ଭୁବନେଶ୍ୱର,୯।୫(ସ୍ପୋର୍ଟ୍ସ ବ୍ୟୁରୋ): ପୂର୍ବତନ କ୍ରିକେଟର ତଥା ସିନିୟର ଚୟନ କମିଟି ସଦସ୍ୟ ରବିନାରାୟଣ ପଣ୍ଡାଙ୍କ ଅକାଳ ବିୟୋଗରେ ଓଡ଼ିଶା କ୍ରିକେଟ ଆସୋସିଏଶନ (ଓସିଏ) ଶୋକ ପ୍ରକାଶ କରିଛି। ଆସୋସିଏଶନର ସମସ୍ତ କର୍ମକର୍ତ୍ତା ଓ ପଦାଧିକାରୀ ଶୋକ ଜଣାଇଛନ୍ତି। କୋଭିଡ୍-୧୯ ଲକ୍ଷଣ ଦେଖାଦେଇଥିବାରୁ ତାଙ୍କୁ ଭୁବନେଶ୍ୱରର ଏକ ହସ୍ପିଟାଲ୍ରେ ଭର୍ତ୍ତି କରାଯାଇଥିଲା। ତେବେ ସେ ଶୁକ୍ରବାର ରାତି ୯.୩୦ରେ ପରଲୋକ ଗମନ କରିଥିଲେ। ମୃତ୍ୟୁ ବେଳକୁ ତାଙ୍କୁ ୬୨ ବର୍ଷ ବୟସ ହୋଇଥିଲା।
ସେ ରାଜ୍ୟ ପାଇଁ ପ୍ରଥମ ଶ୍ରେଣୀ କ୍ରିକେଟ ଖେଳିଥିଲେ ଓ ୩୦ଟି ମ୍ୟାଚ୍ରେ ପ୍ରତିନିଧିତ୍ୱ କରି ୯୦୦ରୁ ଊର୍ଦ୍ଧ୍ୱ ରନ ସଂଗ୍ରହ କରିଥିଲେ। ସେ ମଧ୍ୟ ପୂର୍ବାଞ୍ଚଳ ଦଳ ତରଫରୁ ପ୍ରତିନିଧିତ୍ୱ କରିଥିଲେ। ସେ ଷ୍ଟିଲ୍ ଅଥରିଟି ଅଫ୍ ଇଣ୍ଡିଆ ଲିମିଟେଡ (ଏସ୍ଏଆଇଏଲ୍)ରେ ଚାକିରି କରୁଥିଲେ। ସେ ରାଉରକେଲା ଓ ଭିଲାଇରେ ଚାକିରି କରିଛନ୍ତି। ଭିଲାଇ ପ୍ଲାଣ୍ଟର ଏସ୍ଏଆଇଏଲ୍ର ଜେନେରାଲ ମ୍ୟାନେଜର ଭାବେ ସେ ଅବସର ଗ୍ରହଣ କରିଥିଲେ। କିଛିଦିନ ତଳେ ତାଙ୍କ ପୁଅଙ୍କର ଦେହାନ୍ତ ହୋଇଥିଲା। ମୃତ୍ୟୁ ବେଳକୁ ସ୍ତ୍ରୀ ଓ ଝିଅ ପାଖରେ ରହିଥିଲେ। କ୍ରିକେଟ ଓ କ୍ରୀଡ଼ା ପ୍ରଶାସନ ପ୍ରତି ତାଙ୍କର ଯଥେଷ୍ଟ ଅବଦାନ ରହିଥିଲା। ତାଙ୍କ ଦେହାନ୍ତରେ ଓଡ଼ିଶା କ୍ରୀଡ଼ାରେ ଏକ ଶୂନ୍ୟସ୍ଥାନ ସୃଷ୍ଟି ହୋଇଛି ବୋଲି ଓସିଏ ତରଫରୁ କୁହାଯାଇଛି। ତାଙ୍କ ପରିବାରକୁ ଭଗବାନ ଏହି ଦୁଃଖଦ ସମୟରେ ଶକ୍ତି ଦିଅନ୍ତୁ। ତାଙ୍କ ଆତ୍ମାର ସଦ୍ଗତି ହେଉ ବୋଲି ଓସିଏ ତରଫରୁ ଶୋକବାର୍ତ୍ତାରେ କୁହାଯାଇଛି।
