ନାରାୟଣପାଟଣା, ୨।୪(ଡି.ଏନ୍.ଏ.): ଆମେରିକାର ନାସାରେ ଗବେଷଣା କରିବେ କୋରାପୁଟ ଜିଲା ନାରାୟଣପାଟଣା ବ୍ଲକର ବ୍ୟବସାୟୀ କେ. ଶାୟାରାଜୁଙ୍କ ଝିଅ କେ.ଗଙ୍ଗୋତ୍ରୀ। ନାସାର ଏକ ପ୍ରୋଜେକ୍ଟରେ କାମ କରିବା ପାଇଁ ତାଙ୍କୁ ସୁଯୋଗ ମିଳିଛି।
କେ.ଗଙ୍ଗୋତ୍ରୀ ସ୍ଥାନୀୟ ଇଂଲିଶ ମିଡିୟମ ଆଶା ପବ୍ଲିକ୍ ସ୍କୁଲରେ ପଞ୍ଚମ ଶ୍ରେଣୀ ଯାଏ ପଢ଼ିଥିଲେ। ଏହାପରେ ସେ ଆନ୍ଧ୍ରପ୍ରଦେଶ ବିଶାଖାପାଟଣା ଆନନ୍ଦପୁରମସ୍ଥିତ ରବୀନ୍ଦ୍ର ଭାରତୀ ସ୍କୁଲରେ ନାମ ଲେଖିଥିଲେ। ଏବେ ସେଠାରେ ସେ ଅଷ୍ଟମ ଶ୍ରେଣୀରେ ପାଠ ପଢୁଛନ୍ତି। ଆମେରିକାର ନାସାରେ ଗବେଷଣା କରିବା ପାଇଁ ସ୍କୁଲ ପକ୍ଷରୁ ୫ଟି ପ୍ରୋଜେକ୍ଟ ପଠାଯାଇଥିଲା। ସେଥିମଧ୍ୟରୁ କେ. ଗଙ୍ଗୋତ୍ରୀଙ୍କର ଆଷ୍ଟ୍ରୋ ଫାଇଲ୍ ମନୋନୀତ ହୋଇଛି। ସ୍କୁଲ କର୍ତ୍ତୃପକ୍ଷଙ୍କୁ ଏ ନେଇ ନାସା ପକ୍ଷରୁ ସୂଚନା ମିଳିବା ପରେ ସେମାନେ କେ. ଗଙ୍ଗୋତ୍ରୀଙ୍କ ପରିବାର ଲୋକଙ୍କୁ ଜଣାଇଛନ୍ତି। ଏହାପରେ ନାରାୟଣପାଟଣାରେ ଖୁସିର ମାହୋଲ ଦେଖାଦେଇଛି। ସେ ଜୁଲାଇରେ ଆମେରିକା ଯିବେ ବୋଲି ସୂଚନା ମିଳିଛି। ଓଡ଼ିଶା ଦିବସ ଅବସରରେ ଏପରି ଏକ ଖବର ମିଳିବା ଆମ ଓଡ଼ିଆଙ୍କ ପାଇଁ ଗର୍ବ ଏବଂ ଗୌରବର କଥା ବୋଲି କେ. ଗଙ୍ଗୋତ୍ରୀ ପାଠ ପଢୁଥିବା ନାରାୟଣପାଟଣା ଆଶା ପବ୍ଲିକ ସ୍କୁଲର ପ୍ରିନ୍ସିପାଲ କାମେଶ୍ବର ପଟ୍ଟନାୟକ, ଶିକ୍ଷକ ଅବନୀ ରଞ୍ଜନ ମିଶ୍ର କହିଛନ୍ତି।