ନୂଆଦିଲ୍ଲୀ, ୨୬।୭: ହିରୋ ଏସିଆନ ଚାମ୍ପିୟନ୍ସ ଟ୍ରଫି ଚେନ୍ନାଇର ମେୟର ରାଧାକ୍ରିଷ୍ଣନ ଷ୍ଟାଡିୟମରେ ଅଗଷ୍ଟ ୩ରୁ ୧୨ ପର୍ଯ୍ୟନ୍ତ ଅନୁଷ୍ଠିତ ହେବ। ଏହି ସମ୍ମାନଜନକ ପ୍ରତିଯୋଗିତା ପାଇଁ ମଙ୍ଗଳବାର ୧୮ ଜଣିଆ ଭାରତୀୟ ଦଳ ଘୋଷଣା କରାଯାଇଛି। ଏଥିରେ ଓଡ଼ିଶାରୁ କେବଳ ଅମିତ ରୋହିଦାସ ସ୍ଥାନ ପାଇଛନ୍ତି। ଡ୍ରାଗ୍ଫ୍ଲିକର ହରମନପ୍ରୀତ ସିଂ ଅଧିନାୟକ ଏବଂ ମିଡ୍ଫିଲ୍ଡର ହାର୍ଦ୍ଦିକ ସିଂ ଉପ-ଅଧିନାୟକ ଭାବେ ଅପରିବର୍ତ୍ତିତ ରହିଛନ୍ତି। ଭାରତ ଏହି ପ୍ରତିଯୋଗିତାରେ କୋରିଆ, ମାଲେସିଆ, ପାକିସ୍ତାନ, ଜାପାନ ଓ ଚାଇନା ସହିତ ଖେଳିବ। ଆସନ୍ତା ହାଙ୍ଗଝୋଉ ଏସିଆନ ଗେମ୍ସପୂର୍ବରୁ ଏହି ଟୁର୍ନାମେଣ୍ଟରେ ଭାରତକୁ ଭଲ ପ୍ରସ୍ତୁତି ମିଳିବ।
ଦୁଇ ଅଭିଜ୍ଞ ଗୋଲକିପର ପି.ଆର. ଶ୍ରୀଜେଶ ଓ କ୍ରିଶନ ବାହାଦୂର ପାଠକଙ୍କୁ ପୁଣି ଗୁରୁଦାୟିତ୍ୱ ଦିଆ ଯାଇଛି। ସେହିପରି ଅମିତ ରୋହିଦାସଙ୍କ ସମେତ ଜରମନପ୍ରୀତ ସିଂ, ସୁମିତ, ଯୁଗରାଜ ସିଂ, ହରମନପ୍ରୀତ ସିଂ ଓ ବରୁଣ କୁମାରଙ୍କ ଉପରେ ରକ୍ଷଣଭାଗ ଦାୟିତ୍ୱ ରହିବ। ପ୍ରୋ ଲିଗ୍ର ୟିରୋପିଆଚ ଚରଣରେ ଡିଫେଣ୍ଡରଭାବେ ଖେଳିଥିବା ମନପ୍ରୀତ ସିଂଙ୍କୁ ପୁଣି ମିଡ୍ଫିଲ୍ଡରେ ଦେଖିବାକୁ ମିଳିବ। ”ଆମେ ବିଭିନ୍ନ ଦିଗକୁ ଲକ୍ଷ୍ୟରେ ରଖି ଦଳ ଚୟନ କରିଛୁ। ଏହା ଯୁବ ଏବଂ ଅଭିଜ୍ଞ ଖେଳାଳିଙ୍କୁ ନେଇ ବେଶ୍ ସନ୍ତୁଳିତ। ସ୍ପାନିଶ ହକି ଫେଡେରେଶନର ୧୦୦ ବର୍ଷ ପୂର୍ତ୍ତୀ ଉପଲକ୍ଷେ ଆୟୋଜିତ ଅନ୍ତର୍ଜାତୀୟ ଟୁର୍ନାମେଣ୍ଟ ପରେ ଭାରତୀୟ ଦଳ ସିଧାସଳଖ ପ୍ରତ୍ୟାବର୍ତ୍ତନ କରି ଘରୋଇ ପରିବେଶରେ ଚାମ୍ପିୟନ୍ସ ଟ୍ରଫି ଖେଳିବ। ଆମ ଖେଳାଳିମାନେ ଭରପୂର ଦର୍ଶକଙ୍କ ଉପସ୍ଥିତିରେ ଘରୋଇ ପରିବେଶରେ ଖେଳିବାପାଇଁ ବ୍ୟଗ୍ର ଅଛନ୍ତି“ ବୋଲି ମୁଖ୍ୟ କୋଚ୍ କ୍ରେଗ୍ ଫୁଲଟନ ପ୍ରକାଶ କରିଛନ୍ତି।
ଏସିଆନ ଚାମ୍ପିୟନ୍ସ ଟ୍ରଫି ହକି ଷ୍ଟାର ସ୍ପୋଟର୍ସ ଓ ଫ୍ୟାନକୋଡ୍ରେ ପ୍ରସାରିତ ହେବ। ପ୍ରକାଶିତ କାର୍ଯ୍ୟସୂଚୀ ଅନୁସାରେ ଭାରତ ଅଗଷ୍ଟ ୩ରେ ଚାଇନା ବିପକ୍ଷରେ ମ୍ୟାଚ ଖେଳି ଅଭିଯାନ ଆରମ୍ଭ କରିବ। ଏହାପରେ ୪ରେ ଜାପାନ, ୬ରେ ମାଲେସିଆ, ୭ରେ କୋରିଆ ଓ ୯ରେ ପାକିସ୍ତାନକୁ ଭେଟିବ। ଅଗଷ୍ଟ ୧୧ରେ ୨ଟି ଯାକ ସେମିଫାଇନାଲ ଏବଂ ୫-୬ ସ୍ଥାନପାଇଁ ପ୍ଲେସିଂ ମ୍ୟାଚ ହେବ। ୧୨ ତାରିଖରେ ଫାଇନାଲ ଓ ତୃତୀୟ ସ୍ଥାନପାଇଁ ମ୍ୟାଚ ଅନୁଷ୍ଠିତ ହେବ।
ଭାରତୀୟ ଦଳ
ଗୋଲକିପର୍ସ: ପି.ଆର. ଶ୍ରୀଜେଶ, କ୍ରିଶନ ବାହାଦୂର ପାଠକ।
ଡିଫେଣ୍ଡର୍ସ: ଜରମନପ୍ରୀତ ସିଂ, ସୁମିତ, ଯୁଗରାଜ ସିଂ, ହରମନପ୍ରୀତ ସିଂ (ଅଧିନାୟକ), ବରୁଣ କୁମାର, ଅମିତ ରୋହିଦାସ।
ମିଡ୍ଫିଲ୍ଡର୍ସ: ହାର୍ଦ୍ଦିକ ସିଂ (ଉପ-ଅଧିନାୟକ), ବିବେକ ସାଗର ପ୍ରସାଦ, ମନପ୍ରୀତ ସିଂ, ନିଳକାନ୍ତ ଶର୍ମା, ସମଶେର ସିଂ।
ଫରଓ୍ବାଡର୍ସ: ଆକାଶଦୀପ ସିଂ, ମନଦୀପ ସିଂ, ଗୁରଜାନ୍ତ ସିଂ, ସୁଖଜିତ ସିଂ, ଏସ. କାର୍ଥୀ।