ୍ରଣ ପାଇଥିବା ଭୁବନେଶ୍ୱର ୧୮.୧ ଓଭରରେ ୯୨ ରନକରି ଅଲଆଉଟ ହୋଇଥିଲା। ଦଳ ତରଫରୁ ଶାନ୍ତନୁ ମିଶ୍ର ସର୍ବାଧିକ ୪୨, ଅନୁରାଗ ଷଡ଼ଙ୍ଗୀ ୧୦, ଦେବାଶିଷ ସାମନ୍ତରାୟ ୧୦ରନ ସଂଗ୍ରହ କରି ଆଉଟ ହୋଇଥିବା ବେଳେ ଅନ୍ୟମାନେ ଦୁଇଅଙ୍କ ଛୁଇଁ ପାରି ନ ଥିଲେ। ବୋଲିଂରେ ଇକୋର୍ସା ତରଫରୁ ଦ୍ରୁତ ବୋଲର ସୂର୍ଯ୍ୟକାନ୍ତ ପ୍ରଧାନ ସର୍ବାଧିକ ୪, ଜୟନ୍ତ ବେହେରା ଓ ଆଲୋକ ମଙ୍ଗରାଜ ୨ଟି ଲେଖାଏ ଉଇକେଟ ଅକ୍ତିଆର କରିଥିଲେ। ଜବାବରେ ଇକୋର୍ସା ୧୫.୪ ଓଭରରେ ଗୋଟିଏ ଉଇକେଟ ହରାଇ ୯୫ ରନ କରି ବିଜୟୀ ହୋଇଛି। ଦଳ ତରଫରୁ କାମେଶ୍ୱର ବାରିକ ଅପରାଜିତ ୪୩, ଗିରିଜା ରାଉତ ୨୭ ରନ ସଂଗ୍ରହ କରିଥିଲେ। ବୋଲିଂରେ ଭୁବନେଶ୍ୱର ତରଫରୁ ମନୋଜ ବାରିକ ଏକମାତ୍ର ଉଇକେଟ ହାସଲ କରିଥିଲେ। ଓସିଏ ତଥା ମଙ୍ଗଳା କ୍ଲବ ସଦସ୍ୟ ଶିବବ୍ରତ ମଲିକ୍ ଅତିଥି ଭାବେ ଏହି ମ୍ୟାଚରେ ଉପସ୍ଥିତ ଥିଲେ।