‘ଓଡିସିଏଲ୍‌ ୟୁନିଟ୍‌ ବିକ୍ରି କରା ନ ଯାଉ’

ଭୁବନେଶ୍ୱର, ୨୪ା୫(ବ୍ୟୁରୋ):ମହାମାରୀ ସମୟରେ ଓଡ଼ିଶାରେ ଥିବା ଏକମାତ୍ର ଔଷଧ ବିନିର୍ମାଣ ୟୁନିଟ୍‌ ଓଡ଼ିଶା ଡ୍ରଗ୍ସ ଆଣ୍ଡ୍‌ କେମିକାଲ୍ସ ଲିମିଟେଡ୍‌ (ଓଡିସିଏଲ୍‌)କୁ ବିକ୍ରି କରିବାକୁ କେନ୍ଦ୍ର ସରକାର ନିଷ୍ପତ୍ତି ନେଇଛନ୍ତି। ଉଭୟ କେନ୍ଦ୍ର ଏବଂ ଓଡ଼ିଶା ସରକାରଙ୍କ ମିଳିତ ଉଦ୍ୟମରେ ରହିଥିବା ଏହି କାରଖାନା ଲାଭଦାୟୀ ହୋଇଥିବାବେଳେ ଆଶ୍ଚର୍ଯ୍ୟଜନକ ଭାବେ କେନ୍ଦ୍ର ସରକାର ଏହାକୁ ସମ୍ପୂର୍ଣ୍ଣ ବନ୍ଦ କରିବାକୁ ଯାଉଛନ୍ତି। ଏହି ମୂଲ୍ୟବାନ୍‌ ୟୁନିଟ୍‌କୁ କିପରି ବନ୍ଦ କରା ନ ଯିବ, ସେଥିରେ ହସ୍ତକ୍ଷେପ କରିବାକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ପୂର୍ବତନ କେନ୍ଦ୍ରମନ୍ତ୍ରୀ ଶ୍ରୀକାନ୍ତ ଜେନା ଚିଠି ଲେଖି ଅନୁରୋଧ କରିଛନ୍ତି।
ଶ୍ରୀକାନ୍ତ ତାଙ୍କ ଚିଠିରେ ଉଲ୍ଲେଖ କରିଛନ୍ତି ଯେ, ଓଡିସିଏଲ୍‌ ହେଉଛି ଏକ ଲାଭଦାୟକ ୟୁନିଟ୍‌। ଏଥିରେ ରାଜ୍ୟ ସରକାର ଏବଂ ଇପିକଲର ୪୯ ପ୍ରତିଶତ ଅଂଶଧନ ରହିଛି। ଏହାସତ୍ତ୍ୱେ ଏଗୁଡିକ ଓଡିସିଏଲକୁ ବିକ୍ରି କରିବା ନେଇ ସମ୍ମତି ପ୍ରଦାନ କରିବା ତାଙ୍କୁ ଆଶ୍ଚର୍ଯ୍ୟ କରୁଛି ବୋଲି ଶ୍ରୀକାନ୍ତ କହିଛନ୍ତି। ଓଡିସିଏଲ୍‌ ୨୦୧୦-୧୧ରୁ ୨୦୨୦ ଡିସେମ୍ବରରେ ବନ୍ଦ ହେବା ପର୍ଯ୍ୟନ୍ତ ଲାଭ କରିଛି। ଏହାର ବାର୍ଷିକ ଲାଭ ପାଖାପାଖି ୨ କୋଟି ଟଙ୍କା ସହିତ ବାର୍ଷିକ ୧୦୦ କୋଟି ଟଙ୍କା ବେପାର କରିଥାଏ। ବିଗତ ବର୍ଷଗୁଡ଼ିକରେ ଥିବା ବକେୟା ପରିଶୋଧ କରି ଏହି କମ୍ପାନୀ ଋଣମୁକ୍ତ ହୋଇଥିଲା ବୋଲି ସେ କହିଛନ୍ତି। ଏହାସହ ସେ କେନ୍ଦ୍ରମନ୍ତ୍ରୀ ଥିବାବେଳେ ଉପା-୨ ସରକାରଙ୍କଠାରୁ ଓଡିସିଏଲ୍‌ ୫ କୋଟି ଟଙ୍କାର ଇନ୍‌ଫ୍ୟୁଜନ୍‌ ପାଇଥିଲା। ଯାହାଫଳରେ ଏହା ଏକ ଭାଏବଲ ୟୁନିଟ୍‌ ଭାବେ ଆଗକୁ ବଢ଼ିବାରେ ସହାୟକ ହୋଇଥିଲା। କେନ୍ଦ୍ର ସରକାରଙ୍କ ଦ୍ୱାରା ଅଧିକୃତ ଅତ୍ୟାବଶ୍ୟକ ଔଷଧ ଏହି ୟୁନିଟ୍‌ରେ ଉପତ୍ାଦନ କରାଯାଉଥିଲା। ବାର୍ଷିକ ୨ କୋଟି କ୍ୟାପ୍‌ସୁଲ, ୩ କୋଟି ବଟିକା, ୨୫ ଲକ୍ଷ ଓଆର୍‌ଏସ୍‌, ୨ ଲକ୍ଷ ଲିକ୍ୱିଡ୍‌ ଓରାଲ, ୩୦ ଲକ୍ଷ ଇଞ୍ଜେକ୍‌ଶନ୍‌ ଏଠାରେ ଉପତ୍ାଦନ ହୋଇପାରୁଥିଲା। ଏହି ୟୁନିଟ୍‌ରୁ ଅନ୍ୟ ରାଜ୍ୟକୁ ଉପତ୍ାଦ ବିକ୍ରି ହେଉଥିବାବେଳେ ଓଡ଼ିଶା ସରକାର ଏଠାରୁ କୌଣସି ଗୋଟିଏ ମଧ୍ୟ ଅର୍ଡର କରିନାହାନ୍ତି। ବର୍ତ୍ତମାନ ଏହି ୟୁନିଟ୍‌ର ଜମି ମୂଲ୍ୟ ପାଖାପାଖି ୨୦୦ କୋଟି ଟଙ୍କା ହେବ। ୧୯୭୭ରେ ଜନତା ପାର୍ଟି ସରକାର ପକ୍ଷରୁ ଓଡିସିଏଲ୍‌ ଓଡ଼ିଶାକୁ ଏକ ଉପହାର ଥିଲା। ଏହାର ମୁଖ୍ୟ ଉଦ୍ଦେଶ୍ୟ ଥିଲା, ଅତ୍ୟାବଶ୍ୟକ ଗୁଣାତ୍ମକ ଔଷଧ ଉପତ୍ାଦନ କରି ଓଡ଼ିଶା ଏବଂ ପୂର୍ବାଞ୍ଚଳ ରାଜ୍ୟବାସୀଙ୍କୁ ସୁଲଭ ମୂଲ୍ୟରେ ଯୋଗାଇ ଦେବା।