ଭୁବନେଶ୍ୱର,୨୯।୯: ଓଡ଼ିଶାର ଅଭିବୃଦ୍ଧି ତଥା ପ୍ରଗତି କ୍ଷେତ୍ରରେ ସାମିଲ ଥିବା ଅଭିଜ୍ଞ ଓ ଦକ୍ଷ ବ୍ୟକ୍ତିତ୍ୟଙ୍କୁ ସମ୍ମାନିତ କରିବା ଉଦ୍ଦେଶ୍ୟରେ ନ୍ୟୁଜ୍୧୮ ଓଡ଼ିଆ ପକ୍ଷରୁ ଏକ ଅଭିନବ କାର୍ଯ୍ୟକ୍ରମର ଶୁଭାରମ୍ଭ କରାଯାଇଛି। ବିଶେଷକରି ପ୍ରତ୍ୟେକ ରାଜ୍ୟର ବିକାଶରେ କେତେଜଣ ବ୍ୟବସାୟୀଙ୍କର ହାତ ରହିଥାଏ, ଯେଉଁମାନେ ନିଜ ବ୍ୟକ୍ତିଗତ ସଫଳତାଠାରୁ ସମାଜ କଲ୍ୟାଣ କାମରେ ନିଜକୁ ଅଧିକ ନିୟୋଜିତ କରିଥାନ୍ତି। ସେମିତି କେତେଜଣ ବ୍ୟକ୍ତିତ୍ୟଙ୍କ କାମକୁ ଚିହ୍ନି ତାଙ୍କୁ ସମ୍ମାନିତ କରିବାକୁ ନ୍ୟୁଜ୍୧୮ ଓଡ଼ିଆ ଏଭଳି ଏକ ବଡ ପ୍ଲାଟ୍ଫର୍ମ ସୃଷ୍ଟି କରିଛି। ଉକ୍ତ ପ୍ଲାଟ୍ଫର୍ମର ପ୍ରଥମ ଉଦ୍ଘାଟନୀ ଉତ୍ସବରେ ଓଡ଼ିଶାର ବରିଷ୍ଠ ତଥା ଦକ୍ଷ ବାଣିଜି୍ୟକ ପ୍ରଶାସକ ତପନ ଚାନ୍ଦଙ୍କୁ ସମ୍ମାନିତ କରାଯାଇଛି।
ନ୍ୟୁଜ୍୧୮ ଓଡ଼ିଆ ପକ୍ଷରୁ ନିକଟରେ ଆୟୋଜିତ ସମ୍ମାନ ଉତ୍ସବରେ ମନ୍ତ୍ରୀ ପ୍ରତାପ କେଶରୀ ଦେବ ମୁଖ୍ୟ ଅତିଥି ଭାବେ ଯୋଗଦେଇ ତପନ ଚାନ୍ଦଙ୍କୁ ଓଡ଼ିଶା ବିଜ୍ନେସ୍ ଲିଡରଶିପ ଆୱାର୍ଡ ପ୍ରଦାନ କରିଥିଲେ। ଅନ୍ୟମାନଙ୍କ ମଧ୍ୟରେ ମିଶନ ଶକ୍ତି ସଚିବ ସୁଜାତା କାର୍ତ୍ତିକେୟନ, ସୂଚନା ଓ ପ୍ରଯୁକ୍ତି ବିଭାଗ ସଚିବ ମନୋଜ କୁମାର ମିଶ୍ର ଏବଂ ନ୍ୟୁଜ୍ ୧୮ର ଏଡିଟର ରାଜେଶ ରାଇନା ପ୍ରମୁଖ ସମ୍ମାନିତ ଅତିଥି ଭାବେ ଯୋଗ ଦେଇଥିଲେ।
ଉଲ୍ଲେଖଯୋଗ୍ୟ, ଏଭଳି କିଛି ପ୍ରମୁଖ ସମ୍ମାନ ପାଇଁ ଅନେକ ନାମାଙ୍କନ ପତ୍ର ମଧ୍ୟରୁ କେତେଜଣ ଦକ୍ଷ ବ୍ୟକ୍ତିଙ୍କୁ ଚୟନ କରାଯାଇଥିଲା। ତେବେ ଏଭଳି ଅବଦାନ ପାଇଁ ତପନ ଚାନ୍ଦଙ୍କୁ ସମ୍ମାନିତ କରାଯାଇଛି। ସେ ପୂର୍ବରୁ ନାଲ୍କୋର ସିଏମ୍ଡି ଭାବେ କାର୍ଯ୍ୟ କରି ସାରିଛନ୍ତି। ଏବେ ସେ ଇସ୍ପାତ, କୋଇଲା ଓ ଆଲୁମିନିୟମ କ୍ଷେତ୍ରରେ କାର୍ଯ୍ୟ କରୁଛନ୍ତି। ସେ ନିଜର କାମ ପାଇଁ ଉକ୍ତ ତାଲିକା ପରିସରଭୁକ୍ତ ହୋଇଥିବା କୁହାଯାଇଛି। ନ୍ୟୁଜ୍ ୧୮ର ବହୁ ବରିଷ୍ଠ କର୍ମଚାରୀ ଓ ଅନ୍ୟମାନେ ମଧ୍ୟ ଉପସ୍ଥିତ ଥିଲେ।
