ଭୁବନେଶ୍ୱର,୮ା୬(ବ୍ୟୁରୋ): ତୁଟିପାରୁନି ରାଜ୍ୟସ୍ତରୀୟ ଅମଲା କର୍ମଚାରୀଙ୍କ ଦାବି ସମ୍ପର୍କିତ ସମସ୍ୟା। ୨ଥର ଆଲୋଚନା ପରେ ବି ଏ ପର୍ଯ୍ୟନ୍ତ କିଛି ସମାଧାନର ରାସ୍ତା ବାହାରିପାରିନାହିଁ। ଗତ ୨ ତାରିଖରେ ଅମଲା ମଞ୍ଚର ପ୍ରତିନିଧିମାନଙ୍କ ସହ ମୁଖ୍ୟ ଶାସନ ସଚିବ ପ୍ରଦୀପ କୁମାର ଜେନା ପ୍ରଥମ ବୈଠକ କରିଥିଲେ। ହେଲେ ସେଥିରେ କିଛି ସମାଧାନ ହୋଇପାରି ନ ଥିଲା। ପୁଣିଥରେ ବୁଧବାର ଲୋକସେବା ଭବନ ଠାରେ ଜେନା ଅମଲା ପ୍ରତିନିଧିମାନଙ୍କ ସହ ପୁନର୍ବାର ବୈଠକ କରିବା ସତ୍ତ୍ୱେ କିଛି ସମାଧାନ ବାହାରିିପାରି ନ ଥିବା ଜଣାପଡ଼ିଛି। ଆସନ୍ତା ଶୁକ୍ରବାର ଅମଲା ମଞ୍ଚର ଏକ ରାଜ୍ୟସ୍ତରୀୟ ବୈଠକ ବସିବାକୁ ଥିବାବେଳେ ସେଥିରେ ପୁଣି ଆନ୍ଦୋଳନ ଆଗକୁ ଜାରି ରଖିବା ଲାଗି ନିଷ୍ପତ୍ତି ନିଆଯିବ ବୋଲି ଜିଲାସ୍ତରୀୟ ମିଳିତ ଅମଲା ମଞ୍ଚର ଅଧ୍ୟକ୍ଷ ନାରାୟଣ ଦାସ ସୂଚନା ଦେଇଛନ୍ତି। ସେପଟେ ମୁଖ୍ୟ ଶାସନ ସଚିବ କିନ୍ତୁ ଅମଲାମାନଙ୍କୁ ତୁରନ୍ତ କାର୍ଯ୍ୟରେ ଯୋଗଦେବା ଲାଗି ପରାମର୍ଶ ଦେଇଥିବା ସୂଚନା ଦିଆଯାଇଛି। ମୁଖ୍ୟ ଶାସନ ସଚିବ କହିଛନ୍ତି, ଗତ ୨ ତାରିଖରେ ଅମଲାମାନଙ୍କ ସହ ବୈଠକ ହୋଇଥିଲା। ସେଦିନ ସାରେ ବାହାନଗା ରେଳ ଦୁର୍ଘଟଣା ଖବର ଆସିବା କ୍ଷଣି ରାଜ୍ୟ ସରକାର ଏବଂ ଜିଲା ପ୍ରଶାସନ ସମସ୍ତେ ଉଦ୍ଧାର କାର୍ଯ୍ୟଠାରୁ ଆରମ୍ଭକରି ବିଭିନ୍ନ ଦାୟିତ୍ୱ ତୁଲାଇଥିଲେ। ହେଲେ ଅମଲାମାନେ କିନ୍ତୁ ସେଥିରେ ସହଯୋଗ କରିବା ପରିବର୍ତ୍ତେ ଆନ୍ଦୋଳନ ଜାରି ରଖିଲେ। ବୁଧବାର ବୈଠକ ପରେ ମୁଖ୍ୟ ଶାସନ ସଚିବ କହିଛନ୍ତି, ଅମଲା ମିଳିତ ମଞ୍ଚ ତରଫରୁ କନିଷ୍ଠ ସହାୟକଙ୍କ ପ୍ରବେଶିକା ଦରମା ହାର ଲେଭେଲ-୪ରୁ ଲେଭେଲ-୯(୪୨୦୦)କୁ ବୃଦ୍ଧି ପାଇଁ ସେମାନେ ଦାବି ରଖିଛନ୍ତି। ସେଥିପ୍ରତି ସରକାର ସହୃଦୟତାର ସହିତ ବିଚାରକରି ନିଷ୍ପତ୍ତି ଜଣାଇବେ ବୋଲି ସଂଘର ସମସ୍ତ ମୁଖ୍ୟଙ୍କୁ ଜଣାଯାଇଥିଲା। ଏ ସମ୍ପର୍କରେ ଜିଲାସ୍ତରରେ କାର୍ଯ୍ୟରତ ଅମଲାଙ୍କୁ ବୁଝାଇ କାର୍ଯ୍ୟରେ ଯୋଗଦାନ କରିବାକୁ ମଧ୍ୟ ସରକାରଙ୍କ ତରଫରୁ ଅନୁରୋଧ କରାଯାଇଥିଲା। ହେଲେ ଅନୁରୋଧ ପରେ ମଧ୍ୟ ସେମାନେ ଆନ୍ଦୋଳନ ଜାରି ରଖିଛନ୍ତି। କେବଳ ସେତିକି ନୁହେଁ, ସରକାର ସେମାନଙ୍କ କଥା ଶୁଣୁନାହାନ୍ତି ବୋଲି ସାମାଜିକ ଓ ମୁଦ୍ରଣ ଗଣମାଧ୍ୟମରେ ମଧ୍ୟ ନକାରାତ୍ମକ ମନ୍ତବ୍ୟ ଦେଉଛନ୍ତି। ସରକାର ଜିଲାସ୍ତରୀୟ ଅମଲାମାନଙ୍କ ଦାବି ପ୍ରତି ସଚେତନ ଅଛନ୍ତି। ଏହି ପ୍ରସ୍ତାବ ସମ୍ପର୍କରେ ସବିଶେଷ ନିରୀକ୍ଷଣ ଓ ଅନୁଶୀଳନ କରାଯାଇ ଉପଯୁକ୍ତ କର୍ତ୍ତୃପକ୍ଷଙ୍କ ନିକଟରେ ଖୁବ୍ଶୀଘ୍ର ସେମାନଙ୍କ ଦାବି ଉପସ୍ଥାପନ କରାଯିବ। ଆସନ୍ତା ମାସକ ମଧ୍ୟରେ ଏ ସମ୍ପର୍କରେ ପୁନର୍ବାର ଆଲୋଚନା କରାଯିବ ବୋଲି ମୁଖ୍ୟ ଶାସନ ସଚିବ କହିଛନ୍ତି। ବୈଠକରେ ସାଧାରଣ ପ୍ରଶାସନ ଓ ସାଧାରଣ ଅଭିଯୋଗ ବିଭାଗ ଅତିରିକ୍ତ ମୁଖ୍ୟ ଶାସନ ସଚିବ ସୁରେନ୍ଦ୍ର କୁମାର, ଅର୍ଥ ବିଭାଗ ପ୍ରମୁଖ ଶାସନ ସଚିବ ବିଶାଳ କୁମାର ଦେବ, ଅତିରିକ୍ତ ଶାସନ ସଚିବ ଗଣେଶ ଚନ୍ଦ୍ର ପାତ୍ର ଏବଂ ଶଶାଙ୍କ ଶେଖର ଦାସ ପ୍ରମୁଖ ଅଧିକାରୀମାନେ ଉପସ୍ଥିତ ଥିଲେ। ଆଲୋଚନାରେ ଜିଲାସ୍ତରୀୟ ମିଳିତ ଅମଲା ମଞ୍ଚର ଅଧ୍ୟକ୍ଷ ନାରାୟଣ ଦାସ, ଆବାହକ ଚିତ୍ତରଞ୍ଜନ ତରାସିଆ, ଓଡ଼ିଶା ଅମଲା ସଂଘର ଅଧ୍ୟକ୍ଷ ହୃଦୟବିହାରୀ ମହାପାତ୍ର ପ୍ରମୁଖ ଅଂଶଗ୍ରହଣ କରିଥିଲେ।