କାଳିଆପାଣି, ୧୯ା୧ (ଡି.ଏନ.ଏ.) : ଯାଜପୁର ଜିଲା କାଳିଆପାଣି ଖଣି ଅଞ୍ଚଳର ଟାଟା ଷ୍ଟିଲ୍ ମାଇନିଂ କଲୋନି ପରିସର ଖେଳ ପଡ଼ିଆରେ ବୁଧବାର ଦୃଷ୍ଟିବାଧିତ ଆନ୍ତଃରାଜ୍ୟ ବନ୍ଧୁତ୍ୱପୂର୍ଣ୍ଣ କ୍ରିକେଟ୍ ମ୍ୟାଚ୍ ଅନୁଷ୍ଠିତ ହୋଇଯାଇଛି। ଏଥିରେ ଓଡ଼ିଶା ଏକାଦଶ ବିଜୟୀ ହୋଇଛି। ଟାଟା ଷ୍ଟିଲ୍ ମାଇନିଂ କମ୍ପାନୀ ପକ୍ଷରୁ ଆୟୋଜିତ ଏହି ମ୍ୟାଚ୍ ଝାଡ଼ଖଣ୍ଡ ଏକାଦଶ ଓ ଓଡ଼ିଶା ଏକାଦଶ ଦଳ ମଧ୍ୟରେ ଅନୁଷ୍ଠିତ ହୋଇଥିଲା। ଟସ ଜିତି ଝାଡଖଣ୍ଡ ଏକାଦଶ ଦଳ ପ୍ରଥମ ବୋଲିଂ କରିଥିଲା। ଓଡ଼ିଶା ଏକାଦଶ ଦଳ ୨୦ ଓଭର ଖେଳି ୩୦୯ ରନ କରିଥିଲା। ଜବାବରେ ଝାଡ଼ଖଣ୍ଡ ଏକାଦଶ ଦଳ ସମସ୍ତ ଉଇକେଟ ହରାଇ ୧୫୨ ରନ କରିଥିଲା।
ନକୁଳ ବଡ଼ନାୟକ ୬୦ ବଲରେ ୧୩୦ ରନର ଏକ ଧୂଆଁଧାର ଶତକ କରି ମ୍ୟାନ୍ ଅଫ୍ ଦି ମ୍ୟାଚ୍ ବିବେଚିତ ହୋଇଥିଲେ।
ରାଜ୍ୟ ସାମାଜିକ ସୁରକ୍ଷା ଓ ଭିନ୍ନକ୍ଷମ ସଶକ୍ତୀକରଣ ବିଭାଗ ଅନୁସଚିବ ସନ୍ନ୍ୟାସୀ ବେହେରା ଅତିଥିଭାବେ ଯୋଗଦେଇ ମ୍ୟାଚ୍କୁ ଉଦ୍ଘାଟନ କରିଥିଲେ। ଅନ୍ୟତମ ଅତିଥି ଭାବେ କମ୍ପାନୀ ନିର୍ଦ୍ଦେଶକ ପଙ୍କଜ କୁମାର ସତିଜା ଯୋଗଦେଇ କମ୍ପାନୀ ଦୃଷ୍ଟିହୀନଙ୍କ ଦକ୍ଷତା ବିକାଶ ଓ ସ୍ବପ୍ନକୁ ସାକାର କରିବାକୁ ଉଦ୍ୟମ ଜାରି ରଖିଛି ବୋଲି ପ୍ରକାଶ କରିଥିଲେ। କମ୍ପାନୀ ଅଧ୍ୟକ୍ଷ ଡି.ବି. ସୁନ୍ଦର ରାମମ ଯୋଗଦେଇ ବିଜୟୀ ଓଡ଼ିଶା ଏକାଦଶ ଦଳକୁ ଟ୍ରଫି ପ୍ରଦାନ କରିଥିଲେ। ଅନ୍ୟମାନଙ୍କ ମଧ୍ୟରେ ଜିଏମ୍ ସୁଶାନ୍ତ କୁମାର ମିଶ୍ର, ପ୍ରଶାସନିକ ମୁଖ୍ୟ ଗୌତମ ଚକ୍ରବର୍ତ୍ତୀ ଓ ପ୍ରଶାସନିକ ସହ ମୁଖ୍ୟ ସଞ୍ଜୀବ ସାହୁ ପ୍ରମୁଖ ଉପସ୍ଥିତ ଥିଲେ।