ଭୁବନେଶ୍ୱର, ୨୪।୨ (କ୍ରୀଡ଼ା ପ୍ରତିନିଧି)-ଓଡ଼ିଶା କ୍ରିକେଟ ଆସୋସିଏଶନ (ଓସିଏ) ଆନୁକୂଲ୍ୟରେ ଅନୁଷ୍ଠିତ ୧୯ ବର୍ଷରୁ କମ୍ ଆନ୍ତଃଜିଲା କ୍ରିକେଟ ଟୁର୍ନାମେଣ୍ଟରେ ଭୁବନେଶ୍ୱର ‘ଏ’ ଚାମ୍ପିୟନ ହୋଇଛି। ମଙ୍ଗଳବାର ଡ୍ରିମ୍ସ ଗ୍ରାଉଣ୍ଡରେ ଅନୁଷ୍ଠିତ ଫାଇନାଲରେ ଭୁବନେଶ୍ୱର ‘ଏ’ ଦଳ ୬ ଉଇକେଟରେ କଟକ ‘ଏ’କୁ ପରାସ୍ତ କରିଛି। କଟକ ଦଳ ପକ୍ଷରୁ ଧାର୍ଯ୍ୟ ୧୫୨ ରନର ବିଜୟ ଲକ୍ଷ୍ୟକୁ ଭୁବନେଶ୍ୱର ୩୮.୩ ଓଭରରେ ୪ ଉଇକେଟ ହରାଇ ହାସଲ କରି ନେଇଥିଲା।
ଲିଗ୍ ପର୍ଯ୍ୟାୟରେ ଭଲ ପ୍ରଦର୍ଶନ କରିଥିବା କଟକ ‘ଏ’ ଫାଇନାଲରେ ଟସ୍ ଜିତି ପ୍ରଥମେ ବ୍ୟାଟିଂ କରିଥିଲେ ହେଁ ବ୍ୟାଟିଂ ବିପର୍ଯ୍ୟୟରେ ପଡ଼ି ୪୭ ଓଭରରେ ୧୫୧ ରନ କରି ଅଲଆଉଟ ହୋଇଯାଇଥିଲା। ଦଳ ପକ୍ଷରୁ ଅଧିନାୟକ ଶଶାଙ୍ଗ ରୁଙ୍ଗଟା ସର୍ବାଧିକ ୪୭ ରନ କରିଥିଲେ। ଭୁବନେଶ୍ୱର ଦଳର ବୋଲରଙ୍କ ମଧ୍ୟରେ ଆଶୁତୋଷ ନାୟକ, ସମ୍ବିତ ବରାଳ ଓ ଅଂଶୁମାନ ବେଜ୍ ୩ଟି ଲେଖାଏ ଉଇକେଟ ନେଇଥିଲେ। ଶୁଭମ୍ ଶ୍ରୀଙ୍କୁ ଗୋଟିଏ ଉଇକେଟ ମିଳିଥିଲା। ବିଜୟ ହାସଲ ପାଇଁ ଭୁବନେଶ୍ୱର ‘ଏ’ କୁ ବିଶେଷ କଷ୍ଟ କରିବାକୁ ପଡ଼ି ନ ଥିଲା। ଦଳ ମାତ୍ର ୧୭ ରନରେ ପ୍ରଥମ ଉଇକେଟ ହରାଇଥିଲେ ହେଁ ୩୮.୩ ଓଭରରେ ୪ ଉଇକେଟ ହରାଇ ୧୫୫ ରନ ସଂଗ୍ରହ କରି ନେଇଥିଲା। ଏମ୍.ଜି. ଗୋପାଳ ସର୍ବାଧିକ ୪୪ ରନ କରିଥିଲେ। ଓପନର ତନୟ ବିଶ୍ୱାଳ ୨୭ ରନ କରି ଆଉଟ ହୋଇଥିବାବେଳେ ଶେଷରେ ସାଇ ଶୁଭମ୍ ୩୧ ଓ ସମ୍ବିତ ଦ୍ରୁତ ୨୮(୧୩ ବଲ, ୩ ଚୌକା, ୨ ଛକା) ରନ କରି ଅପରାଜିତ ରହିଥିଲେ। ପରାଜିତ ଦଳର ସାଇଦୀପ ମହାପାତ୍ର ଓ ଭକ୍ତିସାଗର ନାୟକ ଗୋଟିଏ ଲେଖାଏ ଉଇକେଟ ନେଇଥିଲେ। ପ୍ରୀତିରଞ୍ଜନ ବିଜୟ ସିଂ ଓ ସମ୍ବିତ ପଟ୍ଟନାୟକ ଫିଲ୍ଡ ଅମ୍ପାୟର ଏବଂ ଦୁର୍ଗାଦତ୍ତ ଦାସ ତୃତୀୟ ଅମ୍ପାୟର ଥିଲେ। ବିଶ୍ୱରଞ୍ଜନ ଦାସ ଓ ବିବେକାନନ୍ଦ ରାଉତ ସ୍କୋରର ଦାୟିତ୍ୱ ନିର୍ବାହ କରିଥିଲେ। ଅଲରାଉଣ୍ଡ ପ୍ରଦର୍ଶନ ପାଇଁ ସମ୍ବିତ ବରାଳଙ୍କୁ ମ୍ୟାନ ଅଫ୍ ଦି ମ୍ୟାଚ ପୁରସ୍କାର ପ୍ରଦାନ କରାଯାଇଥିଲା। ଡ୍ରିମ୍ସ ଅଧ୍ୟକ୍ଷ ପ୍ରମୋଦ ଚନ୍ଦ୍ର ରଥ ମୁଖ୍ୟ ଅତିଥି ଏବଂ ଓସିଏ ସଭାପତି ପଙ୍କଜ ଲୋଚନ ମହାନ୍ତି ଓ ସିଇଓ ସୁବ୍ରତ କୁମାର ବେହେରା ସମ୍ମାନିତ ଅତିଥିଭାବେ ଯୋଗଦେଇ ପୁରସ୍କାର ପ୍ରଦାନ କରିଥିଲେ।
