ଭୁବନେଶ୍ୱର, ୨୪ା୧୧(ଅସମାପିକା ସାହୁ):ଚଳିତ ସିଜନ୍ର କୌନ୍ ବନେଗା କରୋଡ଼ପତି(କେବିସି) ଜୁନିଅରରେ ଚମକିଛନ୍ତି ଓଡ଼ିଆ ପୁଅ ଅତ୍ୟୁକ୍ତ ବେହୁରାୟ। ପଞ୍ଚମ ଶ୍ରେଣୀରେ ପଢୁଥିବା ୧୦ ବର୍ଷ ବୟସ୍କ ଅତ୍ୟୁକ୍ତ ୨୫ ଲକ୍ଷ ଟଙ୍କା ପୁରସ୍କାର ଜିତିଛନ୍ତି। କେବଳ ଏତିକି ନୁହେଁ, କେବିସିର ସଞ୍ଚାଳକ ସୁପରଷ୍ଟାର ଅମିତାଭ ବଚ୍ଚନଙ୍କୁ ମଧ୍ୟ ସେ ଦୁଇପଦ ଓଡ଼ିଆ ଶିଖାଇ ପ୍ରଶଂସା ସାଉଣ୍ଟିଛନ୍ତି। ଅତ୍ୟୁକ୍ତଙ୍କ ଘର କଟକର ସିଡିଏ ଅଞ୍ଚଳରେ ହୋଇଥିବାବେଳେ ମାମୁଘର ଭୁବନେଶ୍ବର ଶୈଳଶ୍ରୀବିହାରରେ। ବାପା ଅଶେଷ କୁମାର ବେହୁରାୟ ଗୁଜରାଟସ୍ଥିତ ନାଗାର୍ଜୁନ ଫର୍ଟିଲାଇଜର୍ସ ଆଣ୍ଡ୍ କେମିକାଲ୍ସ ଲିମିଟେଡ୍ରେ ହାଲୋଲ ପ୍ଲାଣ୍ଟର ମୁଖ୍ୟ ଭାବରେ କାର୍ଯ୍ୟରତ ଅଛନ୍ତି। ତାଙ୍କ ମା’ ଦୀପିକା ବେହୁରାୟ ଜଣେ ଗୃହିଣୀ। ଅତ୍ୟୁକ୍ତ ଗୁଜରାଟରେ ଏକ ଘରୋଇ ବିଦ୍ୟାଳୟରେ ପାଠ ପଢୁଛନ୍ତି। ନବମ ଶ୍ରେଣୀରେ ପଢୁଥିବା ତାଙ୍କ ବଡ଼ ଭଉଣୀ ଆକୃତି ବେହୁରାୟ ଜାତୀୟ ସ୍ତରର କୁଇଜ ଚାମ୍ପିୟନ ହୋଇଥିବାରୁ ତାଙ୍କ ପ୍ରେରଣାରେ ଅତ୍ୟୁକ୍ତ କୁଇଜ୍ ପ୍ରତି ଆଗ୍ରହୀ ହୋଇଥିଲେ। କେବିସିର ହଟ୍ ସିଟ୍ରେ ବସିବା ପାଇଁ ସାରା ଦେଶରୁ ହଜାର ହଜାର ପିଲାଙ୍କ ଭିତରେ ଉଭୟ ଲିଖିତ, ମୌଖିକ ଏବଂ ଅନ୍ଲାଇନ ଆଦି କଠିନ ପରୀକ୍ଷାରେ ଅତ୍ୟୁକ୍ତଙ୍କୁ ଉତ୍ତୀର୍ଣ୍ଣ ହେବାକୁ ପଡ଼ିଥିଲା। ତେବେ ୨୫ ଲକ୍ଷ ଟଙ୍କା ଜିତିବା ପରେ ୫୦ ଲକ୍ଷ ଟଙ୍କା ପାଇଁ ଉଦ୍ଦିଷ୍ଟ ଥିବା ପ୍ରଶ୍ନକୁ ଉତ୍ତର ଦେଇ ନ ପାରି ପ୍ରତିଯୋଗିତାରୁ ଓହରି ଆସିଥିଲେ। ଅନୁମାନ କରି ଭୁଲ୍ ଉତ୍ତର ଦେଇଥିଲେ ଅତ୍ୟୁକ୍ତ ମାତ୍ର ୩ ଲକ୍ଷ ୨୦ ହଜାର ଟଙ୍କା ପାଇଥାଆନ୍ତେ। ତେବେ ଅତ୍ୟୁକ୍ତ ଶିଶୁ ହୋଇଥିବାରୁ ଏହି ୨୫ ଲକ୍ଷ ଟଙ୍କା ବର୍ତ୍ତମାନ ମା’ଙ୍କ ସହ ଯୁଗ୍ମ ଖାତାରେ ବ୍ୟାଙ୍କରେ ରହିବ। ୧୮ ବର୍ଷ ହେବା ପରେ ସେ ଉକ୍ତ ଟଙ୍କାକୁ ଉଠାଇ ପାରିବେ।
ସେହିଭଳି କେବିସି ଶୋ’ରେ ଅମିତାଭଙ୍କ ସହିତ ମଜା ମଜା କଥା କହି ଉପସ୍ଥିତ ଦର୍ଶକଙ୍କୁ ଆମୋଦିତ କରିଥିଲେ ଅତ୍ୟୁକ୍ତ। ମୋ’ନାମ ଅମିତାଭ ବଚ୍ଚନ ବୋଲି ଓଡ଼ିଆରେ ଅମିତାଭଙ୍କୁ କୁହାଇ ସେ ହୃଦୟ ଜିଣିଥିଲେ। ଅତ୍ୟୁକ୍ତଙ୍କ ସ୍ପେଲିଙ୍ଗ୍ ବିଷୟରେ ଜାଣିବା ପାଇଁ ଅମିତାଭ ବଚ୍ଚନ ପ୍ରତିଯୋଗିତା ବାହାରେ ତାଙ୍କୁ ୩ଟି କଠିନ ଶବ୍ଦର ବନାନ ପଚାରିଥିଲେ ଏବଂ ଅତ୍ୟୁକ୍ତ ସମସ୍ତ ଉତ୍ତର ଠିକ୍ ଭାବେ ଦେଇଥିଲେ। ମାତ୍ର ଅତ୍ୟୁକ୍ତ ତାଙ୍କୁ ଯେଉଁ କଷ୍ଟ ଶବ୍ଦଟି ପଚାରିଥିଲେ, ତାହା କିନ୍ତୁ ଅମିତାଭ ଜାଣି ନ ଥିଲେ। ଅତ୍ୟୁକ୍ତ ସେଇ କଠିନ ଶବ୍ଦର ବନାନ କହିବା ପରେ ତାହା ଏକ ରୋଗର ନାମ ବୋଲି କହିଥିଲେ। ତେବେ ଶୋ’ ମଧ୍ୟରେ ବିଜ୍ଞାପନ ପାଇଁ ବ୍ରେକ୍ ନେବା ପାଇଁ ଅମିତାଭଙ୍କୁ କୋରିଆ ଭାଷାରେ କୁହାଇ ସମସ୍ତଙ୍କୁ ଆଚମ୍ବିତ କରେଇଥିଲେ ଅତ୍ୟୁକ୍ତ। ଗୁରୁବାର ରାତି ୯ଟାରେ ସୋନି ଏଣ୍ଟରଟେନ୍ମେଣ୍ଟ ଲାଇଭ୍ରେ ଏହା ପ୍ରସାରିତ ହୋଇଥିଲା।