*ଇକୋର୍ସା, ଖୋର୍ଦ୍ଧାର ବୃହତ୍ ବିଜୟ
* ଜୟନ୍ତ ବେହେରାଙ୍କୁ ୬ ଉଇକେଟ ସଫଳତା
ଭୁବନେଶ୍ୱର, ୧୭।୧୨(କ୍ରୀଡ଼ା ପ୍ରତିନିଧି)- ଓଡ଼ିଶା କ୍ରିକେଟ ଆସୋସିଏଶନ (ଓସିଏ) ଆନୁକୂଲ୍ୟରେ ଭୁବନେଶ୍ୱର ଓ କଟକର ୯ଟି ଭେନ୍ୟୁରେ ଚାଲିଥିବା ଆନ୍ତଃଜିଲା ସିନିୟର ପୁରୁଷ ଟି୨୦ କ୍ରିକେଟ ଲିଗ୍ରେ ବୁଧବାର ମଧ୍ୟ ୧୮ଟି ମ୍ୟାଚ ଅନୁଷ୍ଠିତ ହୋଇଛି। ଏହା ମଧ୍ୟରେ କଟକ-ଏ, ଭଦ୍ରକ, ସୁନ୍ଦରଗଡ଼ ୧୦ ଉଇକେଟରେ ବିଜୟୀ ହୋଇଛନ୍ତି। ସେହିପରି ଇକୋର୍ସା ୧୪୫ ରନରେ ରାୟଗଡ଼ାକୁ ଏବଂ ଖୋର୍ଦ୍ଧା ୧୬୦ ରନରେ କଳାହାଣ୍ଡିକୁ ହରାଇ ବୃହତ୍ ବିଜୟ ହାସଲ କରିଛନ୍ତି।
ନିମପୁର ପଡ଼ିଆରେ ଅନୁଷ୍ଠିତ ମ୍ୟାଚରେ କଟକ-ଏ ୧୦ ଉଇକେଟରେ ଜଗତସିଂହପୁରକୁ ପରାସ୍ତ କରିଛି। ଜଗତସିଂହପୁରର ଶାମସୁଲ ଖାଁ ୫୯ ଓ କଟକ-ଏର ରାଜେଶ ଧୂପର ୬୩* ରନ ସ୍କୋର କରିଥିଲେ। ଏଠାରେ ଅନୁଷ୍ଠିତ ଅନ୍ୟ ଏକ ମ୍ୟାଚରେ ବାଲେଶ୍ୱର ୨୪ ରନରେ ରାଉରକେଲାକୁ ହରାଇଛି। ବିଜୟୀ ଦଳର ନିର୍ବିଶଙ୍କର ବାରିକ ସର୍ବାଧିକ ୫୪ ରନ କରିଥିଲେ। ଡ୍ରିମ୍ସ ଗ୍ରାଉଣ୍ଡ ମ୍ୟାଚରେ କେନ୍ଦୁଝର ୫୯ ରନରେ ମାଲକାନଗିରିକୁ ଏବଂ ଭଦ୍ରକ ୧୦ ଉଇକେଟରେ ଗଜପତିକୁ ହରାଇ ଦେଇଛି। ମାଲକାନଗିରିର କେ. ସନ୍ଦୀପ ୫୧ ରନ କରିଥିଲେ। ବାରବାଟୀ ଷ୍ଟାଡିୟମରେ ଆୟୋଜିତ ମ୍ୟାଚରେ ନୟାଗଡ଼ ୭ ରନରେ ସୋନପୁରକୁ ଏବଂ ଯାଜପୁର ୪୪ ରନରେ ମୟୂରଭଞ୍ଜକୁ ହରାଇ ଦେଇଛି। ଯାଜପୁରର ନିଶିକାନ୍ତ ରାଉତ ୭୯ ରନ ସ୍କୋର କରିଥିଲେ। ବିକାଶ ଗ୍ରାଉଣ୍ଡ ମ୍ୟାଚରେ ଭୁବନେଶ୍ୱର-ଏ ୩ ଉଇକେଟରେ ସମ୍ବଲପୁରକୁ ଏବଂ ଭୁବନେଶ୍ୱର-ବି ୨୬ ରନରେ ବଲାଙ୍ଗୀରକୁ ପରାସ୍ତ କରିଛି। ସେଞ୍ଚୁରିଅନ ପଡ଼ିଆରେ ଅନୁଷ୍ଠିତ ୨ ମ୍ୟାଚରେ ବୌଦ୍ଧ ୩୮ ରନରେ ପୁରୀକୁ ଏବଂ ଝାରସୁଗୁଡ଼ା ୯ ଉଇକେଟରେ କନ୍ଧମାଳକୁ ପରାସ୍ତ କରିଛି।
ରେଭେନ୍ସା ଗ୍ରାଉଣ୍ଡ ମ୍ୟାଚରେ ସୁନ୍ଦରଗଡ଼ ୧୦ ଉଇକେଟରେ କିଟ୍କୁ ଏବଂ ବରଗଡ଼ ୯ ଉଇକେଟରେ ନୂଆପଡ଼ାକୁ ହରାଇ ଦେଇଛି। ସୁନ୍ଦରଗଡ଼ ପକ୍ଷରୁ ଅଙ୍କିତ ସିଂ ୭୦*, ଆଶିଷ ପରିଜା ୫୪* ଏବଂ ବରଗଡ଼ର ରୂପକ ପ୍ରଧାନ ୫୭ ରନ ସ୍କୋର କରିଥିଲେ। କିଟ୍ ପଡ଼ିଆରେ ଅନୁଷ୍ଠିତ ମ୍ୟାଚଦ୍ୱୟରେ ଯଥାକ୍ରମେ ଇକୋର୍ସା ୧୪୫ ରନରେ ରାୟଗଡ଼ାକୁ ଏବଂ ଢେଙ୍କାନାଳ ୬୫ ରନରେ ଦେବଗଡ଼କୁ ପରାସ୍ତ କରିଛି। ଅଭିଷେକ ଯାଦବଙ୍କ ୮୮ ଓ ଅଙ୍କିତ ଯାଦବଙ୍କ ୭୦ ରନ ସହାୟତାରେ ଇକୋର୍ସା ୬ ଉଇକେଟ ହରାଇ ୨୧୨ ରନ କରିଥିବାବେଳେ ରାୟଗଡ଼ା ୬୭ ରନରେ ଅଲଆଉଟ ହୋଇ ଯାଇଥିଲା। ଇକୋର୍ସାର ଜୟନ୍ତ ବେହେରା ୧୩ ରନ ବିନିମୟରେ ୬ ଉଇକେଟ ସଫଳତା ପାଇଥିଲେ। ଦ୍ୱିତୀୟ ମ୍ୟାଚରେ ଢେଙ୍କାନାଳର ବିକାଶ ରାଉତ ୫୦ ରନରେ ଅପରାଜିତ ରହିଥିଲେ। ଟାଉନ୍ କ୍ଲବ ପଡ଼ିଆରେ ଖୋର୍ଦ୍ଧା ୧୬୦ ରନରେ କଳାହାଣ୍ଡିକୁ ହରାଇଛି। ରାକେଶ ପଟ୍ଟନାୟକଙ୍କ ୯୬, ସିଦ୍ଧାନ୍ତ ଜେନାଙ୍କ ୮୪ ଓ ଇନ୍ଦୁରୁ ଗିରିଙ୍କ ୫୦ ରନ ସହାୟତାରେ ଖୋର୍ଦ୍ଧା ୫ ଉଇକେଟ ହରାଇ ୨୯୧ ରନ କରିଥିଲା। ଜବାବରେ କଳାହାଣ୍ଡି ୮ ଉଇକେଟ ହରାଇ ୧୩୧ ରନ କରିବାକୁ ସମର୍ଥ ହୋଇଥିଲା। ଏଠାରେ ଅନୁଷ୍ଠିତ ଅନ୍ୟ ଏକ ମ୍ୟାଚରେ କଟକ-ବି ୧୮ ରନରେ ନବରଙ୍ଗପୁରକୁ ପରାସ୍ତ କରିଛି। ବିଜୟୀ ଦଳ ପକ୍ଷରୁ ଅବିନାଶ ନାୟକ ୬୫* ଏବଂ ନବରଙ୍ଗପୁରର ସୁକେଶ ହୀରା ୬୭ ରନ ସ୍କୋର କରିଥିଲେ। ବିଡାନାସୀ ପଡ଼ିଆ ମ୍ୟାଚରେ ଯଥାକ୍ରମେ ଗଞ୍ଜାମ ୭୩ ରନରେ କୋରାପୁଟକୁ ଏବଂ କେନ୍ଦ୍ରାପଡ଼ା ୮ ଉଇକେଟରେ ପାରାଦୀପକୁ ହରାଇ ଦେଇଛି। ଅଜୟ ଗୌରଙ୍କ ୮୯ ଓ ଈଶ୍ୱର ପ୍ରସାଦଙ୍କ ୬୯* ରନ ବଳରେ ଗଞ୍ଜାମ ୩ ଉଇକେଟ ହରାଇ ୨୦୧ ରନ କରିଥିଲା। ଜବାବରେ କୋରାପୁଟ ୭ ଉଇକେଟ ହରାଇ ୧୨୮ ରନରେ ସୀମିତ ରହିଥିଲା। ଦଳ ପକ୍ଷରୁ ଜି.ସି. ଶେଖର ସର୍ବାଧିକ ୫୫ ରନ କରିଥିଲେ। ଦ୍ୱିତୀୟ ମ୍ୟାଚରେ ପାରାଦୀପ ପକ୍ଷରୁ ଇଲୁ ଗୋଚ୍ଛାୟତ ୭୬ ଏବଂ କେନ୍ଦ୍ରାପଡ଼ାର ବିଶ୍ୱଭୂଷଣ ବିହାରୀ ୫୫* ରନ ସ୍କୋର କରିଥିଲେ।