ନୂଆଦିଲ୍ଲୀ୫ା୪(ବ୍ୟୁରୋ): ଦେଶରେ ନ୍ୟାୟ ପ୍ରଦାନ ତାଲିକାରେ ଓଡ଼ିଶା ୧୦ ନମ୍ବର ସ୍ଥାନରେ ରହିଛି। ୧୮ ରାଜ୍ୟକୁ ନେଇ ପ୍ରକାଶିତ ଇଣ୍ଡିଆ ଜଷ୍ଟିସ୍ ରିପୋର୍ଟ(ଆଇଜେଆର୍) ୨୦୨୨ରେ ଓଡ଼ିଶା ପୂର୍ବାପେକ୍ଷା ଗୋଟିଏ ସ୍ଥାନକୁ ଉନ୍ନୀତ ହୋଇଛି। ୨୦୨୦ ରିପୋର୍ଟରେ ଏହା ୧୧ତମ ସ୍ଥାନରେ ଥିଲା। ୨୦୧୯ରେ ଟାଟା ଟ୍ରଷ୍ଟ ପକ୍ଷରୁ ଆରମ୍ଭ କରାଯାଇଥିବା ଆଇଜେଆର୍ର ତୃତୀୟ ସଂସ୍କରଣ ନୂଆଦିଲ୍ଲୀଠାରେ ମଙ୍ଗଳବାର ପ୍ରକାଶ ପାଇଛି।
ନ୍ୟାୟ ପ୍ରଦାନରେ ବୃହତ୍ ଏବଂ ମଧ୍ୟମ ରାଜ୍ୟ ବର୍ଗରେ କର୍ନାଟକ ପ୍ରଥମ ସ୍ଥାନରେ ରହିଥିବାବେଳେ କ୍ଷୁଦ୍ର ରାଜ୍ୟ ବର୍ଗରେ ସିକିମ୍ ସର୍ବାଗ୍ରେ ରହିଛି। ନ୍ୟାୟ ପ୍ରଦାନ କ୍ଷେତ୍ରରେ କାର୍ଯ୍ୟ କରୁଥିବା ୪ଟି ସ୍ତମ୍ଭ ଯଥା ପୋଲିସ, ବିଚାର ବିଭାଗ, ଜେଲ ଏବଂ ଆଇନ ସହାୟତାକୁ ନେଇ ଆଇଜେଆର୍ ଏହି ତାଲିକା ପ୍ରସ୍ତୁତ କରିଥାଏ। ପ୍ରତ୍ୟେକ ସ୍ତମ୍ଭରେ ରହିଥିବା ଅର୍ଥ ବ୍ୟବସ୍ଥା, ମାନବ ସମ୍ବଳ, କାର୍ଯ୍ୟଚାପ, ବିକେନ୍ଦ୍ରୀକରଣ ଏବଂ ଭିତ୍ତିଭୂମିକୁ ଆଧାର କରାଯାଇଥାଏ। ଏଥିସହିତ ମୌଳିକ ସେବା ଯୋଗାଇବାକୁ ରହିଥିବା ନ୍ୟାୟିକ ବ୍ୟବସ୍ଥାରେ ରାଜ୍ୟର ପ୍ରଦର୍ଶନକୁ ମଧ୍ୟ ମାନଦଣ୍ଡ ଭାବେ ଗ୍ରହଣ କରାଯାଇଥାଏ।
ଓଡ଼ିଶା ପୋଲିସ ବିଭାଗରେ ମହିଳା ଓ ପୁରୁଷ ଅନୁପାତରେ ଏକ ବୃହତ୍ ବ୍ୟବଧାନ ରହିଥିବା ରିପୋର୍ଟରେ ସୂଚିତ କରାଯାଇଛି। ୨୦୨୨ ଜାନୁୟାରୀରେ ରାଜ୍ୟରେ ମହିଳା ପୋଲିସଙ୍କ ସଂଖ୍ୟା ମାତ୍ର ୧୦.୫ ପ୍ରତିଶତ ରହିଥିଲା। ସେହିପରି ବିଚାର ବିଭାଗ କଥା ଦେଖିଲେ ତଳ କୋର୍ଟଗୁଡ଼ିକରେ ମହିଳା ବିଚାରପତିଙ୍କ ସଂଖ୍ୟା ମୋଟ ସଂଖ୍ୟାର ୪୪.୪ ପ୍ରତିଶତ ରହିଥିବାବେଳେ ହାଇକୋର୍ଟରେ ୨୦୨୨ ଡିସେମ୍ବର ସୁଦ୍ଧା ମାତ୍ର ୪.୫ ପ୍ରତିଶତ ରହିଥିଲା। ଏପରି କି ସେଥିମଧ୍ୟରୁ ୨୦୨୨ ଜୁଲାଇ ସୁଦ୍ଧା ତଳ କୋର୍ଟଗୁଡ଼ିକରେ ସଂରକ୍ଷିତ ବ୍ୟବସ୍ଥାରେ ଚାକିରି ପାଇଥିବା ମହିଳା ବିଚାରପତିଙ୍କ ସଂଖ୍ୟା ୧୧ ପ୍ରତିଶତ ଥିବା ରିପୋର୍ଟରେ ପ୍ରକାଶ ପାଇଛି।
୨୦୨୨ ଜାନୁୟାରୀ ସୁଦ୍ଧା ଓଡ଼ିଶାରେ ୧,୨୨୭ଜଣ ଲୋକରେ ଜଣେ ମାତ୍ର ପୋଲିସ କର୍ମଚାରୀ ରହିଛନ୍ତି, ଯାହାକି ଅନ୍ତଃରାଷ୍ଟ୍ରୀୟସ୍ତରର ମାନଠାରୁ ବହୁ କମ୍ ବୋଲି ରିପୋର୍ଟରେ ଉଲ୍ଲେଖ ରହିଛି। ରିପୋର୍ଟରେ ଆହୁରି ମଧ୍ୟ ଉଲ୍ଲେଖ କରାଯାଇଛି ଯେ, ୨୦୨୦-୨୧ରେ ପଞ୍ଜାବରେ ଜଣେ ପୋଲିସ ପିଛା ୨,୦୫୫ ଟଙ୍କା ଖର୍ଚ୍ଚ ହେଉଥିବାବେଳେ ଓଡ଼ିଶାରେ ମାତ୍ର ୭୬୩ ଟଙ୍କା ଖର୍ଚ୍ଚ ହେଉଛି।