ପୁଣେ, ୨୨।୩(ପି.ଟି.): ଇଂଲଣ୍ଡର ଭାରତ ଗସ୍ତ ଅନ୍ତିମ ପର୍ଯ୍ୟାୟରେ ପହଞ୍ଚିଛି। ଟେଷ୍ଟ ପରେ ଟି୨୦ ସିରିଜ ଅନୁଷ୍ଠିତ ହୋଇଯାଇଛି। ଏବେ ପୁଣେରେ ୩ ମ୍ୟାଚ୍ ବିଶିଷ୍ଟ ଦିନିକିଆ ସିରିଜ ଆରମ୍ଭ ହେବାକୁ ଯାଉଛି। ଏହି ସିରିଜ ଖେଳିବାକୁ ଭାରତୀୟ ଦଳ ପୁଣେରେ ପହଞ୍ଚିଛି। ଟେଷ୍ଟ ସିରିଜରେ ଭାରତ ୩-୧ରେ ବିଜୟୀ ହେବା ପରେ ଟି୨୦ରେ ୩-୨ରେ ବାଜି ମାରିଛି। ଟେଷ୍ଟ ମ୍ୟାଚ୍ଗୁଡ଼ିକ ଚେନ୍ନାଇ ଓ ଅହମଦାବାଦରେ ଖେଳାଯାଇଥିଲା। ସେହିପରି ଟି୨୦ ମ୍ୟାଚଗୁଡ଼ିକ ଅହମଦାବାଦର ନରେନ୍ଦ୍ର ମୋଦି ଷ୍ଟାଡିୟମରେ ଅନୁଷ୍ଠିତ ହୋଇଥିଲା।
ବିରାଟ କୋହଲିଙ୍କ ନେତୃତ୍ୱରେ ଭାରତୀୟ ଦଳ ଅହମଦାବାଦରୁ ଏକ ଚାର୍ଟାଡ ଫ୍ଲାଇଟ୍ରେ ଅପରାହ୍ନ ୪.୪୫ରୁ ଯାତ୍ରା ଆରମ୍ଭ କରିଥିଲା। ୩ଟି ଦିନିକିଆ ମ୍ୟାଚ୍ ଗହୁଞ୍ଜେସ୍ଥିତ ମୁମ୍ବାଇ କ୍ରିକେଟ ଆସୋସିଏଶନ (ଏମ୍ସିଏ) ଗ୍ରାଉଣ୍ଡରେ ମାର୍ଚ୍ଚ ୨୩, ୨୬ ଓ ୨୮ ତାରିଖରେ ଖେଳାଯିବ। ତେବେ ଷ୍ଟାଡିୟମରେ ଦର୍ଶକ ଅନୁପସ୍ଥିତ ରହିବେ। ଭାରତୀୟ ଦିନିକିଆ ଦଳରେ କର୍ନାଟକ ଦ୍ରୁତ ବୋଲର ପ୍ରସିଦ୍ଧ କ୍ରିଷ୍ଣା, ଅଲ୍ରାଉଣ୍ଡର କ୍ରୁନାଲ ପାଣ୍ଡ୍ୟା ଓ ସୂର୍ଯ୍ୟକୁମାର ଯାଦବଙ୍କୁ ସାମିଲ କରାଯାଇଛି। କୋହଲିଙ୍କୁ ବାଦ୍ ଦେଲେ ଦଳରେ ରୋହିତ ଶର୍ମା, ଶିଖର ଧାଓ୍ବନ, ଶୁବମନ ଗିଲ, ଶ୍ରେୟାସ ଆୟାର, ହାର୍ଦ୍ଦିକ ପାଣ୍ଡ୍ୟା, ରିଷଭ ପନ୍ତ ଓ ଅଭିଜ୍ଞ ଦ୍ରୁତ ବୋଲର ଭୁବନେଶ୍ୱର କୁମାର ଦଳରେ ସାମିଲ ହୋଇଛନ୍ତି। ଗତବର୍ଷ ଅଷ୍ଟ୍ରେଲିଆରେ ଭାରତ ଦିନିକିଆ ସିରିଜରେ ୧-୨ ବ୍ୟବଧାନରେ ପରାସ୍ତ ହୋଇଥିଲା।
